نازارباەۆ تاعى ءبىر اقتوبەلىككە ءۇي سىيلادى. اتا-اناسىنىڭ قيىن جاعدايىن جازعان اقتوبەلىك وقۋشى ءبىر جاپىراق قاعازىن پرەزيدەنتتىڭ قولىنا ۇستاتتى دەپ حابارلايدى NUR.KZ تىلشىسى.

ەلباسى اقتوبەگە ساپارىندا نازارباەۆ اتىنداعى زياتكەرلىك مەكتەپ وقۋشىلارىمەن كەزدەستى. مەكتەپتىڭ تەحنيكالىق بازاسىمەن تانىسقان پرەزيدەنت وقۋشىلارمەن اڭگىمەلەسىپ كەتۋدى ۇمىتقان جوق. پرەزيدەنتتى قارسى الىپ، مەكتەپتەگى جاعدايدى ايتىپ تۇرعان وقۋشى جەكە باسىنا قاتىستى اڭگىمەنى «قالتامدا ءبىر جاپىراق قاعاز بار ەدى» دەپ باستادى. «اكەل وندا ءبىر جاپىراق قاعازىڭدى» دەگەن نۇرسۇلتان نازارباەۆ قوبالجىعان وقۋشىعا سەنىمدىلىك بەرىپ، حاتىن الدى.

ول قولىنا ۇستاعان حاتتى «مىنانى قازىر وقيىن با، الدە كەيىن وقيىن با؟» دەپ سۇراپ، وقۋشىعا قاراعان بولاتىن.

«ءوزىڭىز قالاعان ۋاقىتتا وقىرسىز» دەگەن وقۋشى سوزىنەن كەيىن ەلباسى حاتتى ءبىر شولىپ شىقتى.

قىسقاشا ديالوگ كەزىندە ەلباسى «ءۇيىڭ قايدا ورنالاسقان؟» دەپ بالانىڭ جاعدايىن دا سۇرادى.

«اكە شەشەم قارابۇتاق اۋىلىندا تۇرادى. ۇيدە كامەلەتتىك جاسقا تولماعان ءتورت بالا بار. ۇيدەگىلەر ءبىزدى وقىتۋ ءۇشىن قالاعا كوشىپ كەلەدى» دەگەن بالانىڭ تىلەگى جەردە قالعان جوق.

قولىنا حاتتى ۇستاپ تۇرعان كۇيى نۇرسۇلتان ءابىشۇلى «مىنانى اكىمگە تاپسىرامىن، بۇل ءۇي ساعان ەمەس، سەنىڭ اتا اناڭا بولادى» دەپ كەتتى.

اقتوبەلىكتەردىڭ نازارباەۆتىڭ الدىنان شىعىپ، ءۇي سۇراۋى بۇل ءبىرىنشى رەت ەمەس. وسىدان ون جىل بۇرىن اقتوبەگە پرەزيدەنت كەلگەن كەزدە قانشاما كۇزەتتىڭ اراسىنان سىتىلىپ شىققان كىشكەنتاي قىز كوپتى تاڭ قالدىرعانى ەسىمىزدە. وندا ءبۇلدىرشىن اناسىنىڭ ەلباسى اتىنا جازعان حاتىن قولىنا قىسىپ جۇگىرگەن بولاتىن.

كىشكەنتاي قىز جۇگىرگەن بويىمەن حاتىن پرەزيدەنتتىڭ قولىنا ۇستاتتى. سول كەزدە حاتتى كومەكشىلەرىنە بەرگەن نۇرسۇلتان ءابىشۇلى كىشكەنتاي ءبۇلدىرشىننىڭ نيەتىن، انانىڭ تىلەگىن ورىندادى.

ەلباسى ساپارىنان كەيىن شولپان ەسىمدى قىزدىڭ وتباسى باسپانالى بولعانى حابارلانعان بولاتىن.

بۇل جولى تاعى ءبىر اقتوبەلىك جۇرەگى داۋالاپ، پرەزيدەنت قولىنا حات ۇستاتتى. ۇلكەن قوناق بالا كوڭىلىن قاققان جوق. ناق شەشىمىن ايتىپ، ۋادەسىن بەرىپ كەتتى.