وزبەكتىڭ شەكاراشىسى قازاقتى اتىپ ءولتىردى دەگەن سۋىت حابار ءتۇستى
وزبەك وعىنا ۇشقان قازاقتىڭ جەتى بالاسى جەتىم قالدى
28 ماۋسىم كۇنى، كەشكى 9 جارىم شاماسىندا قازاق-وزبەك شەكاراسىندا قازاقستان ازاماتىنا وق اتىلدى. شەكارا ماڭىندا بالىق اۋلاپ جۇرگەن 37 جاستاعى ءۋاليحان احمەتوۆتى كورشى مەملەكەتتىڭ شەكاراشىلارى اۆتوماتتان وق جاۋدىرىپ، ءولىم قۇشتىردى. بۇنى وزبەك شەكاراشىلارى «بالىقشىلار شەكارانى كەستى» دەپ تۇسىندىرەدى.
مارقۇممەن بىرگە بالىق اۋلاۋعا بارعان، وقيعا ورنىنان ءتىرى قالعان كۋاگەر، مارقۇمنىڭ دوسى جەڭىسبەك بەكەشوۆ وزبەك شەكاراسى تارابىنا وتپەگەندەرىن ايتادى. وقيعا كۋاگەرى وزبەك شەكاراشىلارى ولاردى قاراڭعىدا بايقاپ، جارىق تۇسىرگەندە جاعالاۋعا قاراي جۇزگەندەرىن، وسى ساتتە ون شاقتى اۆتوماتتىڭ وق جاۋعانىن جەتكىزدى. احمەتوۆتىڭ دوسى العاشقىدا دوسىنىڭ ءولىپ كەتكەنىن بىلمەي جاعالاۋعا الىپ شىققان.
تەلەارنالاردىڭ حابارلاۋىنشا، وڭتۇستىك ءوڭىردىڭ شەكارا شەندىلەرى وسى ءىستىڭ انىعىن تەكسەرۋگە كىرىسىپ كەتتى. ال، مارقۇمنىڭ ەگىلە جىلاعان اناسى دانەگۇل وق اتقاندارعا جازا سۇراۋدا.
ازىرگە وزبەكستان جاعى رەسمي تۇردە وق اتۋ دەرەگىن مويىنداعان. ولار شەكارا اسقاندارعا توسقاۋىل رەتىندە وق اتتىق دەپ اقتالادى. ال قازاقستاندىق شەكارا قىزمەتىنىڭ ءباسپاسوز ورتالىعى بالىق اۋلاعان جەر رۇقسات ەتىلگەن ايماققا كىرەدى دەيدى. مارقۇمنىڭ ارتىندا 7 بالا جەتىم قالدى.
“ەندى وزبەكستان جاعىمەن كەزدەسۋ بولدى. وزبەكستان جاعىنىڭ ايتۋىنا قاراعاندا، بۇلار شەكارادان ءوتىپ كەتكەن دەيدى. ال ءتىرى قالعان جىگىتتىڭ سوزىنشە، ول وزبەكستان جاعىندا بولماعان. قازاقستان شەكارا سىزىعىمەن بالىق اۋلاعان”، – دەيدى ۇقك شەكارا قىزمەتى ءباسپاسوز قىزمەتىنىڭ جەتەكشىسى مۇحتار اناربەك.
ەستەرىڭىزدە بولسا، بۇل ەكى ەل شەكاراسىنداعى العاشقى كىسى ءولىم وقيعاسى ەمەس. 2002-2006 جىلدار اراسىندا 10 وقيعا تىركەلىپ، التى ازامات جاراقات الىپ، ءبىر ادام ولگەن. مىسالى، 2003 جىلى قىركۇيەكتە شەكاراشىلار شاتىسىپ قالعان. 2010 جىلى ماۋسىم ايىندا قازاق-وزبەك شەكاراسىندا بولعان اتىس سالدارىنان ەكى ازامات جارالانعان. 2012 جىلى وڭتۇستىك قازاقستان وبلىسى سارىاعاش اۋدانىنداعى «ىنتىماق» شەكارا بەكەتىنە بەلگىسىز بىرەۋلەر شابۋىل جاساعان.
