سايلاۋ كەزىندە ورىس ءتىلىن بىلمەگەنى ءۇشىن شىمكەنتتىك مۇعالىمنىڭ نامىسى تاپتالدى (ۆيدەو)
kerey.kz
شىمكەنتتىك مۇعالىم سايلاۋ كۇنى كوزى جاسقا تولىپ، نامىسى تاپتالعانىن ايتتى. ايتۋىنشا، وعان ورىس ءتىلىن بىلمەۋى سەبەپ بولىپتى. عالامتوردا تۇرعىننىڭ كوزىنە جاس الىپ تۇرىپ بەرگەن سۇحباتى پايدا بولدى. «شىمكەنت قالاسىندا 2016 جىلى 20 ناۋرىز سايلاۋ كەزىندە بولعان وقيعا. ورىس ءتىلىن شالاجانسار بىلگەنى ءۇشىن قازاق مەكتەبىنىڭ ۇستازى ورىس ۇلتىنىڭ وكىلىنەن بالاعات سوزدەر ەستىگەن» دەگەن جازبامەن جاريا ەتىلگەن ۆيدەودا ايەل ازاماتى ءوز اڭگىمەسىن سايلاۋ بارىسىندا كەلەڭسىز جايتقا تاپ بولعانىنان باستاعان.
«داۋىس بەرۋگە كەلىپ جاتقاندا كەلەڭسىز وقيعاعا تاپ بولدىم. انىعىن ايتقاندا، ورىس ۇلتىنىڭ ازاماتى ءبىزدىڭ مۇعالىمدەرگە «سەندەر ورىسشا بىلمەيسىڭدەر، ورىسشا سويلەي المايسىڭدار. جۇمىستارىڭدى بوساتىڭدار. نەگە وتىرسىڭدار، نازارباەۆ سەندەرگە نە ايتتى؟» دەگەن سياقتى وكتەم-وكتەم سوزدەر ايتىپ، ءبىزدىڭ نامىسىمىزدى جەرگە كىرگىزەردەي بولدى… «سەن كىمسىڭ، سەنى جۇمىستان شىعارۋ كەرەك. سەن ورىسشا سويلەي المايسىڭ دا، بىلمەيسىڭ دە» دەگەن سياقتى اڭگىمەلەر ايتتى. سايلاۋعا كەلىپ، وسىنداي نامىسىم تاپتالعانىنان مەن قورلانىپ بارا جاتىرمىن… بۇل قالاي ەندى؟ مەن وعان ەشقانداي ارتىق ءسوز ايتپاسام، بىلگەنىمىزشە ايتىپ جاتىرمىز. ەندى ءبىز قازاق مەكتەبىندە قازاق ۇلتىن تاربيەلەپ وتىرىپ، مەن نە ءۇشىن اناعان دا، مىناعان دا ورىسشا سويلەۋىم كەرەك؟» دەپ اشىنعان مۇعالىم.
پىكىر قالدىرۋ