جاھان جاڭالىقتارى سپورت شوۋ-بيزنيس
يسلامنىڭ جاڭا بەلەسى
kerey.kz
«قازاقستان» ۇلتتىق ارناسى وتانداسىمىز قانات يسلامنىڭ كاسىپقوي بوكستاعى 21-جەكپە-جەگىن تىكەلەي ەفيردە كورسەتۋدى جوسپارلاۋدا.
كاسىپقوي بوكس الەمىندە «قازاق» اتىمەن تانىلعان يسلامنىڭ بۇل جولعى قارسىلاسى 28 جاستاعى كولۋمبيالىق بىلعارى قولعاپ شەبەرى حۋان دە انحەل. باستى كەزدەسۋى يسلام مەن دە انحەل اراسىنداعى جەكپە-جەك بولىپ تابىلاتىن رەيتينگتىك بوكس كەشى 9 مامىر كۇنى اقش-تىڭ فلوريدا شتاتىنداعى لەيكلەند قالاسىندا استانا ۋاقىتىمەن تاڭعى 07:00-دە باستالماق.
كاسىپقوي بوكسقا 2012- جىلى اۋىسقان قانات يسلام بۇعان دەيىنگى وتكىزگەن 20 جەكپە-جەگىنىڭ بارلىعىندا جەڭىسكە جەتكەن. ونىڭ ىشىندەگى 17 كەزدەسۋدە وتانداسىمىز قارسىلاستارىن نوكاۋتقا تۇسىرگەن.
ال حۋان دە انحەلگە كەلەر بولساق، كولۋمبيالىق بوكسشى 2008 جىلدان كاسىپقويلار اراسىنداعى سىندارعا قاتىسىپ كەلەدى. شارشى الاڭدا 22 جەكپە-جەك وتكىزىپ 18-ءىن ءوز جەڭىسىمەن اياقتاعان. ۇشەۋىندە دە انحەلدىڭ قارسىلاستارى باسىم تۇسسە، ءبىر كەزدەسۋ (حۋاننىڭ كاسىپقوي رينگتەگى العاشقى جەكپە-جەگى) تەڭ ناتيجەمەن اياقتالعان.
قارسىلاسىنىڭ كاسىپقوي رينگتەگى تاجىريبەسى مول دەسەك تە، يسلامنىڭ مەكتەبى جاقسى. ءارى، وتانداسىمىز اۋەسقويلار اراسىنداعى سىنداردا تولاعاي تابىستارعا قول جەتكىزگەن بىرەگەي تۇلعالاردىڭ ءبىرى.
قىتايدا دۇنيەگە كەلگەن قانات اسپان استى ەلىنىڭ اتىنان ەكى رەت وليمپيادا ويىندارىنا قاتىسىپ، 2008 جىلى بەيجىڭ قالاسىندا وتكەن جازعى ويىنداردا قولا جۇلدەگە قول جەتكىزدى. يسلامنىڭ الەمگە كەڭىنەن تانىلعان كەزى دە سول وليمپيادامەن تۇسپا-تۇس كەلەدى.
2011 جىلى اتاجۇرتى – قازاقستانعا ورالعان قانات سول جىلى قۇرىلعان بۇكىلالەمدىك بوكس سەرياسىنداعى (WSB) اتاقتى Astana Arlans كومانداسىنا قابىلدانىپ، وتانداستارىن رينگتەگى جارقىن ونەرىمەن قۋانتادى.
بۇگىندە قانات امەريكا قۇراما شتاتتارىندا جاتتىعادى. باپكەرى – تانىمال امەريكالىق مامان نەلسون لوپەس. دە انحەلگە قارسى جەكپە-جەك – قاناتتىڭ كاسىپقوي بوكستاعى كەڭ اۋقىمدى تەلەارنا كورسەتەتىن العاشقى كەزدەسۋى.
وتانداسىمىزعا ساتتىلىك تىلەيمىز!
قىزىقتى كەزدەسۋدى جىبەرىپ الماي، بىزبەن بىرگە تاماشالاڭىزدار!
«قازاقستان» رترك» اق ءباسپاسوز قىزمەتى
پىكىر قالدىرۋ