اقتوبەدەگى اتىس، قاراپايىم لوگيكا
kerey.kz
مارات توكاشباەۆتىڭ facebook پاراقشاسىنان الىندى
اقتوبەدە اتىس قارۋلارى قولدانىلعان قاقتىعىس تۋرالى حابارلار توسىن ويلارعا جەتەلەيدى. قاراپايىم لوگيكا. بىرىنشىدەن، اقىل-ەسى ورنىندا جيىرما شاقتى جىگىت وقىستان قارۋ-جاراق دۇكەندەرىنە شابۋىل جاسايدى. ەگەر ولار بانديتتىك توپ بولسا نەمەسە شىنىمەن لاڭكەستەر بولسا الدىن الا دايىندىق جاساپ، جوسپار قۇرىپ، قاجەتتى قارۋ-جاراقتارىن ازىرلەپ الماس پا ەدى. ەشكىمنىڭ ەكى جانى جوق. قارۋ-جاراق دۇكەنىنە توبىمەن شابۋىل جاساۋى ولاردىڭ مۇنداي شەشىمگە اشىنعان كۇيدە اياق استىنان بارعاندىعىن بايقاتادى.
ەكىنشىدەن، قازاقستان تاجىريبەسىندە قۇقىق قورعاۋ ورگاندارى اقيقاتتى ەمەس، تەك وزدەرىنە ءتيىمدى اقپاراتتاردى عانا تاراتاتىنىن ەسكەرسەك، مۇنداي وقىس ارەكەتتىڭ ارىدە جاتقان وزىندىك سەبەپتەرى بار ەكەندىگى سەزىلەدى. سول سەبەپ نە؟ ول نەدەن تۋىندادى؟ شىندىقتى ءبىز ادەتتەگىدەي ءۇش-ءتورت جىلدان سوڭ عانا ءبىلىپ جۇرمەسەك بولعانى.
ءوز مىندەتتەرىن اتقارۋ ۇستىندە قازا تاپقان پوليتسيا قىزمەتكەرلەرى دە، شابۋىل جاساعان توپ مۇشەلەرى دە قازاقستان ازاماتتارى. قازا بولعانداردىڭ ءبارىنىڭ وتباسىلارىنا قايعىلارىنا ورتاقتاسىپ كوڭىل ايتامىز. قازاقستان زاڭدارى بويىنشا سوت دالەلدەپ شىققانعا دەيىن ەشكىمدى قىلمىسكەر، سودىر دەپ اتاۋعا بولمايدى. سوندىقتان يارلىق تاعۋعا اسىقپاي، ول ازاماتتاردى قارۋلى تەكە-تىرەسكە يتەرمەلەگەن نە نارسە ەكەنىن، تەتىگى قايدا جاتقانىن انىقتاۋ كەرەك دەپ ويلايمىن. «تەرىس اعىمداعى ءدىن ۇستانۋشىلار»، «قازاقستاندى ازات ەتۋ ۇيىمى» دەگەندەردىڭ ەشقايسىسى كوكەيگە قونبايدى. مۇنىڭ استارىندا ءبىر قۇپيا جاتقانى انىق. حالىق اقيقاتتى بىلۋگە مۇقتاج!
پىكىر قالدىرۋ