“بىرىنشىدەن، الەۋمەتتىك جەلى دەگەن ءوزىڭنىڭ موينىڭدى كەندىر جىپپەن بايلاپ، بىرەۋدىڭ قولىنا ۇستاتىپ قويۋمەن بىردەي. مەن ءتىپتى ۇيدەگى ادامدارعا ايتپايمىن، قايدا ءجۇرىپ، قايدا كەتىپ بارا جاتقانىمدى. قازىر بىرەۋدەن سۇراساڭ، اناۋ انا جەردە تاماق ءىشىپ وتىر، اناۋ ءبۇيتىپ وتىر، ءسۇيتىپ وتىر دەيدى. دەمەك، بۇل بىرەۋدىڭ نازارىندا بولۋ، اللادان باسقا”، – دەپ كەسىپ ايتتى زايىتوۆ.

“كەيىن بۇل ادام بالاسىنا قاجەت ەمەس “مەنىڭ بالەنباي تىڭدارمانىم بار”، “مەنىڭ بالەنباي دوسىم بار”، “مەنى بالەنباي ادام وقيدى ەكەن” دەگەن قايداعى جوق، ەشقانداي ءمانى، ماعىناسى جوق ءبىر جاققا ادامداردى جەتەلەپ جاتىر”، – دەپ كۇيىنەدى اقىن.

رينات زايىتوۆ الەۋمەتتىك جەلىدەگى تانىمالدىلىق ادامداردى ەرىكسىز ەرسى ادەپتەرگە جەتەلەيتىنىن دە العا تارتتى.

“سوعان جەتۋ ءۇشىن ادامدار جالاڭاشتانادى، شەشىنەدى، بىرەۋ ءولىپ جاتسا سۋرەتكە تۇسىرەدى. قوعام بۇزىلدى دەگەن وسى. بىزدە بىرەۋ قۇلاپ جاتسا، قول بەرۋدىڭ ورنىنا، تەلەفونعا بارىپ تۇسىرەدى. سەبەبى ونىڭ ماقساتى: انا ادامدار نەعۇرلىم كوپ لايك باسسا بولدى. قىز بەن جىگىت وتىرادى كافەدە، ءبىر-بىرىمەن سويلەسپەيدى، تەلەفون شۇقىلايدى”، – دەپ بۇگىنگى زاماننىڭ شىندىعىن بۇكپەسىز ايتتى.

ايتىسكەردىڭ پىكىرىنشە، بۇل قۇبىلىس – قاراپايىم ادامداردى ارالاسۋىنان اجىراتۋ، باۋىرمالدىلىقتى سۋىتۋدىڭ بىردەن-ءبىر بەلگىسى. ءبىر-بىرىنە دەگەن جاناشىرلىقتى جويۋدىڭ باستاماسى. ەڭ بولماسا ادامنىڭ ىنتاسىن باسقا جاققا بۇرۋ.

الايدا، اقىننىڭ جان جارى ءزۇلفيا زايىتوۆا Instagram جەلىسىندە جاڭالىقتارىمەن ءبولىسىپ وتىرۋدى جات سانامايتىن كورىنەدى. جولداسىنىڭ سۋرەتتەرىن دە اركەز جۇكتەۋدى ۇمىت قالدىرمايدى.