ورالمانداردىڭ كوپشىلىگى – 61,5% وزبەكستاننان، 14,3% – قىتايدان، 9,3% – موڭعوليادان، 6,8% – تۇركىمەنستاننان، 4,6% – رەسەيدەن، 3,5% – وزگە ەلدەردەن كەلگەندەر.

ولاردىڭ باسىم بولىگى – 21,2% وڭتۇستىك قازاقستان وبلىسىنا، 16,3% – الماتى وبلىسىنا، 13% – ماڭعىستاۋ وبلىسىنا، 9,4% – جامبىل وبلىسىنا، 40,1% – وزگە وڭىرلەرگە ورنالاستى.

ەلگە كەلگەندەردىڭ جالپى سانىنىڭ 55,6% – ەڭبەككە قابىلەتتى جاستاعى تۇلعالار، 39,9 % – 18 جاسقا دەيىنگى بالالار، 4,5 % – زەينەتكەرلەر قۇرايدى.

ەڭبەككە قابىلەتتى جاستاعى ورالمانداردىڭ كوپشىلىگى (60,8%) جالپى ورتا ءبىلىم، 20,5% – ارناۋلى ورتا ءبىلىم، 8,7% – جوعارى ءبىلىم السا، ءبىلىمى جوق ورالماندار سانى – 9,9%.

2015 جىلعى 1 توقساندا ەلىمىزگە 380 وتباسى نەمەسە 1026 ەتنيكالىق قازاق كەلىپ، ورالمان مارتەبەسىنە يە بولدى.

جاڭادان كەلگەندەردىڭ كوپشىلىگى قوستاناي وبلىسىنا (233 ادام), جامبىل وبلىسىنا (199 ادام), وڭتۇستىك قازاقستان وبلىسىنا (124 ادام), ماڭعىستاۋ وبلىسىنا (159 ادام), اقمولا وبلىسىنا (68 ادام), قاراعاندى وبلىسىنا (54 ادام) جانە وزگە دە وڭىرلەرگە ورنالاستى.

ەسكە سالا كەتەيىك، قر ۇكىمەتىنىڭ 2014 جىلعى 8 شىلدەدەگى № 783 قاۋلىسىنا سايكەس ورالمانداردى ورنالاستىراتىن وڭىرلەر انىقتالدى، ول تىزىمگە استانا جانە الماتى قالالارى كىرمەيدى.

ورالمان مارتەبەسىن العاندار «حالىقتىڭ كوشى-قونى تۋرالى» قر زاڭىندا قاراستىرىلعان بارلىق الەۋمەتتىك جەڭىلدىكتەردى پايدالانا الادى.

بەيىمدەۋ جانە ىقپالداستىرۋ قىزمەتتەرىن كورسەتۋ ءۇشىن اقتاۋ، قاراعاندى جانە شىمكەنت قالالارىندا، سونداي-اق، وڭتۇستىك قازاقستان وبلىسىنىڭ اقسۋكەنت اۋىلىندا ورالمانداردى بەيىمدەۋ جانە ىقپالداستىرۋ ورتالىقتارى قىزمەت ەتەدى. ورتالىقتاردا ىسكە اسىرىلاتىن بەيىمدەۋ باعدارلامالارى قۇقىقتىق ماسەلەلەر بويىنشا كەڭەس بەرۋ، مەملەكەتتىك ءتىلدى جانە قالاۋلارىنا قاراي ورىس ءتىلىن وقىتۋ، كاسىبي دايارلاۋ، قايتا دايارلاۋ جانە بىلىكتىلىگىن ارتتىرۋ سياقتى قىزمەتتەر كورسەتەدى.