مەملەكەتتىك ارنا مارتەبەلەپ وتكىزگەن «جۇلدىزدار ايتىسادى» دەگەن جوبا تەلەەكران ارقىلى كورەرمەنگە ۇسىنىلدى. انشىلەر مەن اقىندار جۇپتاسىپ ونەر كورسەتەتىن بۇل ءسوز جارىسىنا “جۇلدىزدار” جاقسى دايىندىقپەن كەلىپ، كورەرمەنگە جارىستى ونەر، جاراسىمدى قالجىڭ ۇسىندى. ءبىزدىڭ ايتىپ وتىرعانىمىز، قازىر ءانشى، بۇرىنعى ايتىسكەر ەركىن نۇرجانوۆ پەن اتىراۋلىق شالقارباي ءىزباساروۆتىڭ دۋمانى. بۇل ەكەۋى قازاقى قالجىڭنىڭ قايماعىن قالقىپ، ۇيقاستى سوزدەرمەن قوعامنىڭ قوتىرىن “قاسىپ” بەردى. حالىقتىڭ كۇتكەنى دە وسى ەدى عوي. حالىق تۇگىلى «شاتپاق ايتىسقا» قازىلىق ەتىپ وتىرعانداردىڭ دا قاباقتارىنىڭ قارى ەرىگەندەي بولدى.
ءجۇرسىن ەرمان باستاعان، ايتىسكەر اقىن اينۇر تۇرسىنباەۆا، «ءازىل الەمى» تەاترىنىڭ كوركەمدىك جەتەكشىسى تۇرسىنبەك قاباتوۆتار قاباقتارى قاتۋلى وتىرعان ەدى وسىعان دەيىن. ەركىن مەن شالقاربايدىڭ ايتىسى حالىقتىڭ دا، قازىنىڭ دا كوڭىلىنەن شىقتى.
«شوۋ ايتىستى وتكىزۋدەگى نەگىزگى ماقساتى – قازاقتىڭ ءداستۇرلى ونەرىن جاڭاشا باعىتتا حالىققا ناسيحاتتاۋ، ونىڭ اۋديتورياسىن جاسارتۋ»،- دەپ اقتالعان ۇيىمداستىرۋشىلار بىلتىر دا جۇرت نارازىلىعىن تۋدىرعان-تىن.
اشىعىن ايتقاندا، بيىل دا «جۇلدىزدار» جەتىستىرىپ ايتىس جاساي المادى.
«ءازىل الەمى» تەاترىنىڭ ءارتىسى قانات ءالجاپپاروۆ بيىل سارامەن تاعى ايتىستى. ەگەر بۇنى ايتىس دەپ اتاۋعا كەلسە، ارينە. بىلتىرعى بەكبولات تىلەۋحاننىڭ وسى جۇپقا دەگەن ەرەكشە ىقىلاسى قاناتقا قانات بىتىرسە كەرەك، ول بيىل تاعى كيەلى ساحنانىڭ تورىندە لاعىپ سويلەپ، لاقپا ايتىس كورسەتتى.
ونەر ادامى بەساسپاپ ءام امبەباپ بولۋى كەرەك دەگەن قاعيدانى قانات مىرزا بىلمەيتىن سياقتى، سەبەبى ول بيىل تاعى دا دومبىرا شەرتە المادى. ۇستەلىنىڭ ۇستىندەگى قاعازعا جازىپ بەرگەندى جاتتاپ شىعاتىن ءجونى بار ەمەس پە ەدى. اتتەڭ…
قاناتتىڭ قارسىلاسى سارا توقتامىسوۆا – داۋسىز تالانت يەسى. تالاي ايتىستاردا ءوزىنىڭ وزگەلەردەن وزىق ەكەنىن دالەلدەپ ۇلگەرگەن سارا قاناتتىڭ «قۋما تالانتىنىڭ» قۇربانى بولىپ كەتتى.
قاناتتىڭ ساحنا تورىندە ايتىستى سايقىمازاققا اينالدىرۋى قوعامدىق ورتا مەن الەۋمەتتىك جەلى قولدانۋشىلارىنىڭ اشۋىن تۋعىزۋدا.
مىسالى، ۇلتتىق ونەر جاناشىرى تالعات جانىسباي “جۇلدىزدى ايتىستىڭ” سور ايتىسقا اينالعانىنا ايتىپ، ء“ازىل الەمى” تەاترىنىڭ ءارتىسى قانات الجاپپاروۆقا ۆيدەو-سالەمدەمە جولدادى.
تالعات جانىسباي شوۋ-ايتىستا دومبىراسىن قۇشاقتاپ، “نوكەرلەرىمەن” كەلگەن قاناتتى سىننىڭ استىنا الىپ، ەكىنشى جوباعا ءبىر-ەكى نوتا ۇيرەنىپ كەلمەگەنىن ايىپتادى.
“شوۋ-ايتىس بىلتىر شىققاندا، قانات ايتىستىڭ ابىرويىن توگىپ، قازاق بولىپ قولىنا دومبىرا تارتا الماۋى، ال بيىل سونى قايتالاۋى – ماسقارا”، – دەيدى تالعات جانىسباي.
بۇدان ءارى تالعات قازاقتىڭ قانىنا سىڭگەن، ۇلتتىڭ مادەنيەتىن دارىپتەيتىن ونەردىڭ بولاشاعىنا الاڭدايتىنىن جەتكىزگەن.
“ايتىسىمىز بارا-بارا شوۋعا اينالسا، بۇل جاستارعا نە بەرمەك، اعايىن؟”، – دەپ اۆتور كوپشىلىككە وي سالدى.
اقىن سارا توقتامىسقىزى دا قاناتپەن شىعۋعا ەكى ويلى بولعانىن Instagram جەلىسىندە جازعان ەدى.
“كوپتەن كۇتكەن ايتىس تا ءوز مارەسىنە جەتتى. شىقپايمىن دەپ ارى ويلانىپ، بەرى ويلانىپ شىقتىق-اۋ ايتەۋىر”، – دەپ جازدى سارا جەكە پاراقشاسىنا.
ءتۇيىن: راس، شوۋ ايتىستىڭ شۋى باسىلماي تۇر قازىر. ۇيىمداستىرۋشىلاردىڭ اۋەلگى ويلارى دۇرىس بولعانىمەن، جاساعان ەكسپەريمەنتتەرى وتە ءساتسىز شىقتى. جانە ءبىر ەمەس، ەكىنشى مارتە قايتالانىپ وتىر. دەمەك، قوعام قابىلدامايتىن دۇنيەنى كۇشتەپ وتكىزۋ كىمگە كەرەك؟! ارينە، استانا تورىندە دۇركىرەتىپ ايتىس وتكىزۋ ءۇشىن از قاراجات جۇمسالمايدى. دەمەك، بۇنىڭ ارتىندا استارلى ماسەلە بار. شوۋ – بيزنەس كوزى. ال كيەلى ساحناعا شىعىپ، ۇلتتىق ونەردى مازاق قىلعىن ءارتىس ءالجاپپاروۆ حالىقتان كەشىرىم سۇراۋعا ءتيىس-ءتىن. حالىق تا قاناتتان وسىنى كۇتەدى.
نۇرگەلدى ابدىعانيۇلى
Abai.kz
پىكىر قالدىرۋ