Aqtöbe twrğındarımen senbi küni kezdesip, Jer kodeksindegi özgeristerdi tüsindirgen oblıs äkimi Berdibek Saparbaev soñğı aptada eldiñ birneşe aymağında bolğan «jerge satuğa qarsılıq» şerulerine «Batıs aqşasınıñ» qatısı boluı mümkin dep mälimdegen. Bwl turalı jergilikti «Diapazon» basılımı habarlağan.

– Alañğa şığıp ayğayğa basqannan eşkim wtpaydı. Biz Ukrainada ne bolıp jatqanın körip otırmız. Men keşegi kezdesuden soñ (29 säuirde oblıs äkimdiginde ötken belsendilermen kezdesuin aytadı – Azattıq) jastarğa dwrıs närselerdi jetkizer dep oylağan edim. Biraq olay bolmadı, kerisinşe, studentterdi sayabaqqa şığıp, Jañaözen oqiğaların qaytalauğa şaqıradı. Mwnıñ bäri zañsız. 27 säuirdegi şeru (Aqtöbedegi – Azattıq) zañsız boldı. Biz eşkimdi qudalağan joqpız, biraq belsendilerge: «Onday jağdaydı qaytalamañdar. Eger qaytalaytın bolsañdar zañ aldında jauap beresiñder» dep eskerttik. Biz nege Batısqa tığılğan bireulerdiñ aytqanın tıñdauımız kerek? Nege biz Batıstıñ aqşasına jwmıs isteuimiz kerek? Wlt namısı qayda? – degen Saparbaevtıñ sözin keltirgen basılım.

Jer turalı zañdağı şeteldikterge jerdi jalğa beru merziminiñ 10 jıldan 25 jılğa deyin wlğaytıluına qatıstı swraqqa jauabında Berdibek Saparbaevtıñ «bizge qarjı qajet» dep jauap bergenin jäne «eger qarjı qwyatın bolsa – meyli, avstraliyalıqtar ya irandıqtar bolsın – olarğa alğıs aytamız» degeni turalı jazadı jergilikti gazet.

– Köbinde eşteñe joq, ne tehnika, ne aqşa joq. Al 24 jıldıñ işinde olardıñ qojayındarı tük bitirgen joq jäne eşteñe bergisi kelmeydi. Biz qay jaqtan kelse de, şeteldik käsiporındarmen birlesip jwmıs isteudi qoldaymız. Eñ bastısı – bizge qarjı kerek! – degen Aqtöbe oblısınıñ äkimin sözin keltirgen «Diapazon» basılımı.

Sonımen birge kezdesu barısında 2016 jılı Qıtaydıñ CNPC kompaniyası Aqtöbede 1 milliard 300 million teñgege jastar sarayın saludı josparlap otırğanı aytılğan. Berdibek Saparbaev «Qıtaydı maqtamaytının» aytqan, biraq «solardıñ arqasında bizde otın beketinde gaz litriniñ bağası 20-28 teñge», al ötken 19 jıldıñ işinde kompaniya «9 milliard 100 million dollar äkeldi» dep mälimdegen.

«Diapazon» basılımınıñ jazuınşa, äkimmen kezdesuge oblıstıq işki ister departamenti bastığı men oblıs prokurorı, sonımen birge parlament senatı deputatı Eleusin Sağındıqov qatısqan. Kezdesu ötken Dostıq üyiniñ aynalasın jay kiim kigen adamdar qorşap, ğimarat janında arnayı tehnika twrğan.

Azat Europa / Azattıq radiosı