سۋرەتتى عابيت ماداليەۆ تۇسىرگەن

بۇگىن، 31 مامىردا، ساياسي قۋعىن-سۇرگىن قۇرباندارىن ەسكە الۋ كۇنى، استانادا كورنەكتى عالىم، قازاقتان شىققان تۇڭعىش تاريح عىلىمىنىڭ دوكتورى «XIX عاسىردىڭ 20-40 جىلدارىنداعى قازاقستان» اتتى ەڭبەكتىڭ اۆتورى، قازاق تاريحىنىڭ جاناشىرى، ءبىرتۋار تۇلعا ەرمۇحان بەكماحانوۆتىڭ تاعدىرىن باياندايتىن «امانات» اتتى تولىقمەتراجدى ءفيلمىنىڭ تۇساۋكەسەرى ءوتتى، دەپ حابارلايدى BNews.kz ءتىلشىسى. ءفيلمنىڭ جەلىسى بىرنەشە ۋاقىت ارالىعىن قامتيدى: XIX عاسىردىڭ ورتا تۇسى كەنەسارى حاننىڭ تاۋەلسىزدىك جولىنداعى كۇرەسى، XX عاسىردىڭ ورتاسى جانە 60-جىلداردىڭ سوڭى. تاريحي تۋىندىدا قازاقتىڭ سوڭعى حانى كەنەسارى قاسىموۆ باستاعان ۇلت-ازاتتىق كوتەرىلىسكە ارنالعان زەرتتەۋلەرى ءۇشىن 25 جىلعا باس بوستاندىعىنان ايىرىلعان توتاليتارلىق جۇيەنىڭ قۇربانى، الاش ارىسى ەرمۇحان بەحماحانوۆتىڭ تاعدىرى باياندالادى.

ءفيلمنىڭ رەجيسسەرى جانە ستسەناري اۆتورى قازاقستاننىڭ ەڭبەك سىڭىرگەن قايراتكەرى، قر مەملەكەتتىك سىيلىعىنىڭ لاۋرەاتى، فرانتسيا كينواكادەمياسىنىڭ جورج سادۋل اتىنداعى سىيلىعىنىڭ لاۋرەاتى ساتىبالدى نارىمبەتوۆ.

فيلمدە باستى كەيىپكەر ەرمۇحان بەكماحانوۆتىڭ ءرولىن بەرىك ايتجانوۆ، حاليما بەحماحانوۆانىڭ ءرولىن قارلىعاش مۇحامەدجانوۆا سومدايدى. كەنەسارى حان رولىندە سانجار ماديەۆ وينايدى. سونداي-اق، فيلمگە ءازيز بەيشەناليەۆ، قۇرالاي اناربەكوۆا، ەردەن تەلەمىسوۆ، ازات نۇرتاەۆ، شىنار جانىسبەكوۆا، اجار ىبىراەۆا، ارتەم ميتنەۆ قاتىسادى.

ءفيلمنىڭ ءتۇسىرىلىمى الماتى قالاسى جانە الماتى وبلىسىندا جۇرگىزىلدى. سول زاماننىڭ ءبىتىم-بولمىسىن دالمە-ءدال اشىپ كورسەتۋ ءۇشىن شىعارماشىلىق توپ ءبىراز جۇمىستار اتقارعان. اتاپ ايتساق، سول ءداۋىردى ءوز كوزىمەن كورگەن تۇلعالارمەن كەڭەسە وتىرىپ ءىس جۇرگىزۋ، زامانعا ساي كوستيۋمدەر تىگىپ، ينتەرەر مەن دەكوراتسيانى جاساۋ ءتارىزدى جۇمىستار جاسالعان. ءفيلمنىڭ قويۋشى سۋرەتشىسى مۇحتار مىرزاكەەۆ، پروديۋسەرى ارمان اسەنوۆ.

ش.ايمانوۆ اتىنداعى «قازاقفيلم» كينوستۋدياسىنىڭ كوپتەن كۇتكەن ءارى ماڭىزدى جوباسىنىڭ تۇساۋكەسەرىنە ەلىمىزدىڭ بەلگىلى مەملەكەت، قوعام جانە مادەنيەت قايراتكەرلەرى، ەرماحان بەكماحانوۆتىڭ تۋىستارى مەن جاقىندارى، سونداي-اق ءفيلمنىڭ شىعارماشىلىق توبى قاتىستى.

bnews.kz