رەسمي مالىمەت بويىنشا، 1991 جىلى 1 جەلتوقساندا العاش رەت بۇكىلحالىقتىق توتە داۋىس بەرۋ جولىمەن وتكەن قازاق سسر-ءى پرەزيدەنتى سايلاۋىنا داۋىس بەرۋ قۇقىعىنا يە رەسپۋبليكا ازاماتتارىنىڭ 88,2 پايىزى قاتىسقان. ولاردىڭ 98,7 پايىزى نازارباەۆقا قولداۋ بىلدىرگەن. سايلاۋدان سوڭ ىلە-شالا سسسر تاراتىلىپ، قازاق سسر-ءى جوعارى كەڭەسى دەپۋتاتتارى ەلدىڭ رەسمي اتاۋىن قازاقستان رەسپۋبليكاسى ەتىپ وزگەرتۋ تۋرالى شەشىم قابىلدادى. نۇرسۇلتان نازارباەۆتىڭ پرەزيدەنت رەتىندە العاشقى انت بەرۋ ءراسىمى 10 جەلتوقساندا الماتىداعى رەسپۋبليكا سارايىندا جوعارى كەڭەس دەپۋتاتتارىنىڭ قاتىسۋىمەن ءوتتى. بۇل راسىمدە اسكەري پاراد پەن كورتەج بولعان جوق.

الماتىداعى العاشقى يناۋگۋراتسيادا اقىن شاكەر ابەنوۆ پرەزيدەنت نۇرسۇلتان نازارباەۆقا باتا بەردى. اقىن باتاسىندا “نۇرسۇلتاننىڭ اتاعى، ابىرويى ءوسىپ، الەمگە تانىمال بولىپ، الەمنىڭ تاريح داپتەرىنە اتى تىركەلسىن. ” دەي كەلە “حالىققا زيان كەلتىرەتىندەردى اياۋسىز جازا بەرىپ، تىيىم سالسىن. الدەقانداي ىستە قاتەلەسسە حالىقتان كەشىرىم سۇراپ، ءوز قاتەسىن ءوزى تۇزەۋ” كەرەكتىگىن ەسكەرتتى. بۇدان كەيىنگى ۇلىقتاۋ راسىمدەرىندە باتا بەرۋ بولعان ەمەس. الماتى. 10 جەلتوقسان 1991 جىلعى سۋرەت.

نۇرسۇلتان نازارباەۆ الماتىدا وتكەن العاشقى انت بەرۋ راسىمىندە. 10 جەلتوقسان 1991 جىل.

1999 جىلى پرەزيدەنت يناۋگۋراتسياسى 20 قاڭتاردا استاناداعى كونگرەسس-حولدا ءوتتى. نۇرسۇلتان نازارباەۆ پرەزيدەنت كەڭسەسىنەن كونگرەسس-حولعا دەيىن جاياۋ ءجۇرىپ باردى. 1999 جىلى 10 قاڭتاردا، مەرزىمىنەن بۇرىن وتكەن قازاقستان پرەزيدەنتى سايلاۋىندا نازارباەۆ، رەسمي مالىمەت بويىنشا، 80 پايىز داۋىس جيناپ، جەڭىسكە جەتكەن.

قازاقستان ورتالىق سايلاۋ كوميسسياسىنىڭ سول كەزدەگى جەتەكشىسى زاعيپا باليەۆا انت بەرۋ راسىمىندە نۇرسۇلتان نازارباەۆقا پرەزيدەنت كۋالىگىن تاپسىرىپ تۇر.  استانا، 20 قاڭتار 1999 جىل.

1999 جىلى نازارباەۆ انت قابىلداۋعا العاش رەت التىن كوللار مەن ارنايى وردەن تاعىپ شىقتى. استانا، 20 قاڭتار 1999 جىل.

2006 جىلى 10 قاڭتاردا وتكەن قازاقستان پرەزيدەنتى سايلاۋىندا، رەسمي مالىمەت بويىنشا، كانديدات نۇرسۇلتان نازارباەۆ داۋىس بەرۋگە قاتىسقان سايلاۋشىلاردىڭ 91,15 پايىزىنىڭ قولداۋىنا يە بولعان. تاعى سايلانعان پرەزيدەنتتى ۇلىقتاۋ ءراسىمى 11 قاڭتاردا استانادا ءوتتى. نازارباەۆ اقورداعا ارنايى كورتەجبەن كەلدى. ونى سىرتتا ارنايى اسكەري جاساق قارسى الدى. ۇلىقتاۋ راسىمىنە قاتىسقان 70 استام ەلدىڭ دەلەگاتتارى اراسىندا ۆلاديمير پۋتين، ۆيكتور يۋششەنكو، قۇرمانبەك باكيەۆ، ستەپان مەسيچ، حاميد كارزاي، ەمومالي راحمون، يسلام كاريموۆ، ميحايل سااكاشۆيلي جانە وزگە تۇلعالار بولعان.

