مالايزيالىق Boeing-777 لاينەرىنىڭ ۋكراينانىڭ وڭتۇستىك شىعىسىندا اۋە اپاتىنا ۇشىراۋىن تەرگەگەن نيدەرلاند پروكۋرورى فرەد ۆەستەربەكە “رۋسسكايا سلۋجبا بي-بي-سي” باسىلىمىنا بەرگەن سۇحباتىندا تەرگەۋشىلەردىڭ ۇشاقتى دونباسس ايماعىنان ىسكە قوسىلعان “بۋك” جۇيەسىنىڭ اتىپ تۇسىرگەنى تۋرالى بولجامدى شىندىققا جاناسادى دەپ ەسەپتەيتىنىن مالىمدەدى.

“بۇل شىندىققا جاناساتىن جالعىز بولجام، بۇل ءبىزدىڭ تەرگەۋىمىزدىڭ نەگىزگى راستالعان بولجامىمىز. الايدا ءبىز وزگە دە ستسەناريلەردى قاراستىرىپ وتىرمىز. ولاردىڭ ءبىرى “بۋك” زىمىرانىنىڭ وزگە وڭىردەن، وزگە جەردەن ۇشىرىلعانى تۋرالى. سونىمەن قاتار، ۇشاقتى “اۋە-اۋە” كلاسسىنداعى زىمىراننىڭ تەحنيكالىق مۇمكىنشىلىگىن زەرتتەپ جاتىرمىز. بۇل سوت تىڭداۋىندا وزگە بولجامداردىڭ نەگىزسىز ەكەنىن كورسەتۋىمىز ءۇشىن قاجەت”، – دەپ حابارلادى پروكۋرور.

ۆەستەربەكەنىڭ ايتۋىنشا، قايعىلى وقيعانىڭ بولعانىنا ءبىر جىل وتسە دە كۇدىكتىلەردى تەرگەۋ اتاي المايدى. “ارينە، ءبىز كۇدىك كەلتىرىپ وتىرعان ادامدار بار، الايدا تەرگەۋدىڭ قازىرگى كەزەڭى ناقتى كۇدىكتىلەردى انىقتاۋعا مۇمكىندىك بەرمەيدى”، – دەدى ول.

زىمىراندى ۇشىرعان ناقتى ادامدى انىقتاۋ تۋرالى سۇراققا پروكۋرور بىلاي دەپ جاۋاپ بەردى: ء“بىزدىڭ جۇمىسىمىز سول ادامدى تابۋعا باعىتتالعان. بىراق جاۋاپكەرشىلىك ءبىر عانا ادامعا ارتىلمايدى. باسشىلىقتا بۇيرىق بەرگەن ادامدار بار، قولداعاندار بولدى. سول سەبەپتى ءبىز ءبىر ادامدى ەمەس، وسى قايعىلى وقيعاعا جاۋاپتى بارلىق ادامدى ىزدەستىرىپ جاتىرمىز”.

مۇنىمەن قاتار، پروكۋرور تەرگەۋدىڭ شابۋىل جاساۋداعى نيەتتى، ياعني ول قاساقانا جاسالدى ما، الدە كەزدەيسوق جاسالدى ما – وسىنى انىقتاۋعا ارنالىپ وتىرعانىن اتاپ ءوتتى. “وسىنداي كوپ بەيبىت تۇرعىندارى بار ۇشاقتى اتىپ ءتۇسىرۋدىڭ كىمگە قاجەت بولعانىن ەلەستەتۋدىڭ ءوزى قيىن. مۇنىڭ قاساقانا جاسالعانىنا كۇمانىم بار. الايدا قازىر شەشىم جاساۋعا ءالى ەرتە”، – دەدى ۆەستەربەكە.

ۆەستەربەكە تەرگەۋگە رەسەي بيلىگىنىڭ كومەكتەسىپ جاتقانىن حابارلادى. “تەرگەۋدى جۇرگىزىپ جاتقان نەگىزگى ەل بولا وتىرىپ، اقپاراتتىق جانە زاڭگەرلىك كومەككە جۇگىندىك. ەكى اي بۇرىن مەن ماسكەۋگە باردىم، تەرگەۋگە جاۋاپتى رەسەيلىك ارىپتەستەرىممەن كەزدەستىم. ولار وزدەرىندە بار مالىمەتتى ءبولىستى. قازىرگى ۋاقىتتا ءبىز ولاردى قاراپ، ولاردى قالايشا قولدانىپ، ىسكە تارتۋعا بولاتىنىن شەشىپ جاتىرمىز. وندا نە بولعانىن ءتۇسىنىپ قانا قويماي، قالعان نەگىزسىز بولجامداردى ىسىرىپ تاستاۋىمىز كەرەك، سوندىقتان ءبىز وزگە دە بولجامداردى قاراستىرىپ وتىرمىز”، – دەدى ول.

پروكۋروردىڭ ايتۋىنشا، ول مالايزيالىق ۇشاقتىڭ وقيعاسىن تەرگەۋدىڭ جىل سوڭىنا دەيىن اياقتالاتىنىنا ءۇمىت بىلدىرەدى. سول كەزدە تەرگەۋشىلەر اۋە اپاتىنىڭ نەگىزگى سەبەبىن ايتىپ، جاۋاپتى ادامداردىڭ اتى-جوندەرىن اتاۋى مۇمكىن.

ەسكە سالا كەتەيىك، مالايزيالىق Boeing-777 MH17 رەيسىمەن امستەردامنان كۋالا-لۋمپۋرعا ۇشىپ بارا جاتىپ، 2014 جىلدىڭ 17 شىلدەسىندە دونەتسك وبلىسىنىڭ گرابوۆو ەلدى مەكەنىنىڭ ماڭىندا، رەسەيلىك شەكارادان 50 شاقىرىم جەردە اپاتقا ۇشىراعان بولاتىن. لاينەردىڭ بارلىق 283 جولاۋشىسى مەن ەكيپاجدىڭ 15 مۇشەسى قازا بولدى.

tengrinews.kz