كەشەلى-بەرى قازاقستاندىق باق «ارقانكەرگەن» وقيعاسىنىڭ اتى شۋلى «رەمبوسى» – ۆلاديسلاۆ چەلاحقا بۇۇ كوميسسياسى اراشا ءتۇسۋى مۇمكىن دەگەن سىبىستار شىققان. 2012 جىلى «ارقانكەرگەن» زاستاۆاسىندا 14 اسكەري مەن ءبىر ورمانشىنى جالعىز ءوزى جايراتىپ سالدى دەپ ايىپتالعان ۆلاديسلاۆ چەلاحتىڭ وتباسى رەسەيگە كوشىپ كەتپەك.
قازىر چەلاحتىڭ وتباسى كالينينگرادقا قونىس اۋداراتىن بولدى.
ۆلاديسلاۆتىڭ اناسى سۆەتلانا ۆاششەنكو قازاقستاننىڭ سوت ورىنداۋ جۇيەسىنەن ادىلەتتىك تاپپاي، اقىرى ءوز اتا-قونىستارىنا كەتپەك. ءالى كۇنگە دەيىن «بالام جازىقسىز سوتتالدى» دەپ ويلايتىن سۆەتلانانىڭ وتباسى ءبىزدىڭ ەلدە تۇرعىسى جوق. ءوز اتامەكەنىنە ورالۋعا رۇقسات بەرەتىن قۇجاتتارىن دا راسىمدەپ العان. ەندى قاراعاندىداعى پاتەرلەرىن ساتۋ عانا قالىپتى. ۇلدارىن كورۋگە جىلىنا 4 رەت قازاقستانعا كەلىپ تۇراتىندارىن دا ايتادى. ال، ۆلاديسلاۆتىڭ اناسى سۆەتلانا ۆاششەنكو ەلدەن كوشۋىنە مۇنداعى زاڭنىڭ ادىلەتسىزدىگى، سونىڭ سالدارىنان ۇلىنىڭ سوتتالۋى سەبەپ بولدى دەپ وتىر. «مەن بۇل ەلدە ەندى تۇرعىم كەلمەيدى. ۇلىمدى ادىلەتسىز سوتتاپ جىبەردى. ءبىزدىڭ دوستارىمىزدىڭ بارلىعى انا جاققا كوشىپ كەتتى باياعىدا. ولار ۇكىم شىققان سوڭ كوشە باستادى. وعان دەيىن كوشۋ تۋرالى وي ەشكىمدە بولماعان. وزدەرىنىڭ بالالارى دا وسىنداي جاعدايعا تاپ بولۋىنان قورىقتى»، – دەگەن سۆەتلانا ۆاششەنكو.
ەستەرىڭىزدە بولسا، ۆلاديسلاۆ چەلاح 2012 جىلى 11 جەلتوقساندا اسكەري سوت ۇكىمىمەن ءومىر بويى باس بوستاندىعىنان ايىرۋ جازاسىنا كەسىلگەن بولاتىن.
چەلاح ءىسىنىڭ كۇڭگىرت تۇستارى دا جوق ەمەس. وسى وقيعانىڭ توڭىرەگىندە قازاقستاندىق جانە الەمدىك باق بەتتەرىندە «چەلاحتىڭ قاندى قىرعىنعا قاتىسى جوق»، «ارقانكەرگەن ىسىنە قاتىستى تەرگەۋشىلەر شىندىقتى جاسىرىپ ءجۇر» دەگەن ماقالالار جاريالاندى. بىرەۋلەر بۇل سۇمدىقتان «گوموسەكسۋاليزمنىڭ» بەلگىلەرىن بايقاسا، ەندى بىرەۋلەر مۇلدە وزگەشە ساياسي استار ىزدەدى. ءتىپتى، جۋرناليست بەنديتسكي، «ەسلي بى سوباكي زاگوۆوريلي» دەگەن ماقالاسىندا چەلاحتى اشىق ايىپتاپ، ونىڭ «گەي» بولعانىن دا ايتتى.
وسىدان كەيىن قازاق قوعامىن ايران-اسىر ەتكەن «چەلاح وقيعاسى» تاعى ءبىر جۇمباققا كەلىپ تىرەلدى. «چەلاح ناتو-نىڭ تىڭشىسى ەكەن» دەگەن دە اقپارات باق بەتىندە جاريالاندى. عالامتور بەتىندە 14 شەكاراشى مەن اڭشىنى جالعىز جايراتىپ سالدى دەلىنىپ كەلگەن ۆلاديسلاۆ چەلاحتىڭ قولىنان تابىلعان تاپانشا شەكارا قىزمەتىنىڭ قارۋ بازاسىنا تيەسىلى ەمەس ەكەن دەگەن اقپاراتتىڭ نەگىزىندە قاۋەسەتتەر گۋلەدى.
چەلاح قورعاۋشىسى سارسەنوۆتىڭ بولجامىنشا، بۇۇ-نىڭ چەلاح ىسىنە قاتىستى قورىتىندى راستاماسى ءىستىڭ باعىتىن 180 گرادۋسقا وزگەرتىپ جىبەرۋى ىقتيمال. دەمەك، ەكى جىلدان بەرى تىنىشتالىپ قالعان «ارقانكەرگەن» ءىسى قايتا كوتەرىلۋى ابدەن مۇمكىن.
نۇرگەلدى ابدىعانيۇلى
Abai.kz
پىكىر قالدىرۋ