شىلدە ايىنىڭ 13-نەن 14-نە قاراعان ءتۇنى الماتى قالاسىنىڭ جۇتشىلىعى قاسيەتتى قادىر ءتۇنىن قارسى الدى. الماتى ورتالىق مەشىتىنە جينالعان جۇرت مول بولدى دەپ حابارلادى قمدب ءباسپاسوز قىزمەتىنە سىلتەمە جاساپ inform.kz. NUR.KZ ءتىلشىسى دە قالاداعى مەشىتتەردىڭ ءبىرازىن ارالاپ، “مىڭ ايدان ارتىق ءتۇندى” قارسى الۋعا كەلگەن ادامنىڭ سانىندا شەك بولماعىنىن كورىپ قايتتى.

قادىر ءتۇنىن مەشىتتە وتكىزۋگە كەلگەن جاماعات اللادان وتباسىنىڭ اماندىعى مەن تۋعان-تۋىستىڭ تىنىشتىعىن تىلەدى.

قادىر كەشىندە قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي ەرجان قاجى مالعاجىۇلى الماتى قالاسىنداعى مەشىتتەردى ارالاپ، جاماعاتپەن جۇزدەسىپ، قاسيەتتى قادىر تۇنىمەن قۇتتىقتادى.

سونداي-اق، باس ءمۇفتي “تاۋگۇل-3″ مەشىتىنىڭ جاماعاتى اراسىندا ۇيىمداستىرعان “وزىڭنەن ءوزىڭ ەسەپ ال” اتتى ىزگىلىك بايگەسىنىڭ جەڭىمپازدارىن ماراپاتتادى. جاماعاتتى ىزگى ىستەر جاساۋعا ۇمتىلدىراتىن بايگەنىڭ جەڭىمپازى عابيت ماۋلەنباەۆقا ۇمرا قاجىلىعىنىڭ سەرتيفيكاتىن تابىستادى.

“قادىر ءتۇنى – ەڭ جاقسى ءتۇن. اللا تاعالا ونى بەرەكەلى ەتتى، وندا قۇراندى ءتۇسىرىپ، باسقا تۇندەردەن ەرەكشەلەدى. سونداي-اق، ول ءتۇندى مىڭ ايدان دا ارتىق ەتتى. ال مىڭ اي سەكسەن ءۇش جىلعا تەڭ كەلەدى. پايعامبارىمىز ءبىر حاديسىندە: “اللا تاعالا قادىر ءتۇنىن مەنىڭ ۇممەتىمە سىيلىق ەتىپ بەرگەن. مۇنداي نىعمەت بۇرىنعى ۇممەتكە بۇيىرماعان”، – دەپ ءسىز بەن بىزگە ءسۇيىنشى حابار ايتىپ، شاتتىققا بولەگەن. اللا تاعالا ءبىر اي بويى ۇستاعان ورازالارىمىز بەن قادىر تۇنىندە جاساعان دۇعالارىمىزدى، تىلەكتەرىمىزدى قابىل ەتكەي. ەلىمىز امان، جۇرتىمىز تىنىش بولعاي. ءاربىر وتباسىنا باقىت-بەرەكە تىلەيمىن”، – دەپ باتا جاسادى باس ءمۇفتي ەرجان قاجى مالعاجىۇلى.

ال مەشىتكە عيبادات تىڭداۋعا كەلگەن قاۋىم مەشىت قىزمەتكەرلەرى ايتقان ۋاعىزدى تىڭدادى. سونداي -اق مەشىت قىزمەتكەرلەرى جينالعان جاماعاتقا ادامنىڭ رۋحاني دۇنيەسىن بايىتاتىن ءتۇرلى ءدىني كىتاپتار وقۋ كەرەكتىگىن ايتىپ، ءدىني ساۋاتتىلىعىن ارتتىرۋعا باعىتتالعان بەينەفيلمدەرمەن باعدارلامالار كورسەتتى.

بيىل كۇننىڭ ىستىق مەزگىلىنە تاپ كەلسە دە، ورازانى قينالماي-اق ۇستاعاندارىن ايتقان جاندار قادىر تۇنىندە مەشىتتە باس قوسىپ، ناسيحات تىڭداپ، تىلەك تىلەۋمەن تاڭدى قارسى الدى.

Nur.kz ءتىلشىسى دە قادىر ءتۇنىن جينالعان جاماعاتپەن بىرگە وتكىزگەن ەدى. جينالعاندارعا مەشىت قىزمەتكەرلەرى قادىر ءتۇنىنىڭ ەرەكشەلىگى مەن سول كۇنى دۇعا ەتۋدىڭ ءمانىن، ەرەجەسىن ءتۇسىندىرىپ جاتتى.

“قاسيەتتى تۇندە قالامىزدىڭ حالقى مەشىتتەردە ەمىن-ەركىن كوپشىلىكپەن جاستاردىڭ يماندىلىققا دەگەن بەت بۇرىسى قۋانتادى. بۇل جاراتقاننىڭ ەلىمىزگە بەرگەن ۇلكەن سىيى. جاستار قانداي بولسا، بولاشاعىمىز دا سونداي. قادىر تۇنىندە ۇرپاعىمىزدىڭ يبالى، ىزگى بولۋىن، تۋعان-تۋىستارىمىزدىڭ، وتباسىمىزدىڭ اماندىعىن تىلەپ، اللا تاعالاعا دۇعا جاسادىم”، – دەپ تىلەكتەرىمەن ءبولىستى الماتى قالاسىنىڭ تۇرعىنى دۇيسەنباي مولداباي.