ناعىز اقىن تۋرالى ءتامسىل
kerey.kz
ءبىر سۇلتان باس ءۋازىرىن شاقىرىپ الىپ:
-مەنىڭ مەملەكەتىمدە قانشا اقىن بار؟-دەپ سۇراپتى.
-ءجۇز اقىن بار،-دەپ جاۋاپ بەرىپتى باس ءۋازىر.
-ولار نە جازىپ ءجۇر؟
-ءومىر، ماحاببات، عىلىم-ءبىلىم، جورىقتار تۋرالى. كوپشىلىگى ءسىزدى ماداقتاپ، ءبىرازى عايباتتاپ جازىپ قويادى.
-ولاردىڭ ىشىندەگى ناعىز اقىنى نەشەۋ؟
-البەتتە، ءسىزدىڭ اتاق-داڭقىڭىزدى كەلىستىرىپ جىرلاعاندارى ناعىز اقىن بولادى دا! جارتىسىنان كوبى!..
-مەن وسى تۇرعاندا ماقتاعانعا جاقسى بوپ، داتتاعانعا جامان بولىپ كەتپەسپىن. سوندىقتان، بۇگىننەن باستاپ، بۇكىل اقىندى ءبىرىن قالدىرماستان زىندانعا تاستا!- دەپ ءامىر بەرىپتى سۇلتان.
ايتتى – ءبىتتى! ونىڭ پارمەنى قولما-قول ورىندالادى.
ءبىر جىل وتكەندە سۇلتان ۋازىرىنەن تاعى سۇراپتى:
-قانە، مەنىڭ اقىندارىمنىڭ جاعدايى قالاي ەكەن؟ وتىر ما؟ قانشاسى جازىپ جاتىر؟
-ءبارى وتىر. ىشتەرىندە قىڭىر-قىرسىق ون اپەندى عانا جازۋىن ءالى قويار ەمەس. قالعاندارى قىسىمعا، قاپاس پەن قاماۋعا شىداماي جازۋدى دوعاردى،- دەپتى ءۋازىر.
-ەندەشە، سولاردىڭ ءبارىن بوساتىپ جىبەر، ال ىشىندەگى جازۋىن قويماعان الگى ون اقىندى الىپ قالىپ، ارقايسىسىنا سىي-سياپات كورسەتىپ، جەكە-جەكە سالتاناتتى سارايعا ورنالاستىرىپ، بارلىق جاعدايىن جاسا!- دەپ ءامىر ەتىپتى سۇلتان.
ايتتى – ءبىتتى! ونىڭ پارمەنى قولما-قول ورىندالادى.
تاعى ءبىر جىل وتكەندە ول باس ۋازىرىنەن:
-مەنىڭ اقىندارىم قالاي؟ ەندى قانشاسى ولەڭ جازۋىن جالعاستىرىپ جاتىر ەكەن؟– دەپ سۇراپتى.
-ءۇش-اق اقىن قالدى. قالعانى جاقسى تۇرمىستان توعايىپ، ماسايراپ، جازباي كەتتى،- دەپ جاۋاپ بەرىپتى ءۋازىر.
-ەندەشە، مىنە – ناعىز اقىن سول ۇشەۋى. تاۋقىمەتكە جاسىماعان، ماراپاتقا تاسىماعان سول ءۇش اقىندى ارداقتاپ، جازعانى مەن ايتقانىنا قۇلاق اسىڭدار! -دەگەن ەكەن سوندا سۇلتان.
Ulugbek Yesdauletءتىڭ facebook پاراقشاسىنان الىندى
پىكىر قالدىرۋ