Keşeli-beri qazaqstandıq BAQ  «Arqankergen» oqiğasınıñ atı şulı «Rembosı» – Vladislav Çelahqa BWW komissiyası araşa tüsui mümkin degen sıbıstar şıqqan. 2012 jılı «Arqankergen» zastavasında  14 äskeri men bir ormanşını jalğız özi jayratıp saldı dep ayıptalğan Vladislav Çelahtıñ otbası Reseyge köşip ketpek.

Qazir Çelahtıñ otbası Kaliningradqa qonıs audaratın boldı.

Vladislavtıñ anası Svetlana Vaşenko Qazaqstannıñ Sot orındau jüyesinen ädilettik tappay, aqırı öz ata-qonıstarına ketpek. Äli künge deyin «balam jazıqsız sottaldı» dep oylaytın Svetlananıñ otbası bizdiñ elde twrğısı joq. Öz atamekenine oraluğa rwqsat beretin qwjattarın da räsimdep alğan. Endi Qarağandıdağı päterlerin satu ğana qalıptı. Wldarın köruge jılına 4 ret Qazaqstanğa kelip twratındarın da aytadı. Al, Vladislavtıñ anası Svetlana Vaşenko elden köşuine mwndağı zañnıñ ädiletsizdigi, sonıñ saldarınan wlınıñ sottaluı sebep boldı dep otır. «Men bwl elde endi twrğım kelmeydi. Wlımdı ädiletsiz sottap jiberdi. Bizdiñ dostarımızdıñ barlığı ana jaqqa köşip ketti bayağıda. Olar ükim şıqqan soñ köşe bastadı. Oğan deyin köşu turalı oy eşkimde bolmağan. Özderiniñ balaları da osınday jağdayğa tap boluınan qorıqtı», – degen Svetlana Vaşenko.

Esteriñizde bolsa, Vladislav Çelah 2012 jılı 11 jeltoqsanda äskeri sot ükimimen ömir boyı bas bostandığınan ayıru jazasına kesilgen bolatın.

Çelah isiniñ küñgirt twstarı da joq emes. Osı oqiğanıñ töñireginde qazaqstandıq jäne älemdik BAQ betterinde «Çelahtıñ qandı qırğınğa qatısı joq», «Arqankergen isine qatıstı tergeuşiler şındıqtı jasırıp jür» degen  maqalalar jariyalandı. Bireuler bwl  swmdıqtan  «gomoseksualizmniñ» belgilerin bayqasa, endi bireuler mülde özgeşe sayasi astar izdedi.  Tipti, jurnalist Bendickiy, «Esli bı sobaki zagovorili» degen maqalasında Çelahtı aşıq ayıptap, onıñ «gey» bolğanın da ayttı.

Osıdan keyin qazaq qoğamın ayran-asır etken «Çelah oqiğası» tağı bir jwmbaqqa kelip tireldi. «Çelah NATO-nıñ tıñşısı eken» degen de aqparat BAQ betinde jariyalandı. Ğalamtor betinde 14 şekaraşı men añşını jalğız jayratıp saldı delinip kelgen Vladislav Çelahtıñ qolınan tabılğan tapanşa şekara qızmetiniñ qaru bazasına tiesili emes eken degen aqparattıñ negizinde qauesetter guledi.

Çelah qorğauşısı Särsenovtiñ boljamınşa, BWW-nıñ Çelah isine qatıstı qorıtındı rastaması istiñ bağıtın 180 gradusqa özgertip jiberui ıqtimal. Demek, eki jıldan beri tınıştalıp qalğan «Arqankergen» isi qayta köterilui äbden mümkin.

Nwrgeldi Äbdiğaniwlı 

Abai.kz