نۇرسۇلتان نازارباەۆ جينالعاندارعا ارناعان سوزىندە مەملەكەتتىك تۋ ءاربىر قازاقستاندىق ءۇشىن قاسيەتتى قۇندىلىق بولىپ سانالاتىن ۇلتتىق بىرلىك نىشانى ەكەنىن اتاپ ءوتتى.

– بۇل – تاۋەلسىزدىگىنىڭ 25 جىلدىعىن بيىل تويلايتىن ەلىمىزدىڭ اسقاق ءرامىزى. ءبىز ەگەمەن قازاقستاندى وسى كوك تۋ استىندا بىرگە قۇردىق. شيرەك عاسىر ىشىندە قۋاتتى مەملەكەتتىڭ ىرگەسى بەرىك عيماراتىن بىرلەسىپ سالدىق. جاقىندا عانا رەسپۋبليكامىز بۇۇ قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلاندى. الەمدىك قوعامداستىق پلانەتاداعى بەيبىتشىلىك پەن قاۋىپسىزدىكتى قامتاماسىز ەتۋ ىسىنە اتسالىسۋ سىندى بيىك ميسسيانى قازاقستانعا سەنىپ تاپسىردى. بۇل –  ەلىمىزدىڭ بيىك بەدەلى مەن تابىستى دامۋىنىڭ مويىندالۋى. بۇۇ قاۋىپسىزدىك كەڭەسىندەگى جۇمىس ءبىزدىڭ تۋىمىزدى بۇرىنعىدان دا تانىمال ەتە تۇسەدى، – دەدى قازاقستان پرەزيدەنتى.

مەملەكەت باسشىسى رەسپۋبليكانىڭ جوعارى اسكەري وقۋ ورىندارىنىڭ بارلىق تۇلەكتەرىن قۇتتىقتاپ، قازاقستاندىق پاتريوتيزم ءتۇرلى سالادا، سونىڭ ىشىندە ەڭ الدىمەن وتانعا قىزمەت ەتۋدە كورىنىس تاباتىنىن ايتتى.

– بۇگىن ءبىز جوعارى اسكەري وقۋ ورىندارىنىڭ ۇزدىك تۇلەكتەرىنە وفيتسەرلىك شەندەر تاپسىرامىز. وسى كۇندەرى مىڭداعان قازاقستاندىق جاس وقۋىن اياقتاپ، ۇلكەن ومىرگە اياق باسادى. سىزدەر ءوز جولدارىڭىزدى ەلدىڭ باس بايراعىنىڭ الدىندا، سالتاناتتى جاعدايدا باستاپ وتىرسىزدار. بۇل كەزدەيسوقتىق ەمەس، ويتكەنى سىزدەر قوعامدا قۇرمەتكە يە ايرىقشا ماماندىقتى تاڭدادىڭىزدار. سىزدەر بىرنەشە جىلدى جاقسى ءبىلىم الۋعا، جاڭا ماشىقتاردى يگەرۋگە، دوستىق پەن ءوزارا كومەكتىڭ قۇندىلىعىن تۇسىنۋگە ارنادىڭىزدار. ەندى وسىنىڭ ءبارىن تاجىريبەدە قولدانۋ كەرەك، – دەدى نۇرسۇلتان نازارباەۆ.

قازاقستان پرەزيدەنتى مەملەكەتتىك تۋ كوتەرۋ ءراسىمى ءداستۇر بويىنشا استانا كۇنىنە ارنالعان ءىس-شارالاردىڭ باستاۋى بولىپ سانالاتىنىنا نازار اۋداردى.

– بيىل ءبىز استانانىڭ 18 جىلدىعىن – كامەلەتتىك جاسقا تولۋىن اتاپ وتەمىز. بۇل – بيىكتەر باعىندىرىلعان جانە سول بيىكتەن جاڭا پەرسپەكتيۆالار كورىنىپ تۇرعان كەز. تاۋەلسىزدىك تۋدىرعان استانا قۇلپىرعان ۇستىنە قۇلپىرىپ، قارىشتاپ وسۋدە. بۇل قالا ەلدى بىرىكتىرىپ، جاڭا تابىستارعا جەتەلەپ، كوش باسىندا كەلەدى، – دەدى مەملەكەت باسشىسى.

سونداي-اق نۇرسۇلتان نازارباەۆ ەلوردانىڭ ميلليونىنشى تۇرعىنى ومىرگە كەلگەنىن ايتتى.

– بۇگىن ەرتەڭگىسىن مۇحامەدياروۆتار وتباسىندا استانانىڭ ميلليونىنشى تۇرعىنى ومىرگە كەلگەنىن زور قۋانىشپەن حابارلايمىن. ءسابيدىڭ اناسى – بالاباقشا تاربيەشىسى، اكەسى – ەلەكتر مونتەرى. ەندى ءبىزدىڭ ەلوردا ميلليون تۇرعىنى بار قالالار قاتارىنا ەندى، – دەدى قازاقستان پرەزيدەنتى.

سوڭىندا نۇرسۇلتان نازارباەۆ بارشا قازاقستان حالقىن الداعى استانا كۇنىمەن قۇتتىقتاپ، بەيبىتشىلىك پەن تاتۋلىق، تىنىشتىق پەن باق-بەرەكە تىلەدى.