Memlekettik arna märtebelep ötkizgen «Jwldızdar aytısadı» degen joba teleekran arqılı körermenge wsınıldı. Änşiler men aqındar jwptasıp öner körsetetin bwl söz jarısına “jwldızdar” jaqsı dayındıqpen kelip, körermenge jarıstı öner, jarasımdı qaljıñ wsındı. Bizdiñ aytıp otırğanımız, qazir änşi, bwrınğı aytısker Erkin Nwrjanov pen atıraulıq Şalqarbay İzbasarovtıñ dumanı. Bwl ekeui qazaqı qaljıñnıñ qaymağın qalqıp, wyqastı  sözdermen qoğamnıñ qotırın  “qasıp” berdi. Halıqtıñ kütkeni de osı edi ğoy. Halıq tügili «şatpaq aytısqa» qazılıq etip otırğandardıñ  da qabaqtarınıñ qarı erigendey boldı.

Jürsin Erman bastağan, aytısker aqın Aynwr Twrsınbaeva, «Äzil älemi» teatrınıñ körkemdik jetekşisi Twrsınbek Qabatovtar qabaqtarı qatulı otırğan edi osığan deyin. Erkin men Şalqarbaydıñ aytısı halıqtıñ da, qazınıñ da köñilinen şıqtı.

«Şou aytıstı ötkizudegi negizgi maqsatı – qazaqtıñ dästürli önerin jañaşa bağıtta halıqqa nasihattau, onıñ auditoriyasın jasartu»,- dep aqtalğan wyımdastıruşılar bıltır da jwrt narazılığın tudırğan-tın.

Aşığın aytqanda, biıl da «jwldızdar» jetistirip aytıs jasay almadı.

«Äzil älemi» teatrınıñ ärtisi Qanat Äljapparov biıl Saramen tağı aytıstı. Eger bwnı aytıs dep atauğa kelse, ärine. Bıltırğı Bekbolat Tileuhannıñ osı jwpqa degen erekşe ıqılası Qanatqa qanat  bitirse kerek, ol biıl tağı kieli sahnanıñ törinde lağıp söylep, laqpa aytıs körsetti.

Öner adamı besaspap äm ämbebap boluı kerek degen qağidanı Qanat mırza bilmeytin siyaqtı, sebebi ol biıl tağı da dombıra şerte almadı. Üsteliniñ üstindegi qağazğa jazıp bergendi jattap şığatın jöni bar emes pe edi. Ätteñ…

Qanattıñ qarsılası Sara Toqtamısova – dausız talant iesi. Talay aytıstarda öziniñ özgelerden ozıq ekenin däleldep ülgergen Sara Qanattıñ «quma talantınıñ» qwrbanı bolıp ketti.

Qanattıñ sahna törinde aytıstı sayqımazaqqa aynaldıruı qoğamdıq orta men äleumettik jeli qoldanuşılarınıñ aşuın tuğızuda.

Mısalı, wlttıq öner janaşırı Talğat Janısbay “jwldızdı aytıstıñ” sor aytısqa aynalğanına aytıp, “Äzil älemi” teatrınıñ ärtisi Qanat Äljapparovqa video-sälemdeme joldadı.

Talğat Janısbay şou-aytısta dombırasın qwşaqtap, “nökerlerimen” kelgen Qanattı sınnıñ astına alıp, ekinşi jobağa bir-eki nota üyrenip kelmegenin ayıptadı.

“Şou-aytıs bıltır şıqqanda, Qanat aytıstıñ abıroyın tögip, qazaq bolıp qolına dombıra tarta almauı, al biıl sonı qaytalauı – masqara”, – deydi Talğat Janısbay.

Bwdan äri Talğat qazaqtıñ qanına siñgen, wlttıñ mädenietin däripteytin önerdiñ bolaşağına alañdaytının jetkizgen.

“Aytısımız bara-bara şouğa aynalsa, bwl jastarğa ne bermek, ağayın?”, – dep avtor köpşilikke oy saldı.

Aqın Sara Toqtamısqızı da Qanatpen şığuğa eki oylı bolğanın Instagram jelisinde jazğan edi.

“Köpten kütken aytıs ta öz märesine jetti. Şıqpaymın dep arı oylanıp, beri oylanıp şıqtıq-au äyteuir”, – dep jazdı Sara jeke paraqşasına.

Tüyin: Ras, şou aytıstıñ şuı basılmay twr qazir. Wyımdastıruşılardıñ äuelgi oyları dwrıs bolğanımen, jasağan eksperimentteri öte sätsiz şıqtı. Jäne bir emes, ekinşi märte qaytalanıp otır. Demek, qoğam qabıldamaytın dünieni küştep ötkizu kimge kerek?! Ärine, Astana törinde dürkiretip aytıs ötkizu üşin az qarajat jwmsalmaydı. Demek, bwnıñ artında astarlı mäsele bar. Şou – biznes közi. Al kieli sahnağa şığıp, wlttıq önerdi mazaq qılğın ärtis Äljapparov halıqtan keşirim swrauğa tiis-tin. Halıq ta Qanattan osını kütedi.

Nwrgeldi Äbdiğaniwlı

Abai.kz