قازاقستاندا 2011 جىلى 3 ساۋىردە وتكەن تاعى ءبىر كەزەكتەن تىس پرەزيدەنت سايلاۋىندا نۇرسۇلتان نازارباەۆتىڭ 95,55 پايىز داۋىسپەن جەڭىسكە جەتكەنى رەسمي حابارلاندى. بەس كۇننەن كەيىن، 8 ساۋىردە ۇلىقتاۋ ءراسىمى ۇيىمداستىرىلدى. ​تورتىنشى يناۋگۋراتسيا وتكەن استاناداعى تاۋەلسىزدىك سارايىنا نازارباەۆ ارنايى كۇزەتى بار كورتەجبەن كەلدى. ول ءجۇرىپ وتكەن جولدىڭ بويىندا استانا تۇرعىندارى قوشەمەت كورسەتىپ تۇردى.

سالتاناتتى شاراعا باتىس ەلدەرىن ايتپاعاندا، كورشىلەس ەلدەردىڭ وزدەرىنەن ەشكىم قاتىسقان جوق. تەك ماسكەۋ قالاسىنىڭ بۇرىنعى مەرى يۋري لۋجكوۆ كەلدى. ​استانا، 8 ءساۋىر 2011 جىل.

نۇرسۇلتان نازارباەۆ قازاقستان پرەزيدەنتى رەتىندە انت بەرىپ تۇر. استانا. 8 ءساۋىر 2011 جىل.

نۇرسۇلتان نازارباەۆ انتتان كەيىن قازاقستان تۋىن ءسۇيىپ جاتقان ءسات. استانا. 8 ءساۋىر 2011 جىل.

نۇرسۇلتان نازارباەۆ انت قابىلداۋ ءراسىمى كەزىندە. استانا. 8 ءساۋىر 2011 جىل.

2015 جىلى 26 ساۋىردە وتكەن جانە ءبىر كەزەكتەن تىس پرەزيدەنت سايلاۋىندا، رەسمي اقپاراتقا سايكەس، سايلاۋشىلاردىڭ 97,75 پايىزى كانديدات نۇرسۇلتان نازارباەۆقا قولداۋ تانىتقان. نازارباەۆ ءۇش كۇننەن كەيىن انت بەرىپ، قىزمەتكە كىرىستى. يناۋگۋراتسيا استاناداعى تاۋەلسىزدىك سارايىندا ءوتتى. شارا وتكەن كۇنى استاناداعى ءبىراز جولدار جابىلىپ، جوعارى سىنىپ وقۋشىلارى ساباقتان بوساتىلدى. وقۋشىلار، ستۋدەنتتەر مەن مەملەكەتتىك قىزمەتكەرلەر تاۋەلسىزدىك سارايى الدىنداعى الاڭعا جينالىپ، نازارباەۆقا قوشەمەت كورسەتتى.

2015 جىلى 29 ساۋىردەگى ۇلىقتاۋ راسىمىنە ۇكىمەت مۇشەلەرى، پارلامەنتتىڭ قوس پالاتاسى – سەنات پەن ءماجىلىس دەپۋتاتتارى، كونستيتۋتسيالىق كەڭەس مۇشەلەرى، جوعارعى سوت سۋديالارى قاتىستى. شەت مەملەكەتتەر باسشىلارى كەلگەن جوق.

انت قابىلداعان سوڭ ورتالىق سايلاۋ كوميسسياسى توراعاسى قۋاندىق تۇرعانقۇلوۆ قىزمەتىنە قايتا سايلانعان نۇرسۇلتان نازارباەۆقا پرەزيدەنت كۋالىگىن تاپسىردى. قازاقستان تاۋەلسىزدىك العالى پرەزيدەنتتى ۇلىقتاۋ راسىمىندە تەك نازارباەۆ قانا انت قابىلداپ كەلەدى.

استاناداعى پرەزيدەنت مۇراجايىنداعى مىنا يناۋگۋراتسيالىق كيىم ارنايى نازارباەۆقا شاقتالىپ تىگىلگەن.

ازات ەۋروپا / ازاتتىق راديوسى