سەنات توراعاسى قاسىم-جومارت توقاەۆ جوعارى پالاتاعا كەلەتىن زاڭ جوبالارىنا كوڭىلى تولمايدى. توراعا زاڭ قۇجاتىنا جاۋاپتى مينيسترلىكتەر جۇمىسقا ءاتۇستى قارايدى دەپ سىن ايتتى.

سەنات دەپۋتاتتارى وتكەن جىلدىڭ 1 قىركۇيەگىنەن بەرى 113 زاڭ جوباسىن قابىلداپتى. توراعا ۇكىمەتتى جاڭا جۇمىس ماۋسىمىندا قازاقستاننىڭ دسۇ-عا ەنۋىنە قاتىستى قارالاتىن جاڭا زاڭ قۇجاتتارىندا ۇقىپتىراق بولۋعا ۇندەدى دەپ حابارلايدى استانا ارناسى.

“قابىلداناتىن زاڭ جوبالارىنىڭ ساپاسى ءالى دە وزەكتى بولىپ قالۋدا. كەيدە مينيسترلىكتەر زاڭداردىڭ مازمۇندىق جاعىنا ءتيىستى نازار اۋدارماي، اسىعىس دايىنداپ جاتادى. مۇمكىندىكتى پايدالانا وتىرىپ، ۇكىمەتتىڭ نازارىن وسى ماسەلەگە اۋدارعىم كەلەدى. سەبەبى مۇنداي جاعدايلار زاڭناماداعى قايشىلىقتارعا الىپ كەلەتىنى ءسوزسىز”، – دەدى قاسىم-پارلامەنت سەناتىنىڭ توراعاسى جومارت توقاەۆ.

ال سەناتور بىرعانىم ءايتىموۆا ديپلوماتيالىق قىزمەتتەگى شاعىن توپتىڭ زەينەتاقىمەن قامسىزداندىرىلۋىنا كوڭىلى تولمايدى. نەبارى 1250 ادامدى قۇرايتىن توپقا ەڭ تومەنگى بازالىق زەينەتاقى ەسەپتەلەتىنىن العا تارتقان دەپۋتات، ديپلوماتيالىق قىزمەتكەرلەردىڭ ەڭبەگى الەمدىك تاجىريبە بويىنشا ەرەكشە وتەلۋى ءتيىس، دەيدى.

“مىسالى، مەنىڭ زەينەتاقىمدى ەسەپتەگەندە، ول تۋرالى ايتۋعا دا ىڭعايسىز سياقتى، بىراق تا ەندى شىندىقتى ايتۋ كەرەك. تەك قانا 0,25 پايىز قازاقستاندىق اقشامنان ەسەپتەلدى. ەندى اراسىندا باسقا جۇمىستارعا بايلانىستى مەنىڭ زەينەتاقىم ايتەۋىر ورتاڭعى دەڭگەيدە بولىپ شىقتى. ال، ەگەر دە مەن بۇكىل ءومىر بويى ديپلوماتيادا جۇمىس ىستەسەم، وندا مەنىڭ زەينەتاقىم بۇگىنگى تاڭداعى ەسەپ بويىنشا ءتىپتى ەڭ تومەنگى زەينەتاقىعا تەڭەلەدى”، – دەيدى پارلامەنت سەناتىنىڭ دەپۋاتى بىرعانىم ءايتىموۆا.

بىرعانىم ءايتىموۆا ديپلومات جارلارىنىڭ سوڭىنان شەتەل اساتىن ازاماتتارعا دا ەڭ تومەنگى بازالىق زەينەتاقى تاعايىندالۋىنا قارسى. مىسال رەتىندە، ون جىلدان استام سىرتتاعى قىزمەتى ءۇشىن، جولداسىنا ون جىل عانا ەڭبەك ءوتىلى ەسەپتەلىپ، تومەن زەينەتاقى بەلگىلەنگەنىن ايتىپ، دەنساۋلىق ساقتاۋ جانە الەۋمەتتىك دامۋ مينيسترىنە قولقا سالدى.