Nwrswltan Nazarbaev jinalğandarğa arnağan sözinde memlekettik tu ärbir qazaqstandıq üşin qasietti qwndılıq bolıp sanalatın wlttıq birlik nışanı ekenin atap ötti.

– Bwl – täuelsizdiginiñ 25 jıldığın biıl toylaytın elimizdiñ asqaq rämizi. Biz egemen Qazaqstandı osı kök tu astında birge qwrdıq. Şirek ğasır işinde quattı memlekettiñ irgesi berik ğimaratın birlesip saldıq. Jaqında ğana respublikamız BWW Qauipsizdik keñesiniñ twraqtı emes müşesi bolıp saylandı. Älemdik qoğamdastıq planetadağı beybitşilik pen qauipsizdikti qamtamasız etu isine atsalısu sındı biik missiyanı Qazaqstanğa senip tapsırdı. Bwl –  elimizdiñ biik bedeli men tabıstı damuınıñ moyındaluı. BWW Qauipsizdik keñesindegi jwmıs bizdiñ tuımızdı bwrınğıdan da tanımal ete tüsedi, – dedi Qazaqstan Prezidenti.

Memleket basşısı respublikanıñ joğarı äskeri oqu orındarınıñ barlıq tülekterin qwttıqtap, qazaqstandıq patriotizm türli salada, sonıñ işinde eñ aldımen Otanğa qızmet etude körinis tabatının ayttı.

– Bügin biz joğarı äskeri oqu orındarınıñ üzdik tülekterine oficerlik şender tapsıramız. Osı künderi mıñdağan qazaqstandıq jas oquın ayaqtap, ülken ömirge ayaq basadı. Sizder öz joldarıñızdı eldiñ bas bayrağınıñ aldında, saltanattı jağdayda bastap otırsızdar. Bwl kezdeysoqtıq emes, öytkeni sizder qoğamda qwrmetke ie ayrıqşa mamandıqtı tañdadıñızdar. Sizder birneşe jıldı jaqsı bilim aluğa, jaña maşıqtardı igeruge, dostıq pen özara kömektiñ qwndılığın tüsinuge arnadıñızdar. Endi osınıñ bärin täjiribede qoldanu kerek, – dedi Nwrswltan Nazarbaev.

Qazaqstan Prezidenti memlekettik tu köteru räsimi dästür boyınşa Astana künine arnalğan is-şaralardıñ bastauı bolıp sanalatınına nazar audardı.

– Biıl biz Astananıñ 18 jıldığın – kämelettik jasqa toluın atap ötemiz. Bwl – biikter bağındırılğan jäne sol biikten jaña perspektivalar körinip twrğan kez. Täuelsizdik tudırğan Astana qwlpırğan üstine qwlpırıp, qarıştap ösude. Bwl qala eldi biriktirip, jaña tabıstarğa jetelep, köş basında keledi, – dedi Memleket basşısı.

Sonday-aq Nwrswltan Nazarbaev elordanıñ millionınşı twrğını ömirge kelgenin ayttı.

– Bügin erteñgisin Mwhamediyarovtar otbasında Astananıñ millionınşı twrğını ömirge kelgenin zor quanışpen habarlaymın. Säbidiñ anası – balabaqşa tärbieşisi, äkesi – elektr monteri. Endi bizdiñ elorda million twrğını bar qalalar qatarına endi, – dedi Qazaqstan Prezidenti.

Soñında Nwrswltan Nazarbaev barşa Qazaqstan halqın aldağı Astana künimen qwttıqtap, beybitşilik pen tatulıq, tınıştıq pen baq-bereke tiledi.