اقتوبە تۇرعىندارىمەن سەنبى كۇنى كەزدەسىپ، جەر كودەكسىندەگى وزگەرىستەردى تۇسىندىرگەن وبلىس اكىمى بەردىبەك ساپارباەۆ سوڭعى اپتادا ەلدىڭ بىرنەشە ايماعىندا بولعان «جەرگە ساتۋعا قارسىلىق» شەرۋلەرىنە «باتىس اقشاسىنىڭ» قاتىسى بولۋى مۇمكىن دەپ مالىمدەگەن. بۇل تۋرالى جەرگىلىكتى «دياپازون» باسىلىمى حابارلاعان.

– الاڭعا شىعىپ ايعايعا باسقاننان ەشكىم ۇتپايدى. ءبىز ۋكراينادا نە بولىپ جاتقانىن كورىپ وتىرمىز. مەن كەشەگى كەزدەسۋدەن سوڭ (29 ساۋىردە وبلىس اكىمدىگىندە وتكەن بەلسەندىلەرمەن كەزدەسۋىن ايتادى – ازاتتىق) جاستارعا دۇرىس نارسەلەردى جەتكىزەر دەپ ويلاعان ەدىم. بىراق ولاي بولمادى، كەرىسىنشە، ستۋدەنتتەردى ساياباققا شىعىپ، جاڭاوزەن وقيعالارىن قايتالاۋعا شاقىرادى. مۇنىڭ ءبارى زاڭسىز. 27 ساۋىردەگى شەرۋ (اقتوبەدەگى – ازاتتىق) زاڭسىز بولدى. ءبىز ەشكىمدى قۋدالاعان جوقپىز، بىراق بەلسەندىلەرگە: «ونداي جاعدايدى قايتالاماڭدار. ەگەر قايتالايتىن بولساڭدار زاڭ الدىندا جاۋاپ بەرەسىڭدەر» دەپ ەسكەرتتىك. ءبىز نەگە باتىسقا تىعىلعان بىرەۋلەردىڭ ايتقانىن تىڭداۋىمىز كەرەك؟ نەگە ءبىز باتىستىڭ اقشاسىنا جۇمىس ىستەۋىمىز كەرەك؟ ۇلت نامىسى قايدا؟ – دەگەن ساپارباەۆتىڭ ءسوزىن كەلتىرگەن باسىلىم.

جەر تۋرالى زاڭداعى شەتەلدىكتەرگە جەردى جالعا بەرۋ مەرزىمىنىڭ 10 جىلدان 25 جىلعا دەيىن ۇلعايتىلۋىنا قاتىستى سۇراققا جاۋابىندا بەردىبەك ساپارباەۆتىڭ «بىزگە قارجى قاجەت» دەپ جاۋاپ بەرگەنىن جانە «ەگەر قارجى قۇياتىن بولسا – مەيلى، اۆستراليالىقتار يا يراندىقتار بولسىن – ولارعا العىس ايتامىز» دەگەنى تۋرالى جازادى جەرگىلىكتى گازەت.

– كوبىندە ەشتەڭە جوق، نە تەحنيكا، نە اقشا جوق. ال 24 جىلدىڭ ىشىندە ولاردىڭ قوجايىندارى تۇك بىتىرگەن جوق جانە ەشتەڭە بەرگىسى كەلمەيدى. ءبىز قاي جاقتان كەلسە دە، شەتەلدىك كاسىپورىندارمەن بىرلەسىپ جۇمىس ىستەۋدى قولدايمىز. ەڭ باستىسى – بىزگە قارجى كەرەك! – دەگەن اقتوبە وبلىسىنىڭ اكىمىن ءسوزىن كەلتىرگەن «دياپازون» باسىلىمى.

سونىمەن بىرگە كەزدەسۋ بارىسىندا 2016 جىلى قىتايدىڭ CNPC كومپانياسى اقتوبەدە 1 ميلليارد 300 ميلليون تەڭگەگە جاستار سارايىن سالۋدى جوسپارلاپ وتىرعانى ايتىلعان. بەردىبەك ساپارباەۆ «قىتايدى ماقتامايتىنىن» ايتقان، بىراق «سولاردىڭ ارقاسىندا بىزدە وتىن بەكەتىندە گاز ءليترىنىڭ باعاسى 20-28 تەڭگە»، ال وتكەن 19 جىلدىڭ ىشىندە كومپانيا «9 ميلليارد 100 ميلليون دوللار اكەلدى» دەپ مالىمدەگەن.

«دياپازون» باسىلىمىنىڭ جازۋىنشا، اكىممەن كەزدەسۋگە وبلىستىق ىشكى ىستەر دەپارتامەنتى باستىعى مەن وبلىس پروكۋرورى، سونىمەن بىرگە پارلامەنت سەناتى دەپۋتاتى ەلەۋسىن ساعىندىقوۆ قاتىسقان. كەزدەسۋ وتكەن دوستىق ءۇيىنىڭ اينالاسىن جاي كيىم كيگەن ادامدار قورشاپ، عيمارات جانىندا ارنايى تەحنيكا تۇرعان.

ازات ەۋروپا / ازاتتىق راديوسى