— قانات اعا، ەلگە قوش كەلدىڭىز. ءسىزدى الماتىعا كەلدى دەگەندى ەستي سالا، سۇحباتتاسۋعا اسىقتىق. ەلگە ايتار جاڭالىقتارىڭىز كوپ شىعار. 18-ءىنشى جەكپە-جەگىڭىزدى جەڭىسپەن اياقتاعانىڭىز قۇتتى بولسىن. وكىنىشكە قاراي وتاندىق ارنالاردان كورە المادىق. شەتەلدىڭ سايتتارىنان تاۋىپ الىپ تاماشالادىق. قارسىلاستى 5 راۋندتا تىزە بۇكتىردىڭىز. بۇل جۇدىرىقتاسۋىڭىز قانشالىقتى قيىن بولدى؟
— بۇل جەكپە-جەككە 3 اي دايىندالدىم. قارسىلاسىم وسال بوكسشى ەمەس. تاجىريبەلى سپورتشى. اشىق جۇدىرىقتاسپايدى. اياقتا كوپ قيمىلدايدى. وزىنە ساي ءادىس-ايلاسى بار. جەكپە-جەك كولۋمبيادا ءوتتى. كولۋمبيا ماياميدەن قاراعاندا بيىگىرەك جەردە. اۋا رايىنا ۇيرەنە الماي، ءسال شارشاڭقىرادىم. بىراق، جەكپە-جەك مەن ويلاعانداي ءوتتى. فيدەل مونتەرروسادان كەيىنگى قارسىلاستارىم مىقتى بولماق. ەندى مەن، 12 راۋندتىق جەكپە-جەكتەردە جۇدىرىقتاسامىن.
— 12 راۋندقا قانشالىقتى دايىنسىز؟
— قۇدايعا شۇكىر، ءبارى جاقسى. ساقاداي سايمىن. مەن اقش-تا ويناپ جۇرگەم جوق. بار كۇشىمدى سالىپ دايىندالىپ ءجۇرمىن. مەن ءۇشىن 12 راۋندتىڭ ەش قيىندىعى جوق.
— كەلەسى قارسىلاس انىقتالدى ما؟ جەكپە-جەك قاشان بولۋى مۇمكىن؟
— قارسىلاستار كوپ. قازىر بىرنەشەۋىمەن سويلەسۋدەمىز. اراسىندا مەنىمەن جۇدىرىقتاسۋدان باس تارتقاندارى دا بولدى. بۇيىرتسا ءبىر اپتانىڭ ىشىندە شەشىلەدى.
— جەكپە-جەكتەرىڭىزدى ەلىمىزدەگى تەلەارنالار قاشان كورسەتەدى؟! بۇل تۋرالى كەلىسىم شارت جاسالىپ جاتىر ما؟
— بۇيىرتسا كەلەسى كەزدەسۋلەرىمدى كورسەتىدى. ءسوزدىڭ اشىعى، مەن ەلگە «استانا» پرەزيدەنتتىك كاسىپقوي سپورت كلۋبىمەن كەلىسىم شارت تۋرالى سويلەسۋگە كەلدىم. جاقىن كۇندەرى اقش-تان نەلسون لوپەز دە كەلەدى. ەكەۋمىز بىرگە استاناعا وسى ماسەلە بويىنشا بارماقپىز. امەريكادا جاقسى پروموۋتەرلىك كومپانيالار مەنىمەن جۇمىس جاساۋعا ءوتىنىش ءبىلدىرىپ جاتىر، بىراق مەن ءوز ەلىمنىڭ كلۋبىنىڭ اتىنان شىققاندى قالايمىن.
— اقش-تاعى ءبىر كۇنىڭىز قالاي وتەدى؟
— تاڭعى ساعات 4:30-دان باستاپ 7:00-گە دەيىن تاڭعى جاتتىعۋ جاسايمىن. نەگىزى ۋاقىتتىڭ كوبى جاتتىعۋمەن وتەدى. قازىر وتباسىم قاسىمدا. بوس ۋاقىتتا بالالارىمنىڭ قاسىندا بولامىن.
— بالالارىڭىز بەن جارىڭىز اقش-قا ۇيرەندى مە؟
— ولار اقش-تا مەن ءۇشىن تۇرىپ جاتىر. ولاردىڭ كوز الدىمدا جۇرگەنى جاقسى. كوڭىلىم توق بولادى. باسىندا اۋا رايىنا ءسال ۇيرەنە الماي ءجۇردى. قازىر سول جەردىڭ تۇرعىنى سياقتى وزدەرىن جايلى سەزىنەدى.
