مەملەكەت باسشىسى قازاقستان حالقىن ورازا ايت مەرەكەسىمەن قۇتتىقتادى
kerey.kz
اقوردانىڭ ءباسپاسوز قىزمەتى قازاقستان پرەزيدەنتى نۇرسۇلتان نازارباەۆتىڭ ورازا ايت مەرەكەسىمەن قۇتتىقتاۋىن جاريالادى، دەپ حابارلايدى BAQ.KZ ءتىلشىسى.
قىمباتتى وتانداستار!
بارشا قازاقستاندىقتاردى قاسيەتتى ورازا ايت مەرەكەسىنىڭ باستالۋىمەن شىن جۇرەكتەن قۇتتىقتايمىن!
بۇل مەيرام مۇسىلمان قاۋىمى ءۇشىن ماڭىزدى رامازان ايىنىڭ اياقتالۋىن بىلدىرەدى.
تاتۋلىققا، تىنىشتىققا، قايىرىمدىلىق پەن جاناشىرلىققا ۇندەيتىن يسلام ءدىنىنىڭ رۋحاني قاسيەتى وسى رامازان ايىندا كەڭىنەن كورىنىس تابادى.
وسىناۋ مەيرامنىڭ قۇرمەتى ءۇشىن بارشا الەم مۇسىلماندارى ناسىلىنە، ۇلتىنا قاراماستان جاقىندارىنا قامقورلىق تانىتىپ، مۇمكىندىگىنشە مۇقتاج جاندارعا ماتەريالدىق جانە رۋحاني قولداۋ كورسەتەدى.
قازاقستاندا ءتۇرلى ەتنوستار مەن دىندەر وكىلدەرى دوستىق پەن كەلىسىمنىڭ، جاسامپازدىق پەن بىرلىكتىڭ ۇلگىسىن كورسەتىپ كەلەدى.
بۇل قۇندىلىقتاردى دامىتا وتىرىپ، ءبىز قوعامداعى ۇلتتىق مادەني جانە رۋحاني الۋاندىلىقتى ساقتاۋعا، ازاماتتار اراسىنداعى ءوزارا قۇرمەت پەن سەنىمنىڭ نىعايۋىنا ودان ءارى ىقپال ەتۋىمىز قاجەت.
وسىناۋ قاسيەتتى كۇندە مەن بارشاڭىزعا رۋحاني كەلىسىم، تابىس، زور دەنساۋلىق، باق-بەرەكە تىلەيمىن.
قاسيەتتى ورازا ايت مەرەكەسى قوعامىمىزداعى ءوزارا تۇسىنىستىك پەن دوستىقتى ودان ءارى نىعايتا بەرسىن!
baq.kz
پىكىر قالدىرۋ