باي فانگ لي قىتايداعى شاعىن قالاشىقتا ۆەلوتاكسيدىڭ جۇرگىزۋشىسى بولاتىن. ول ازاننان كەشكە دەيىن تىنباي جۇمىس ىستەيتىن. لي قىزمەتىنە ناقتى اقى قويماسا دا، پاسساجيرلەرى ونىڭ مەيىرىمدىلىگى مەن كوتەرىڭكى كوڭىل-كۇيىنە بولا، ارتىعىراق تولەيدى ەكەن. ءبىر جاعىنان كوپشىلىگى نانىن اۋىر ەڭبەكپەن تاۋىپ جۇرگەن مەيىرىمدى اقساقالعا قولداۋ كورسەتكىسى كەلسە كەرەك. ول جۇپىنىلاۋ، جاعدايى جاسالماعان پاتەردە، كەدەي اۋدانداردىڭ بىرىندە تۇرىپتى. ءليدىڭ تاپقان تابىسى ءوزىنىڭ جاعدايىن جاساۋعا، جاقسىراق تۇرۋىنا جەتەتىن ەدى، بىراق ول باسقالارعا كومەكتەسۋ ءۇشىن جۇمىس ىستەيتىن.
بىردە 74 جاسار جالدانىپ اۋىر جۇمىس ىستەپ جاتقان 6 جاسار بالانى بايقاپ قالادى. بالا اقىسىن العاندا قاتتى قۋانادى، سونىسىنا قاراماستان ناندى قوقىستان الىپ جەيدى. تاڭعالعان اقساقال بالادان نەگە ولاي ىستەگەنىن سۇراي باستايدى. سويتسە، كىشكەنتاي بالانىڭ اكە-شەشەسى جوعالىپ كەتكەن، ۇيىندە ەكى قارىنداسى بار ەكەن. ءوزى ناندى قوقىستان جەسە دە ءماز، تەك قارىنداستارىنىڭ قارنىن اشتىرماسا بولعانى. بالانىڭ مەيىرىمگە تولى جۇدىرىقتاي جۇرەگى اقساقالدى تاڭعالدىرادى. سوسىن ولاردى بالالار ۇيىنە ورنالاستىرىپ، ءومىر سۇرۋلەرى ءۇشىن ءوز ايلىعىنان اقشا تولەپ تۇراتىن بولادى. لي بولمەسىنىڭ اقىسى مەن تۇسكى اسىنا عانا از-ماز قاراجات قالدىرىپ، قالعان تابىسىن بالالار ۇيىنە بەرەتىن ەدى. سونىسىنا قاراماستان، ءوزىنىڭ قاراپايىم ومىرىنە ريزا بولاتىن. «تۇراتىن جەر، ىشەتىن تاماق، كيەتىن كيىمىم بار. ودان ارتىق نە كەرەك؟» دەپ ويلايتىن ۇنەمى. ءوزىنىڭ ارقاسىندا بالالاردىڭ اشتىقتان قۇتىلىپ، ءبىلىم الىپ جاتقانى ويىنا ورالعاندا اۋىر تۇرمىسىنىڭ ءوزى جەڭىلدەپ كەتكەندەي سەزىلەتىن. ۋاقىت وتە قاريا بالالار ۇيىنە تاپسىرعان ءۇش بالا وسەدى، ومىردەن ءوز ورىندارىن تابادى. سوعان قاراماستان لي جەتىمدەر ۇيىنە اقشا بەرۋىن توقتاتپايدى. مەيىرىمدى قاريا 93 جاس عۇمىر كەشىپ، كەدەيلىك پەن كارىلىك جەڭىپ، ومىردەن ءوتىپتى…
ال بالالار ءۇيىنىڭ قىزمەتكەرلەرى لي قايتىس بولعاننان كەيىن ول ساداقا ەتكەن اقشانى ەسەپتەيدى. سويتسە اقساقال 53 مىڭ دوللاردى وزگە ادامداردىڭ قۋانىشىنا جۇمساعان كۇيى، بۇ دۇنيەمەن قوشتاسىپ كەتە بارىپتى…
مۇمكىن لي 53 مىڭ دوللارعا ءۇي الار ما ەدى… جوق، جاقسى كيىنىپ، ءدامدى تاماقتانار ما ەدى؟ بىراق ول وعان باقىت سىيلايتىن با ەدى؟ ادام وزگەلەردى قۋانتقاندا باقىتتىراق بولا تۇسەتىنىن لي مىرزا ەرتە بايقاپ قويعان سەكىلدى…) بىرەۋلەر بار بايلىعىن سارپ ەتىپ، تاۋدان، تاستان ىزدەپ جۇرگەن باقىتتى، بار-جوعى 53 مىڭ دوللارعا ساتىپ العانىن ءليدىڭ ءوزى سەزدى مە ەكەن…
marfugashapian.islam.kz
پىكىر قالدىرۋ