— ماياميدە دوستىرىڭىز بار ما؟ قوناققا بارىپ تۇراسىزدار ما؟!
— پروموۋتەرىمنىڭ وتباسىمەن ارالاسامىز. ولارمەن كورشى تۇرامىز. بىراق ەلدەگىدەي ەمەس. ول جاقتا قازاق جوق. ەت جەمەيسىز، ءشاي ىشپەيسىز دەگەندەي(كۇلىپ).
— ءسىزدىڭ پروماۋتەرىڭىز نەلسون اعىلشىنشا سويلەسەدى، ءسىز قازاقشا سويلەيسىز. ءبىر-ءبىرىڭىزدى قالاي تۇسىنەسىزدەر؟ الدە اقش-تا ءجۇرىپ اعىلشىنشا ۇيرەنىپ الدىڭىز با؟
— نەلسونمەن «استانا ارلاندارىندا» جۇرگەندە تانىسقانمىن. قازىر ءبىر-ءبىرىمىزدى 100 پايىز تۇسىنبەسەك تە 80 پايىز تۇسىنەمىز. بوس ۋاقىتىمدا اعىلشىن ءتىلىن ۇيرەنىپ ءجۇرمىن. بۇدان كەيىن جەكپە-جەكتەن سوڭ اعىلشىنشا سۇراقتارعا اعىلشىنشا جاۋاپ بەرۋ كەرەك بولادى.
— ماياميدە قانشالىقتى تانىمالسىز؟
— قاتتى تانىمالمىن دەپ ايتا المايمىن. كاسىپقوي بوكستا ەندى كورىنىپ ءجۇرمىن. ءالى ءبىراز ۋاقىت كەرەك.
— قاي بوكسشىمەن جۇدىرىقتاسۋدى ارماندايسىز؟
— مەنىڭ سالماعىمدا چەمپيوندار كوپ. مەن سول مىقتىلارمەن عانا شىققىم كەلەدى. مىقتىمەن شىقساڭ تاجىريبەڭ دە ارتادى. مىقتىمەن شىقساڭ مىقتى بولاسىڭ. مەيۆەزەر، پاكياو، كوتتولارمەن جۇدىرىقتاسسام دەيمىن.
— ەلدە قانشا ۋاقىت بولاسىز؟
— 2 اپتاداي وسىندا بولامىن. كوپ ۋاقىت جۇرە المايمىن. ويتكەنى جاتتىعۋىم قالىپ بارادى. الدا جارىس بار.
— www.kanatislam.com دەپ جەكە سايتىڭىز اشىلعالى جاتىر ەكەن. وسى تۋرالى دا ايتا كەتسەڭىز.
— وتە قۋانىشتىمىن. قازاق: «ءوزىڭدى ءوزىڭ سىيلاساڭ جات جانىنان تۇڭىلەر» — دەيدى عوي. «وسەر ەلدىڭ بالاسى ءبىرىن-ءبىرى باتىر» دەيدى دەگەن ءسوز دە بار. ءوز ءوزىمىزدى قولداماساق، ءبىزدى كىم كوتەرمەلەيدى. مەن تەك قازاققا عانا كەرەكپىن. مەن امەريكالىقتارعا قىزىق ەمەسپىن. مەنى سىيلىپ سايت اشىپ جاتقان جىگىتتەرگە العىستان باسقا ايتارىم جوق.
— ايتپاقشى، اعا بۇگىن تۋىلعان كۇنىڭىز عوي. ءسال بولماعاندا قۇتتىقتاۋدى ۇمىتىپ كەتە جازداپپىن. اللا ءومىرىڭىزدى بەرەكەلى ەتسىن. تەك جەڭىسىڭىزدىڭ كۋاسى بولىپ جۇرە بەرەيىك. قازاق ەلى ءسىزدى ماقتان تۇتادى. سىزبەن ماقتانادى. الەمگە قازاق اتىن شىعارا بەرىڭىز. قازاق جاستارى عانا ەمەس، الەم جاستارى دا سىزگە ەلىكتەپ ءوسسىن.
— اۋمين، ايتقانىڭىز كەلسىن! راحمەت، سىزگە دە تەك جاقسىلىقتار تىلەيمىن.
kanatislam.com
پىكىر قالدىرۋ