زارينا دياس
قازاق تەننيسىنىڭ قازىرگى بەلدى وكىلدەرىنىڭ ءبىرى زارينا دياس سوڭعى جىلدارى حالىقارالىق جارىستاردا كوزگە ءتۇسىپ ءجۇر. الماتىدا تۋىلىپ، 4 جاسىندا اتا-انالارىنىڭ جۇمىسىنا بايلانىستى چەحيا مەملەكەتىنىنە كوشىپ كەتكەن. تەننيسپەن دە العاش رەت وسى مەملەكەتتە اينالىستى. كەيىنىرەك حالىقارالىق جارىستارعا قازاقستان اتىنان سىنعا ءتۇستى. زارينا دياس قازاق جانكۇيەرلەرىنە العاش رەت پرەزيدەنت كۋبوگىندا كورىندى. دياس ول ۋاقىتتا نەبارى 16 جاستا ەدى. دياس WTA جارىستارىنا قاتىسىپ ءجۇرىپ، ۇلكەن دۋلىعا باسەكەلەرىنە دە قاتىستى. جاتتىعۋ جۇمىستارىن قىتاي مەملەكەتىندە جاسايتىن تالانتتى سپورتشىعا ءبىر ەمەس بىرنەشە مەملەكەتتەن ۇسىنىس تۇسكەنىن ءوزى جاسىرمادى. چەحيا مەملەكەتىندە ءوسىپ-جەتىلگەندىكتەن وسى ەلدىڭ وكىلدەرى زاريناعا ازاماتتىق الۋ تۋرالى ۇسىنىس جاساعان. بىراق زارينا تۋعان ەلىنىڭ اتىنان سىنعا ءتۇسۋدى ءجون سانادى.
ەليزابەت تۇرسىنباەۆا
مانەرلەپ سىرعاناۋدان سوڭعى جىلدارى قازاقستان قىزدارىنىڭ ىشىنەن ەليزابەت تۇرسىنباەۆا جاستا بولسا كوپ جەتىستىككە جەتىپ ءجۇر. 2000 جىلى ماسكەۋدە تۋىلعان تالانتتى سپورتشى بيىلدان باستاپ ەرەسەكتەر اراسىنداعى جارىستارعا دا شىعىپ ءجۇر. بولاشاعىنان زور ءۇمىت كۇتتىرەتىن ەليزابەتتا جاتتىعۋ جۇمىستارىن امەريكادا جاسايدى. نەبارى 15 جاسار تالانتتى قىز، بىلتىر ەرەسەكتەر اراسىندا العاش رەت كانادادا وتكەن گران-پري جارىسىندا ۇزدىك شىقتى. ال وعان دەيىن جاسوسپىرىمدەر اراسىندا ءتورت رەت حالىقارالىق جارىستاردا توپ جارعان. سپورتشىعا قىزىعۋشىلىق تانىتىپ، وزگە مەمەلەكەتتىڭ ازاماتتىعىن ۇسىنعاندار دا بولدى. تۇرسىنباەۆا ول ۇسىنىستاردان باس تارتىپ، قازاقستان اتىنان سىنعا ءتۇسىپ ءجۇر.
يۋليا گالىشەۆا
فريستايلدان (موگۋل) 2011 جىلعى ازيا ويىندارىنىڭ چەمپيونى، 2015 جىلى وتكەن ۋنيۆەرسيادا جەڭىمپازى جانە 2015 جىلى گەرمانيادا وتكەن الەم چەمپيوناتىنىڭ قولا جۇلدەگەرى قازاقستاندىق سپورتشى يۋليا گالىشەۆادا باسقا مەملەكەتتەن ۇسىنىس العانداردىڭ تىزىمىندە. وسكەمەندە تۋىلعان 23 جاسار تالانتتى فريستايلشى قىسقى سپورت تۇرلەرىنەن الەم چەمپيوناتىندا مەدال العان ساناۋلى قازاقستاندىق سپورتشىنىڭ قاتارىنا ەنەدى. سوڭعى جىلدارداعى تابىسى ونى الەمدىك دەڭگەيدە تانىتۋعا مۇمكىندىك بەردى. 2012 جىلى يتاليادا وتكەن جاستار اراسىنداعى الەم چەمپيوناتىندا جەڭىمپاز اتانعان ساتتەن باستاپ وعان باسقا ەلدەن ۇسىنىس تۇسكەن. ونىڭ ايتۋىنشا كانادا مەن اقش ەلدەرى ءوز قاتارلارىنا الۋ تۋرالى ۇسىنىس جاساعان. الايدا يۋليادا سپورتتىق كارەراسىن قازاقستاندا وتكىزەمىن دەپ شەشكەن.
يليا يلين
قازاق اۋىر اتلەتيكاسىندا عانا ەمەس الەمدىك دەڭگەيدە «جەڭىلمەيتىن» سپورتشى اتانعان ءيليننىڭ جۇلدە قورىندا بارلىق مەدال بار. ەكى دۇركىن وليمپيادا چەمپيونى، ءتورت دۇركىن الەم چەمپيونى جانە ەكى دۇركىن ازيا چەمپيونى ءوزىنىڭ سۇحباتىندا وزگە مەملەكەتتەن ۇسىنىس تۇسكەنىن ايتقان. سپورتشى قازاقستان اتىنان عانا جارىستارعا قاتىسقى كەلەتىنىن جەتكىزگەن.
الەكسەي پولتورانين
الەم چەمپيوناتىنىڭ ەكى دۇركىن قولا جۇلدەگەرى، ازيا ويىندارىنىڭ، الەم كۋبوگىنىڭ جانە تۋر دە سكي جارىسىنىڭ ءتورت دۇركىن جەڭىمپازى قازاقستانداعى تابىستى سپورتشىلاردىڭ قاتارىنا كىرەدى. 29 جاسار وسكەمەن قالاسىنىڭ تۋماسىنا الەم چەمپيوناتىنان كەيىن بىرنەشە ەلدەن ۇسىنىس تۇسكەن. دەگەنمەن سپورتشى بۇل ۇسىنىستاردى قابىلدامادى.
ولجاس ساتتىباەۆ
2009 جىلى قىتايدا وتكەن ازيا چەمپيوناتىنىڭ جەڭىمپازى ولجاس ساتتىباەۆ تا بۇل تىزىمگە كىرەدى. ازيا چەمپيوناتىنان كەيىن قۇراماداعى باسەكەلەستىك كۇشەيە ءتۇستى. ساتتىباەۆ بىرنەشە رەت قۇراما تىزىمىنە ەنبەي قالعان ەدى. بۇل جاعدايدان حاباردار باسقا دا مەملەكەتتەر ونى ءوز قاتارىنا قوسقىسى كەلدى. الايدا بوكسشى وزگە ەلدەردەن تۇسكەن ۇسىنىستى قاراستىرمايتىنىن ايتقان. ودان كەيىن بوكسشى «استانا ارلانس» كلۋبىمەن بۇكىلالەمدىك بوكس سەرياسىندا چەمپيون اتاندى.
alaman.kz
پىكىر قالدىرۋ