پرەمەر-مينيستر كارىم ءماسىموۆ ۇكىمەت وتىرىسى بارىسىندا مەملەكەتتىك ورگاندارعا بايان-ولگەيدە (موڭعوليا) تۇراتىن ەتنيكالىق قازاقتارعا قولداۋ كورسەتۋ بويىنشا بىرقاتار تاپسىرمالار بەردى، – دەپ حابارلايدى Tengrinews.kz تىلشىسى ۇكىمەت باسشىسىنىڭ سايتىنا سىلتەمە جاساپ.

“بايان-ولگەيدەگى قازاقتاردى قولداۋعا بايلانىستى تاپسىرمالار بەردىم”، – دەپ جازدى كارىم ءماسىموۆ تۆيتتەردەگى پاراقشاسىندا.

ەسكە سالساق, وتكەن اپتادا مەملەكەت باسشىسى نۇرسۇلتان نازارباەۆتىڭ تاپسىرماسىمەن ءماسىموۆ 10 شىلدەدە سەل كوشكەن موڭعولياداعى بايان-ولگەي وكرۋگىندەگى ولگەي قالاسىنا باردى. توتەنشە جاعداي ناتيجەسىندە 100-دەن استام ءۇي قيراپ، 700 ادام باسپاناسىز قالدى.

ولگەي قالاسىنداعى قازاق دياسپوراسىنىڭ وكىلدەرىمەن كەزدەسۋدە كارىم ءماسىموۆ پرەزيدەنت نۇرسۇلتان نازارباەۆتىڭ تاپسىرماسىمەن قر ۇكىمەتى سەل كوشكىنىنەن زارداپ شەككەن وتباسىلارعا قارجىلاي كومەك كورسەتەتىنىن مالىمدەگەن بولاتىن.

موڭعولياعا ساپارلارىنىڭ جانە قالا باسشىلىعىمەن كەزدەسۋلەردىڭ قورىتىندىسى بويىنشا قازاقستان پرەمەر-ءمينيسترى قازاقستاندىق مەملەكەتتىك ورگاندارعا بىرقاتار تاپسىرمالار بەردى. اتاپ ايتقاندا، مادەنيەت جانە سپورت مينيسترلىگىنە قازاقستان - موڭعوليا گۋمانيتارلىق قورىن قۇرۋ تۋرالى ماسەلەنى قاراۋ، سونداي-اق “التاي - بىزدىڭ ورتاق ءۇيىمىز” ەكونوميكالىق جانە مادەني-گۋمانيتارلىق جوباسىن قۇرۋ تۋرالى ۇسىنىستاردى پىسىقتاۋ تاپسىرىلدى.

بۇدان وزگە، ءماسىموۆ بايان-ولگەيدەگى ولكەتانۋ مۇراجاي مەن مۋزىكالىق-دراما تەاترىنىڭ ساxناسىن جوندەۋگە قارجىلاي كومەك كورسەتۋ ماسەلەسىن زەرتتەۋدى تاپسىردى.

ينۆەستيتسيالار جانە دامۋ مينيسترلىگىنە بايان-ولگەي - الماتى، بايان-ولگەي - وسكەمەن باعىتتارى بويىنشا اۋە قاتىناسىن اشۋ تۋرالى ماسەلەنى پىسىقتاۋ تاپسىرىلدى.

اۋىل شارۋاشىلىعى مينيسترلىگىنە - موڭعوليادا سەمەي ەت كومبيناتىنا ارناپ ەت ساتىپ الۋ، سونداي-اق مال شارۋاشىلىعى كلاستەرىن قۇرۋ مۇمكىندىگىن قاراۋ تاپسىرىلدى.

سىرتقى ىستەر مينيسترلىگىنە بايان-ولگەيدە كونسۋلدىق قىزمەت اشۋ جانە وعان قوسا ۇلان-باتىر قالاسىندا قازاقستان ەلشىلىگىنىڭ عيماراتىن سالۋ تاپسىرىلدى.

پرەمەر-مينيستر سونداي-اق قر ءبىلىم جانە عىلىم مينيسترلىگىنە موڭعوليادا تۇرىپ جاتقان ەتنيكالىق قازاقتاردىڭ قازاقستان جوو-دارىندا وقۋىنا كۆوتالاردى ۇلعايتۋدى تاپسىردى.