بالالاردى قورعاۋ كۇنى وسكەمەن حالقى ءۇشىن ءىرى مەرەكەلەردەن كەم وتكەن جوق. دراما تەاتر الدىندا قالانىڭ بارلىق مەكتەپتەرىنىڭ وقۋشىلارى جۇرتشىلىققا كوتەرىڭكى كوڭىل-كۇي سىيلاپ، ءان مەن ءبيدىڭ كوركىن قىزدىردى. قالا حالقىن قاتتى تامساندىرعانى – ءبىر مەزەتتە 300 وسكەمەندىك جاس ونەرپازدىڭ قۇرمانعازى كۇيلەرىن ورىنداۋى. تەاتر اكتەرلارىنىڭ بالالارعا دەگەن سىيى دا ەرەكشە. مادەني ورتالىقتىڭ ۇلكەن زالىندا تەاتردىڭ قازاق جانە جانە ورىس ترۋپپاسى «ەكى دوس نەمەسە دەلدال قارعا»، «كىشكەنتاي مۋكتىڭ كىشكەنتاي عانا اڭگىمەسى» سپەكتاكلدەرىن قويدى. سپەكتاكلدى تەاترعا كەلگەن جاس مەيماندارمەن بىرگە وبلىس اكىمى دانيال احمەتوۆ تاماشالادى.
ايماق باسشىسى بۇدان كەيىن وسكەمەندەگى الەۋمەتتىك-مەديتسينالىق مەكەمەدەگى بالالاردى ءتول مەرەكەسىمەن قۇتتىقتادى. اتالمىش مەكەمە 1 ماۋسىمعا دالدەپ، مۇمكىندىگى شەكتەۋلى بالالارعا ارنايى جاز ايلارىندا تاۋلىك بويى جۇمىس ىستەيتىن وڭالتۋ لاگەرىنىڭ اشىلۋىن مەرەكەلىك شارامەن اتاپ ءوتتى. لاگەرگە 16 مۇمكىندىگى شەكتەۋلى بالا تىركەلگەن. ءوڭىر باسشىسى مەكەمە بالالارىنىڭ ونەرىن تاماشالاپ، ولاردى مەيرامىمەن قۇتتىقتادى. «قادىرمەندى بالالار. بۇگىنگى مەرەكەلەرىڭمەن شىن جۇرەكتەن قۇتتىقتايمىن. ءدال بۇگىنگىدەي قۋانىش كۇلكىسى ۇيىرىلگەن جۇزدەرىڭمەن اتا-انالارىڭدى شاتتىققا بولەپ جۇرە بەرىڭدەر»، – دەدى د.احمەتوۆ.
ايماق باسشىسىنىڭ نازارىنان وبلىستىق انا مەن بالا ورتالىعى دا تىس قالعان جوق. د.احمەتوۆ بالا ءسۇيىپ، باقىتقا بولەنىپ وتىرعان وتباسىلارعا گۇل شوقتارى مەن سىيلىقتار تابىس ەتتى. ورتالىق ديرەكتورى رايا راحيموۆامەن بىرگە، انا مەن بالاعا ساپالى قىزمەت كورسەتۋ جۇمىستارىن كۇشەيتۋ بويىنشا وي الماسقان ايماق باسشىسى كەلەشەكتە جەرگىلىكتى دارىگەرلەردىڭ ەۋروپا ەلدەرى مەن وڭتۇستىك كورەيادا بىلىكتىلىگىن ارتتىرۋ ءۇشىن وبلىستىق بيۋدجەتتەن قاجەتتى قاراجات بولىنەتىنىن مالىمدەدى.