suretti Ğabit MADALIEV tüsirgen

Bügin, 31 mamırda, sayasi quğın-sürgin qwrbandarın eske alu küni, Astanada körnekti ğalım, qazaqtan şıqqan twñğış tarih ğılımınıñ doktorı «XIX ğasırdıñ 20-40 jıldarındağı Qazaqstan» attı eñbektiñ avtorı, qazaq tarihınıñ janaşırı, birtuar twlğa Ermwhan Bekmahanovtıñ tağdırın bayandaytın «Amanat» attı tolıqmetrajdı fil'miniñ twsaukeseri ötti, dep habarlaydı BNews.kz tilşisi. Fil'mniñ jelisi birneşe uaqıt aralığın qamtidı: XIX ğasırdıñ orta twsı Kenesarı hannıñ täuelsizdik jolındağı küresi, XX ğasırdıñ ortası jäne 60-jıldardıñ soñı. Tarihi tuındıda qazaqtıñ soñğı hanı Kenesarı Qasımov bastağan wlt-azattıq köteriliske arnalğan zertteuleri üşin 25 jılğa bas bostandığınan ayırılğan totalitarlıq jüyeniñ qwrbanı, alaş arısı Ermwhan Behmahanovtıñ tağdırı bayandaladı.

Fil'mniñ rejisseri jäne scenariy avtorı Qazaqstannıñ eñbek siñirgen qayratkeri, QR Memlekettik sıylığınıñ laureatı, Franciya kinoakademiyasınıñ Jorj Sadul' atındağı sıylığınıñ laureatı Satıbaldı Narımbetov.

Fil'mde bastı keyipker Ermwhan Bekmahanovtıñ rölin Berik Aytjanov, Halima Behmahanovanıñ rölin Qarlığaş Mwhamedjanova somdaydı. Kenesarı han rölinde Sanjar Mädiev oynaydı. Sonday-aq, fil'mge Äziz Beyşenäliev, Qwralay Anarbekova, Erden Telemisov, Azat Nwrtaev, Şınar Janısbekova, Ajar Ibıraeva, Artem Mitnev qatısadı.

Fil'mniñ tüsirilimi Almatı qalası jäne Almatı oblısında jürgizildi. Sol zamannıñ bitim-bolmısın dälme-däl aşıp körsetu üşin şığarmaşılıq top biraz jwmıstar atqarğan. Atap aytsaq, sol däuirdi öz közimen körgen twlğalarmen keñese otırıp is jürgizu, zamanğa say kostyumder tigip, inter'er men dekoraciyanı jasau tärizdi jwmıstar jasalğan. Fil'mniñ qoyuşı suretşisi Mwhtar Mırzakeev, prodyuseri Arman Äsenov.

Ş.Aymanov atındağı «Qazaqfil'm» kinostudiyasınıñ köpten kütken äri mañızdı jobasınıñ twsaukeserine elimizdiñ belgili memleket, qoğam jäne mädeniet qayratkerleri, Ermahan Bekmahanovtıñ tuıstarı men jaqındarı, sonday-aq fil'mniñ şığarmaşılıq tobı qatıstı.

bnews.kz