Жаңалықтар Зуқа батыр 150 жыл Зуқа батыр 150 жыл Тұлғалар Қазақ хандығына 550 жыл Әдеби әлем
Ел ордамыз Астанада «Тәуелсіздік арманы және Зуқа батыр» атты халықаралық ғылыми-теориялық конференция өтті
Астанадағы ҚР Қарулы Күштерінің Әскери-тарихи музейінде, Алтай қазақтарын Алаш идеясының айналасына біріктіріп, ұлт-азаттық көтеріліске бастаған қаһарман батырларымыздың бірі – Зуқа Сәбитұлының 150 жылдығы салтанатты түрде аталып өтілді. Өзінің саналы ғұмырын ұлтын бодандықтан азат етуге арнап, осы жолда ерлікпен қаза тапқан Зуқа батыр Сәбитұлының 150 жылдық мерей тойының Тәуелсіздігіміздің 25 жылдығымен түспа-түс келуінің символдық мәні бар.
Іс-шара басталар алдында әр аймақтан келген қонақтар Астанадағы қорымда болып, Кенесары сарбаздары мен алаш ардагері Смағұл Сәдуақасұлы рухына бағыштап құран оқытып, дұға бағыштады. Зуқа батыр Сәбитұлына арналған деректі фильм көрсетілді, Зуқа батырдың өмірін зерттеп жүрген жас дарынды ғалымға арнайы стипендия тағайындау рәсімі өтті, шығармашылық бәйге жеңімпаздары марапатталды, Зуқа батыр жөнінде жазылған кітаптардың таныстырымы болды, кешке батырдың ұрпақтары Әзірет Сұлтан мешітінде мерейтойға қатысушыларға ауыз аштырды.
Конференция жұмысына белгілі ғалымдар, мемлекет қайраткерлері, жас тарихшылар (студенттер, магистранттар, докторанттар) және БАҚ өкілдері қатысты. Атап айтқанда, Т. Мамашев, С. Әбдірахманов, Ж. Оспанов, Д. Қамзабекұлы, Ғ. Есім, Қ. Қалиасқарұлы, С. Негимов, Т. Жұртбай, П. Утепова, Б. Әбдіғалиұлы, С. Аққұлұлы, З. Қабылдинов, Б. Смағұл, Ө. Алтын, Қ. Шолпан, Қ. Айдархан, Ү. Құрманбай, Б. Ахметұлы, С. Мәкен, С. Ерғали, О. Жәлелұлы, Ы. Ожай, Т. Мамашев, С. Еңсегенов, А. Тасболатов, П. Ленский, К. Гүлтүрік, Ө. Озғанбаев, Б. Аяған, Д. Каусылов, Ж. Жекибаева және т.б.
Зуқа батыр- 1866 жылы қазіргі Шығыс Қазақстан облысының Зайсан ауданында дүниеге келген. Зуқаның әкесі шығыс өңіріне аса танымал болған Сәбит дамолла. Арғы атасы Нұрмұхаммед абыз. Текті әулеттен шыққан батыр бабамыз, орыс отаршылдығы мен гоминдаң қытай езгісіне тап болған қазақ халқын азат ету жолында қаза табады. Биыл батыр бабамыздың туғанына 150 жыл толды.
Зуқа батыр Сәбитұлы – өмірі мен күресі Б. Кұсбегиннің «Зуқа батыр» романы, Қ. Шабданұлының «Пана» романы, Байахмет Жұмабайұлының «Сағыныш» романы мен Б. Бәмішұлының «Зуқа батыр» дастанына арқау болған, атағы алты алаштан асып, Еуропаға жеткен тарихи тұлға.
«Тәуелсіздік арманы және Зуқа батыр» атты халықаралық ғылыми-теориялық конференцияның
ҚАРАРЫ
Қазақстанның тәуелсіздігін, әскери тарихының маңызын және саналы ғұмырын ұлтын азат етуге арнап, осы жолда ерлікпен қаза тапқан Зуқа Батыр Сәбитұлының қайраткерлігін халыққа кеңінен насихаттау мақсатында, конференцияға қатысушылар төмендегідей қарар қабылдады:
- «Қазпошта» АҚ Зуқа батыр Сәбитұлының 150-жылдығына арналған пошта маркасын шығарып, оны төлем құралы ретінде пайдалану;
- ҚР Ұлттық банкіне Зуқа Батыр Сәбитұлының 150-жылдығына арналған мерейтойлық монета шығару;
- ҚР Білім және ғылым министрлігіне философия докторы (PhD) атағына ізденушілерге Зуқа батыр Сәбитұлының өмірі мен қызметін зерттеуге бағытталған тақырыптар беру;
- Мектепке және ЖОО-на арналған оқулық авторларына шетелдегі қандастарымыздың да ұлт игілігі үшін атқарған еңбектері, атап айтқанда Зуқа батыр Сәбитұлы жайлы мәлімет қосу;
- ҚР Үкіметі жанындағы Республикалық ономастика комиссиясына Астана қаласында және еліміздің бірқатар қалаларында көшелерге Зуқа Батыр Сәбитұлының есімін беру;
- ҚР ҚК Әскери-тарихи музейінде Зуқа Батыр Сәбитұлына арналған тұрақты арнайы экспозиция ұйымдастыру;
- «Зуқа Батыр Сәбитұлы» қоғамдық қорына – Зуқа Батыр Сәбитұлының тұлғасын жас ұрпақ арасында насихаттауға бағытталған, мектеп оқушыларына арналған үш тілде құжаттарға негізделген ғылыми-көпшілік кітап шығару;
- «Зуқа Батыр Сәбитұлы» қоғамдық қорына және Астана қаласының әкімдігіне Елордамыз бен еліміздің бірқатар қалаларында ескерткіш орнату туралы
жазбаша ұсыныс енгізсін.
Конференцияны ұйымдастырушылар мен пікіралмасу алқасының барлық қатысушылары осы ұсыныстардың аяқсыз қалмайтынына және аталған бағыттағы жұмыстардың бірлесіп атқарылатынына сенім артады.
Жұмабай Мәдібайұлы
kerey.kz
Пікір қалдыру