بۇگىن الماتىدا ۇكىمەتتىڭ «جەر ساتۋ» جانە شەتەلدىكتەرگە ۇزاق مەرزىمگە جالعا بەرۋ جوسپارىنا قارسى بەيبىت شەرۋ وتكىزۋ جونىندەگى ۇيىمداستىرۋ القاسىنىڭ مۇشەلەرى مەن قالا بيلىگىنىڭ وكىلدەرى كەزدەسكەن. وعان قاتىسقانداردىڭ ءبىرى رىسبەك سارسەنبايدىڭ ازاتتىققا ايتۋىنشا، اكىمدىككە ونىمەن بىرگە بارعان بەلسەندىلەر ەركىن قاليەۆ، مۇحتار تايجان جانە جارىلقاپ قالىبايمەن الماتى قالاسى اكىمىنىڭ ورىنباسارى ارمان قىرىقباەۆ، قالا پروكۋرورىنىڭ ورىنباسارى جاندوس ومىراليەۆ جانە تاعى بىرنەشە شەنەۋنىك جۇزدەسكەن.

«ءبىز 7 مامىردا جەر مەن تىلگە قاتىستى تاقىرىپتا وتەتىن بەيبىت جيىن كەزىندە قوعامدىق ءتارتىپتىڭ ساقتالۋىن قامتاماسىز ەتۋدى بيلىكتەن سۇرادىق. ولار جيىنعا رۇقسات بەرىلمەيتىنىن، ونى ميتينگ ەمەس، دوڭگەلەك ۇستەل تۇرىندە وتكىزۋدى ۇسىندى. بىراق ولارعا بەيبىت شەرۋ تۋرالى باستامانى حالىق كوتەرىپ وتىرعانىن، ءبىز تەك ۇيىمداستىرۋ القاسى رەتىندە بيلىككە سولاردىڭ تالابىن جەتكىزۋشى ەكەنىمىزدى ايتتىق»، – دەدى رىسبەك سارسەنباي.

ونىڭ سوزىنشە، بەلسەندىلەر الماتى بيلىگىنە «بەيبىت جيىن وتكىزۋدى قامتاماسىز ەتىپ، وعان قاتىسىپ، حالىقتىڭ تالاپ-تىلەگىن تىڭداۋدى» ۇسىنعان. سونىمەن بىرگە، رىسبەك سارسەنبايدىڭ ايتۋىنشا، ازاماتتىق قوعام وكىلدەرىنە پوليتسيانىڭ كۇش كورسەتىپ ۇستاۋى سياقتى وقيعالار قوعامدا تەك نارازىلىقتى كۇشەيتەتىنىن بەلسەندىلەر بۇگىنگى كەزدەسۋدە بيلىككە ەسكەرتكەن.

بەلسەندىلەردىڭ بەيبىت جيىن تۋرالى ۇسىنىسىنا بايلانىستى سەنبى كۇنى الماتى اكىمدىگىنەن كوممەنتاري الۋ مۇمكىن بولمادى.

ءساۋىردىڭ 24-ىنەن باستاپ اتىراۋ، اقتوبە، سەمەي جانە اقتاۋ قالالارىندا جەر داۋىنا قاتىستى بيلىك رۇقسات بەرمەگەن جيىندار جانە استانا، الماتى قالالارىندا جالعىز ادامدىق نارازىلىق اكتسيالارى وتكەن. ال ءساۋىردىڭ 29-ىندا استانا مەن الماتىدا جەر داۋىنا قاتىستى ءباسپاسوز ءماسليحاتىن وتكىزىپ، مالىمدەمە جاريالايمىز دەگەن قوعام بەلسەندىلەرى ۇستالعان.

ازات ەۋروپا / ازاتتىق راديوسى