2012 جىلى مامىردا بولعان ەڭ ۇلكەن شەكارالىق وقيعا «ارقانكەرگەن» تراگەدياسىنان كەيىن شەكارالىق باقىلاۋلار مەن كۇزەت قىراعىلىعى كۇشەيتىلگەن ەدى. سولاي بولسا دا قازاقستان شەكاراسىنىڭ داۋعا ىلىكپەي امان وتكىزگەن جىلى جوق. جىل سايىن تىم بولماسا شەكارالىق بەكەتتەن اسكەر قاشۋ جاعدايلارى تىركەلىپ جاتادى. ورتكە ورانىپ كەتەتىن بەكەتتەر دە از ەمەس. شەكارالىق ءتارتىپ تەمىردەي بولعاندا ايدىڭ-كۇننىڭ امانىندا اجال قۇشقان ارىستاي ازاماتتارىمىز ورتامىزدا جۇرەر ەدى. جەتى جەتىمەكتىڭ وبالى وزبەكتىڭ وعىندا عانا ەمەس، ءوزىمىزدىڭ بوستىعىمىزدا دا بولار.
Abai.kz
-بۇگىن وزبەكتىڭ شەكاراشىسى قازاقتى اتىپ ءولتىردى دەگەن سۋىت حابار ءتۇستى. قانداسىمىزدىڭ ارۋاعى يماندى بولعاي!
مەنىڭ ايتارىم، بۇل ۇلكەن پروبلەمانىڭ باسى عانا، اعايىن.
ماسەلە مىنادا. وزبەكستانداعى جانە تۇركمەنستانداعى شەقارامىزدا ءبىزدىڭ اسكەرلەرىمىز جوق. بۇعان مەنىڭ 2012 ج قازاقستاندى ارالاعاندا كوزىم جەتتى. احۋال قازىر دە وزگەرگەن جوق دەپ ويلايمىن.
مىسالى، اقتوبە وبلىسى شالقاردىڭ ءارى جاعىندا بوزوي دەگەن اۋىلىنان اقتاۋداعى بەينەۋگە (450 كم) تىكەلەي كولىكپەن ءجۇرۋ قاۋىپتى. وزبەك شەقاراشىلار ءبىزدىڭ تەرريتوريامىزعا كىرىپ ء(وزىمىزدىڭ اسكەرلەرىمىز جوق بولعانسوڭ) ادامدى قاماۋعا الادى ەكەن. زيندانعا تىعىپ تاستايدى، شەقارانى بۇزدى دەپ. سوسىن قالىن اقشاعا عانا بوساتىپ جىبەرەدى. اقشاسى تابىلماسا ءتىپتى جامان، ايتپاي-اق قويايىن. سوندىقتان قزىلوردادان ماڭعىستاۋعا بارۋ ءۇشىن اناۋ اقتوبە ارقىلى بارۋعا ءماجبۇرسىڭ.
ماڭعىستاۋداعى بەينەۋ مەن جاڭاوزەن اراسىنداعى تىكەلەي جولى ءدال سونداي، جەرگىلىكتى جۇرت تۇركمەن شەقاراشىلاردان قورقادى.
قازىر مىنە قازاقتى وزبەك شەقاراشىلار اتىپ ءولتىردى. ال قازاق وزبەكتى اتىپ ءولتىردى دەگەن ءبىر دە ءبىر حابار ەستىدەڭىزدەر مە؟
ۇقك تالاپ – تۇگەل شەقارامىزدىڭ بويىندا قازاق ەلىنىڭ اسكەرلەرى تۇرۋ مىندەت!
-شەكارادا وزبەك شەكاراشىلارى تاپا-تال تۇستە اتىپ ولتىرگەن قانداسىمىزدىڭ تاعدىرىنا بايلانىستى سىرتقى ىستەر مينيسترلىگى مىنەز تانىتىپ، قاباعىن شىتىپ، ارنايى نارازىلىق نوتا جاساۋىن كۇتىپ وتىرمىن.
وزبەك – دوسىم، بىراق اقيقات قىمباتتىراق. بالىق اۋلاپ وتىرعان ازاماتتى بىردەن اتا سالۋ دەگەن نە سۇمدىق! ەسكەرتۋ دەگەن سياقتى باسقا دا شارالار بار ەمەس پە؟!
facebook پاراقشاسىنان الىندى
پىكىر قالدىرۋ