بايان-ولگەي ايماعىنىڭ اكىمى دارمەن قۇزىكەيۇلىنىڭ قولداۋىمەن، بايان-ولگەي ايماعى اكىمدىگى مەن موڭعوليا جازۋشىلار وداعىنىڭ قازاق كەڭەسىنىڭ ۇيىمداستىرۋىمەن وتكەن رۋحاني كەشكە اتاجۇرتتا قازاق جىرىنىڭ قۇدىرەتىن اسقاقتاتىپ جۇرگەن ەربولات باياتۇلى، ەربول بەيىلحان، اسكەرحان اقتاي قاتارلى اقىندار، سونداي-اق، بايان-ولگەيدەگى رۋحانيات تىزگىنىن ۇستاعان ادەبيەتشىلەر، عالىمدار مەن ونەر يەلەرى قاتىستى. جىر كەشىن بەلگىلى اقىن، عالىم سۇراعان راحمەتۇلى جۇرگىزدى.

پوەزيا قۇدىرەتى اسقاقتاعان باسقوسۋدا كەش يەلەرى جىرلارىن وقىپ، جينالعان جۇرتتى ولەڭنىڭ سۇلۋ سازىنا بولەدى. بايان-ولگەي توپىراعىندا ءوسىپ كەلە جاتقان جاس اقىندار جىر وقىدى. ءداستۇرلى انشىلەر قوڭىر دومبىرانى كۇمبىرلەتىپ اۋەلەتە ءان سالدى. بۇگىنگى ادەبيەت پەن ونەر، رۋحانياتقا قاتىستى كەلەلى اڭگىمە دە ءوربىدى بۇل باسقوسۋدا. ولگەيلىك اقىندار مەن زيالى قاۋىم، كورەرمەن جۇرتشىلىق اقىندارعا جىلى لەبىزدەر ايتىپ، اق جول تىلەپ، ولەڭ-جىرلارىنا جوعارى باعا بەردى، سىي-سياپات كورسەتتى. كەش سوڭىندا بايان-ولگەي ايماعى اكىمى اپپاراتىنىڭ باسشىسى ت.مانكەي ءسوز الىپ: «قازاق جىرىنا ءوز قولتاڭبالارىن قالدىرىپ، ۇلت رۋحانياتىنىڭ مەرەيىن اسقاقتاتىپ جۇرگەن، بۇگىن تۋعان توپىراعىنا كەلىپ تۋ تىگىپ وتىرعان اقىندار ەربولات باياتۇلى، اسكەرحان اقتاي، ەربول بەيىلحاندى ارقاشان ماقتان ەتەمىز. ءبىز وسىنداي ءدۇلدۇل اقىنداردى تۋعىزعان قاسيەتتى ولكەگە كەلىپ جىر اۋەلەتىپ جاتقاندارىڭىزعا قۋانىشتامىز. سىزدەردەن ءالى دە قۇندى دۇنيەلەر كۇتەمىز،-دەدى. سونداي-اق، اكىمشىلىك وكىلى ءۇش اقىنعا بايان-ولگەي ايماعى اكىمىنىڭ «قۇرمەت حاتىن» جانە سىيلىقتارىن تابىستادى. اقىن ەربولات باياتۇلى بايان-ولگەي ايماعىنىڭ «قۇرمەت كىتابىنا» جازىلىپ، «قۇرمەتتى ازامات» اتاندى. ال، اقىن ەربولات باياتۇلى، ەربول بەيىلحان، اسكەرحان اقتاي قىزىلقايىڭ ولكەسىنىڭ «مارتەبەلى ازاماتى» اتاعىن الدى.