– قازاقستاندا ەكى جىل ءجۇردىم. بىراق ازاماتتىق الۋ مۇمكىن بولمادى. ال لەگيونەر رەتىندە ويناعىم كەلمەدى. سوسىن ەلىمە قايتىپ ورالدىم، – دەدى.

«ارمانى ۇلتتىق قۇراماعا ەنۋ بولاتىن»

مۇراتتىڭ فۋتبولشى بولۋ تالابىن كىشكەنتاي كەزىنەن قولداعان اعاسى تۋنساي ءونال اتا-انالارىنىڭ 28 جىل بۇرىن ستامبۋلدان امستەردامعا قونىس اۋدارعاندارىن ايتادى.

مۇرات ءونالدىڭ اعاسى تۋنساي ءونال.

– مۇرات بەس جاسىندا امستەردامداعى «ۆەسپۋچچي» اۋەسقوي كومانداسىنىڭ فۋتبول كلۋبىنا قابىلداندى. 17 جاسىندا جاستار اراسىندا ۇزدىك شابۋىلشى بولدى. كەيىن باسقا دا كلۋبتاردا وينادى. وسىدان ەكى جىل بۇرىن «قازاقستانعا بار» دەپ جىبەردىك. قازاقستاندا ەكى جىل ءجۇردى، قازاقستان پاسپورتىن الا المادى. ونىڭ ارمانى قازاقستان ۇلتتىق قۇراماسىنا ەنۋ بولاتىن. بىراق ول ارمانى ورىندالمادى. سوسىن امالسىز قايتا ورالدى. قازىر گوللانديانىڭ توپكلاسسە ديۆيزيونىنداعى ەڭ مىقتى كوماندالاردىڭ ءبىرى «ليسسەگە» اۋىستى، – دەدى رەنىشتى ۇنمەن.

مۇرات ويناعان شىمكەنتتىك «قىران» فۋتبول كومانداسىنىڭ ديرەكتورى تالعات پوشيموۆ «ونىڭ كوماندادا ليدەرلىك دەڭگەيدە بولعانىن، بيىل دا وينايدى دەپ ۇمىتتەنگەندەرىن» ايتادى.

– ول سوڭعى كەتەرىندە «كەلمەيمىن» دەگەن جوق، «كورەمىن» دەگەن بولاتىن. بىراق كەشە (10 قاڭتار – رەد.) گوللانديانىڭ ءبىر كومانداسىنان بىزگە قاتىناس قاعازى كەلىپتى. «بىزگە [مۇرات ءونالدى الۋعا] رۇقسات بەرىڭدەر» دەپ. ول ويىنشى رەتىندە جاقسى. ورتالىق قورعاۋشى رەتىندە دە، كەيدە شابۋىلشى رەتىندە دە ويناي بەرەدى. 2015 جىلى 14 گول سوقتى، – دەدى «قىران» فۋتبول كومانداسىنىڭ ديرەكتورى.

تالعات پوشيموۆتىڭ سوزىنشە، «اتا-اناسى گوللانديادا تۇرعاندىقتان مۇراتتىڭ ءوزى قازاقستان ازاماتتىعىن الۋعا قاتىستى ەكىويلى بولعان».

– باسىندا ەكى ەلدىڭ ازاماتتىعىن دا قاتار الماقشى بولدى. بىراق بىزدە مۇمكىن ەمەس قوي (قازاقستاندا قوس ازاماتتىققا زاڭمەن تىيىم سالىنعان – رەد.). كەيىن ءوزى قازاقستان ازاماتتىعىن الۋعا اسا قۇلشىنىس بايقاتپادى، – دەدى پوشيموۆ.

«جۇمىستارى جاۋاپسىز قالدى»

قازاقستاننىڭ كەيبىر سپورتتىق اقپارات قۇرالدارى مۇرات ءونالدىڭ بۇعان دەيىن «ءبىر مارتە ۇلتتىق قۇراماعا شاقىرتۋ العانى» تۋرالى جازعان. الايدا قازاقستان فۋتبول فەدەراتسياسىنىڭ ءباسپاسوز حاتشىسى دينا ىسقاقوۆا مۇنى جوققا شىعاردى.

قازاقستاندىق فۋتبول جانكۇيەرلەرى. (كورنەكى سۋرەت)

– مۇرات ءونالدىڭ ازاماتتىعى جوق. ال ونىڭ ۇلتى قازاق بولعانىمەن شەتەل ازاماتى بولعاندىقتان قۇراماعا شاقىرا المايمىز. وتكەن جىلى «الا دوپ» سايتى «مۇرات ءونالدىڭ ۇلتتىق قۇرامادا ويناۋعا مۇمكىندىگى بار ما» دەپ حات جازعان بولاتىن. ءبىز ءوز تاراپىمىزدان وڭتۇستىك قازاقستان وبلىسىنىڭ ىشكى ساياسات بولىمىنە شىعىپ، مۇراتتىڭ ازاماتتىق الۋ ماسەلەسىنىڭ بولاتىن-بولمايتىنىن سۇراعانبىز. ولار «جۇمىس جاساپ جاتىرمىز» دەپ جاۋاپ بەرگەن. بىراق سول جۇمىستارى جاۋاپسىز قالدى، – دەدى دينا ىسقاقوۆا.

مۇرات ءونال قازاقستانعا كەلگەن تۇستا قابىلدانعان «قازاقستان رەسپۋبليكاسىنىڭ كەيبىر زاڭ اكتىلەرىنە ەڭبەك ميگراتسياسى ماسەلەلەرى بويىنشا تۇزەتۋلەر مەن تولىقتىرۋلار ەنگىزۋ تۋرالى» زاڭعا سايكەس ورالماندارعا ازاماتتىق قازاقستانعا كوشىپ كەلگەن سوڭ 4 جىلدان كەيىن بەرىلەدى دەپ كورسەتىلگەن.

بىراق سىرتتان كەلگەن 13 شەتەلدىك فۋتبولشىعا 2014 جىلى از عانا ۋاقىت ىشىندە قازاقستان ازاماتتىعى بەرىلگەن ەدى. ولاردىڭ ىشىندە رەسەي، ۋكراينا، بەلارۋس، قىرعىزستان مەن ماكەدونيادان شىققان فۋتبولشىلار بولعان. ازاتتىقتىڭ ولارعا جىلدام ازاماتتىق بەرۋ سەبەبى تۋرالى سۇراعىنا ادىلەت مينيسترلىگى بۇل پروتسەدۋرانىڭ زاڭدى تۇردە جۇزەگە اسقانىن مالىمدەگەن. مينيسترلىكتىڭ حابارلاۋىنشا، مەملەكەتارالىق كەلىسىمدەرگە سايكەس، رەسەي، بەلارۋس، ۋكراينا جانە قىرعىزستان ازاماتتارىنىڭ قازاقستان ازاماتتىعىن الۋ ءتارتىبى وڭايلاتىلعان. بۇرىنعى سسسر اۋماعىندا تۇرعان جانە پوستسوۆەتتىك ەلدەردىڭ بىرىندە دۇنيەگە كەلگەن ادام قازاقستان ازاماتتىعىن وڭايلاتىلعان ءتارتىپ بويىنشا جىلدام الادى.

ازات ەۋروپا / ازاتتىق راديوسى