كوپتەگەن الدىڭعى قاتارلى مەملەكەتتەردە وقۋشىنىڭ مەكتەپ بىتىرۋىنە 2-3 جىل قالعاندا جالپى پاندەردى وقىتۋ توقتايدى دا، ول ءوزى قالاعان ماماندىعىنا قاجەت 3-4 ءپاندى عانا تەرەڭدەتىپ وقي باستايدى. ۋنيۆەرسيتەتكە تۇسەردە سول 3-4 ءپان بويىنشا تاپسىرعان سوڭعى ەمتيحاندارىنىڭ ناتيجەسى عانا اتتەستاتىندا كورسەتىلەدى. مۇعالىمدەرى مەن اتا-انالارى وقۋشى ەمتيحاندا قانداي باعا السا دا، تۇسىنە قارايدى. ويتكەنى ومىردە ءارتۇرلى جاعداي بولادى، مىقتى وقۋشى پسيحولوگيالىق تولقۋعا ۇشىراپ السىزدەۋ باعا الۋى مۇمكىن، سىناق ساتتەرىندە ءوزىن سەرگەك ۇستايتىن ورتاشا وقۋشى، كەرىسىنشە، جاقسى ناتيجەگە قول جەتكىزۋى مۇمكىن. مۇنى ءبارى جاقسى تۇسىنگەندىكتەن “ناشار باعا” ءۇشىن وقۋشىنى دا، اتا-انانى دا، مۇعالىمدى دە ەشكىم جازعىرمايدى. جالپى ءبىلىم مينيسترلىگىنىڭ ەمتيحان ناتيجەسىندە شاتاعى جوق، جالپى ترەندتەردى عانا باقىلاپ زەرتتەپ وتىرادى. وقۋشىلار سوڭعى ەمتيحاندا ءبىر-ءبىرىنىڭ قانداي باعا العانىن بىلمەيدى دە، ناتيجە اركىمگە جەكە حابارلانادى. ويتكەنى ەمتيحان باعاسى – دەنساۋلىق جايى سياقتى قۇپيا جەكە باس مالىمەتى بولىپ سانالادى. ال قۇجات قابىلداعاندا ۋنيۆەرسيتەتتەر تەك سوڭعى ەمتيحاننىڭ ناتيجەسىنە قارامايدى، وقۋشىنىڭ شىعارماشىلىق الەۋەتىن جەكە تەكسەرىپ، ونىمەن سۇحبات وتكىزەدى. سولايشا باتىستاعى وقۋشىلاردىڭ باسىم بولىگى وزدەرى قالاعان وقۋعا ءتۇسىپ جاتادى.

امال نە، بۇكىل پوست-سوۆەتتىك كەڭىستىكتە مەكتەپ ءبىتىرۋ ەمتيحاندارى ۇلكەن ءبىر ساياسي ناۋقانعا اينالعان. سول ناۋقاننىڭ تالاپتارىنا لايىق ناتيجە كورسەتە الماعاندارىڭ ءۇشىن سەندەر كىنالى ەمەسسىڭدەر. ەگەر بىلمەككە شىن تالاپ قىلعان جاس بولساڭدار، ءالى-اق سۇيگەن سالالارىڭ بويىنشا ماڭدايى جارقىراعان مامان بولىپ شىعاسىڭدار. جاسىماڭدار، كەرىسىنشە، جىگەرلەنە تۇسىڭدەر!

عالىم بوقاشتىڭ facebook پاراۇشاسىنان الىندى