جاقسىلىق ۇشكەمپىروۆ: «15 جىل بويى ءبىر ءتۇيىر نان جەگەن جوقپىن»
kerey.kz
«قازاقستان سپورت سالاسىنان كوشتىڭ باسىندا بولۋى كەرەك». بۇگىن وڭتۇستىك قازاقستان مەملەكەتتىك پەداگوگيكالىق ينستيتۋتىنىڭ ستۋدەنتتەرىمەن كەزدەسكەن حالىقارالىق دارەجەدەگى سپورت شەبەرى جاقسىلىق ۇشكەمپىروۆ وسىلاي دەدى.
سپورت ارداگەرىنىڭ ايتۋىنشا، 30 جاستان اسقان ادام دا الەمدى مويىنداتۋعا قاۋقارلى. سوندىقتان دايىندىق-ەڭبەكتى قالت جىبەرمەۋ قاجەت. گرەك-ريم كۇرەسىنەن قازاقستاننان شىققان تۇڭعىش وليمپيادا چەمپيونى ستۋدەنتتەر الدىندا قازىر دە سپورتتان قول ۇزبەگەنىن ايتتى.
قازىرگى تاڭدا جاقسىلىق اعا شاكىرت تاربيەلەپ، سپورت سالاسىنىڭ دامۋىنا سەپ بولۋدا. الەم چەمپيونى ستۋدەنتتەردىڭ قويعان ساۋالدارىنا ىجداحاتپەن جاۋاپ بەردى. ماقساتىنا جەتۋى ءۇشىن ءتۇرلى تاۋەكەلدەرگە دە بارعانىن ايتتى.
جاقسىلىق ۇشكەمپىروۆ، قر ەڭبەگى سىڭگەن سپورت شەبەرى، وليمپيادا ويىندارىنىڭ چەمپيونى: «ءوزىم كەزىندە اش ءجۇرىپ كۇرەسكەن كەزىم بولدى. مەن تاماقتىڭ ءدامىن عانا ءبىلىپ ءجۇردىم. 15 جىل بويى نان جەگەن جوقپىن، تەك وزگە تاماقتاردى تۇتىندىم. مۇنىڭ بارلىعى سەمىرىپ كەتپەۋىم ءۇشىن، سالماعىمدى تۇراقتى ۇستاپ تۇرۋ ءۇشىن جاسالدى. ال كەڭەس وداعى زامانىندا ءسال عانا سالماعىڭ اسىپ كەتسە، ءبىتتى، سايىستارعا قاتىستىرمايدى. وزگە دە ۇمىتكەرلەر تولىپ جاتىر، «مەن چەمپيون بولامىن! جوق، مەن چەمپيون بولامىن!» دەپ وزگە دە وداقتاس رەسپۋبليكانىڭ جىگىتتەرى تالاسقا تۇسەتىن. سول باسەكەلەستىكتى بولدىرماس ءۇشىن، ءوزىم جەڭىمپاز بولۋ ءۇشىن وسىنداي تاۋەكەلدەرگە باردىم. قازىر مۇنى ايتۋعا وڭاي، بىراق ول كەزدە بۇل مەن ءۇشىن ۇلكەن ماسەلە بولدى. مەن جاعدايدى تەك جەتىستىككە جەتۋ ارقىلى جەڭىلدەتىپ وتىردىم».
قازاقستانعا ەڭبەگى سىڭگەن سپورت شەبەرى قازىر كاسىپكەرلىك سالاعا دە بەت بۇرىپتى. ءىرى قارا مال شارۋاشىلىعىنا دەن قويعان. سپورت شەبەرى ءوزىنىڭ بۇل ءىسى اتا كاسىپتى جالعاۋ عانا ەمەس، قوعامدا جۇمىسسىزداردىڭ قاتارىن دا ازايتۋ ەكەنىن ايتادى.
كەزدەسۋ سوڭىندا ستۋدەنتتەر سپورت ساڭلاعىنا ارناعان ولەڭدەرىن وقىپ، پاتريوتتىق ءان-تارتۋلارىن شىرقادى.
kz.otyrar.kz
پىكىر قالدىرۋ