جىلقى جايىندا جاڭا كىتاپ
kerey.kz
مەن: “تۇسىمە ەنەدى،
جىلقىنىڭ كىسىنەگەنى…”- دەپ ولەڭدەتىپ جۇرگەندە – جاقىن دوسىم،
“قازاق جىلقىسىنىڭ تاريحى”، “قازاقتىڭ تازىسى” اتتى ايگىلى ەنتسيكلوپەديالىق كىتاپتاردىڭ اۆتورى، تاريح عىلىمدارىنىڭ دوكتورى، پروفەسسور احمەت توقتاباەۆ جاقىندا “تۇركى حالىقتارىنىڭ جىلقى مادەنيەتى” اتتى جاڭا ەڭبەگىن جارىققا شىعارىپ ۇلگەردى. استانالىق “عىلىم” باسپاسى تارتۋ ەتكەن، 380 بەتتەن تۇراتىن، كوركەم بەزەندىرىلگەن بۇل ىرگەلى زەرتتەۋدىڭ باس رەداكتورى كورنەكتى تۇرىكتانۋشى دارحان قىدىرالى، پىكىر جازعاندار اتاقتارىنان ات ۇركەتىن تاريحشى عالىمدار حانگەلدى ءابجانوۆ پەن زەينوللا ساماشەۆ.
كىتاپ اڭداتپاسىندا: “تۇركى حالىقتارىنىڭ اتا-بابالارى جىلقىنى قولعا ۇيرەتىپ، ات ابزەلدەوىن ويلاپ تاپقان، الەمگە جىلقى مادەنيەتىن تارتۋ ەتكەن. قازىر الەمدەگى ءبىرتالاي مادەني جىلقى تۇقىمدارىنىڭ قالىپتاسۋىنا (اراب، اعىلشىننىڭ تازا قاندى جىلقىسى، ت.س.س.) تۇركى جىلقىلارىنىڭ تىكەلەي اسەرى بار.
تۇركى جىلقىلارىنىڭ وتانى – قازاق جەرى، سارىارقادا 5-6 مىڭ جىل بۇرىن ءوسىپ-ونگەن جابى جىلقىسىنان باستاۋ الادى. كىتاپتا تۇڭعىش رەت تۇركى حالىقتارى مەن ۇلىستارىنىڭ جيىرماعا جۋىق جىلقى تۇقىمدارىنىڭ شىعۋ تەگى، ءبىتىمى، شارۋاشىلىقتاعى الاتىن ورنى، ت.ب. قاسيەتتەرى مەن ەرەكشەلىكتەرى ءسوز بولادى. كوپتەگەن كونە تاريحي سۋرەتتەر جانە قازىرگى زامانعى فوتوسۋرەتتەر زەرتتەۋدىڭ مازمۇنىن بايىتىپ، ماڭىزىن ارتتىرا تۇسەدى. باسىلىم تۇركى حالىقتارىنىڭ تاريحى مەن مادەنيەتىن بىلەم دەۋشىلەرگە، اتتى قادىرلەۋشىلەرگە، جىلقى وسىرۋشىلەرگە، عىلىمي كوپشىلىك قاۋىمعا ارنالعان”- دەپ جازىلىپتى. نەسى بار، قۇندى جاڭالىق، قاجەتتى كىتاپ!
مەنىڭشە، بۇل كىتاپتىڭ تۇساۋكەسەرىن انكارادا دا وتكىزىپ، ءتۇبى ءبىر تۋىس تىلدەرگە اۋدارۋدى حالىقارالىق “تۇرىكسوي” ۇيىمى مەن ەۆرازيا جازۋشىلار وداعى بىرلەسە قولعا العانى دۇرىس سياقتى.
ۇلىقبەك ەسداۋلەتتىڭ Facebook پاراقشاسىنان الىندى
پىكىر قالدىرۋ