لەۆيت رينگتە وتە بەلسەندى بولدى. ءۇش راۋند بويى شابۋىلداپ، قارسىلاسىنا ءبىراز سوققى دارىتتى. ال رەسەيلىك بوكسشى كەزدەسۋ بويى قورعانا ءجۇرىپ، قارسىلاسۋ تاكتيكاسىن وزگەرتپەدى. ءۇشىنشى راۋندتا لەۆيتتەن اۋىر سوققى العان تيششەنكونىڭ قاباعى جارىلىپ، دارىگەر كومەگىنە جۇگىندى.

ۆاسيلي لەۆيت پەن ەۆگەني تيششەنكو كەزدەسۋىنىڭ ءبىر ءساتى.

ءۇش راۋندتىڭ قورىتىندىسى بويىنشا يرلانديا، كولۋمبيا جانە الجيردەن كەلگەن تورەشىلەر جەڭىستى تيششەنكوعا بەردى. بوكس ءوتىپ جاتقان Rioسentro كەشەنىنە جينالعان بارلىق جانكۇيەرلەر تورەشىلەردىڭ شەشىمىنە نارازى بولىپ، ۇزاق ۋاقىت گۋىلدەپ، ال رەفەري رەسەيلىك بوكسشىنىڭ قولىن كوتەرگەن ساتتە بۇكىل زالداعى كورەرمەن «قازاقستان» دەپ ايعايلاپ تۇرىپ الدى. ۆاسيلي لەۆيتتىڭ ءوزى تاڭدانىسىن جاسىرا الماي، باسىن شايقادى.

ماراپاتتاۋ راسىمىندە دە ۆاسيلي لەۆيت تۇعىرعا كوتەرىلگەن ساتتە جانكۇيەرلەر وعان ۇزاق قول سوعىپ، قوشەمەت كورسەتتى. بوكسشىنىڭ ءوزى تۇعىردا كوز جاسىن ءسۇرتىپ تۇردى. ال رەسەيلىك تيششەنكو التىن العاندا زالداعى كورەرمەندەردىڭ بارلىعى دەرلىك قارسى ەكەنىن ءبىلدىرىپ جاتتى. بىراق لەۆيتتىڭ ءوزى قولىن كوتەرىپ، ولاردان تىنىشتىق ساقتاۋدى سۇرادى.

قازاقستان مەن رەسەيلىك تاراپتىڭ پىكىرى

فينالدىق كەزدەسۋدەن كەيىن سپورتشىلار جۋرناليستەرگە سۇحبات بەرەتىن ميكست-زونادا رەسەي مەن قازاقستان جۋرناليستەرى ءبىراز سوزگە كەلىپ، ەگەسىپ تە قالدى. قازاقستان تىلشىلەرى فينالدىڭ ءادىل بولماعانىنا نارازىلىق بىلدىرسە، رەسەي جۋرناليستەرى «تيششەنكو ساۋاتتى قورعانا ءجۇرىپ، سوققىنى از جاساسا دا ءدال تيگىزگەنىن» ايتىپ جاتتى. ال قازاقستان قۇراماسىنىڭ باس باپكەرى مىرزاعالي ايتجانوۆ «ءسوزىم جوق» دەپ قىسقا قايىردى.

فينالدان كەيىن قازاقستان قۇراماسىنىڭ باس باپكەرى مىرزاعالي ايتجانوۆ ۆاسيلي لەۆيتتىڭ قولىن كوتەرىپ تۇر. ريو-دە-جانەيرو، 15 تامىز 2016 جىل.

ۆاسيلي لەۆيت مەدالىن العان سوڭ «جەڭدىم دەپ ويلادىم. بىراق جان-جاقتا وتىرعان تورەشىلەر باسقا جەكپە-جەكتى كورگەن سياقتى. باستىسى جاتتىقتىرۋشىلار قويعان بارلىق تاكتيكانى ورىندادىم. وليمپياداعا كەلگەن بارلىق سپورتشى چەمپيون بولۋعا كەلەدى. بىراق بۇل جولى ءبىر ساتى تومەن تۇرامىن» دەدى.

ال رەسەي بوكسشىسى تيششەنكو «كەزدەسۋدىڭ قورىتىندىسى تۋرالى ايتۋ قيىن. ەگەر مەن ادىلەتسىز تۇردە جەڭىسكە جەتسەم، قارسىلاسىمنان كەشىرىم سۇرايمىن. مەن جەڭىسكە جەتتىم بە، الدە ۇتىلدىم با – تولىق تۇسىنبەدىم. سەكۋندانتتارىم دا بىلمەگەن بولار. كەزدەسۋدىڭ ناتيجەسىن كۇتىپ تۇردىم. جەڭىس ماعان بەرىلگەنىنە وتە قۋانىشتىمىن» دەپ جاۋاپ بەردى.

ماراپاتتاۋ كەزىندە رەسەي بوكسشىسى ەۆگەني تيششەنكو قازاقستان بوكسشىسى ۆاسيلي لەۆيتتىڭ قولىن الىپ تۇر. ريو-دە-جانەيرو، 15 تامىز 2016 جىل.

رەسەي بوكس قۇراماسىنىڭ باپكەرى الەكساندر لەبزياك «تيششەنكو ەكى راۋندتا جەڭىسكە جەتتى. العاشقى ەكى راۋندتا لەۆيتكە باپكەرلەرى جەڭىلىپ جاتىرسىڭ دەپ ەسكەرتسە كەرەك. ول ءۇشىنشى راۋندتا كوپ سوققى جاساي باستادى. تورەشىلەرگە ءبىز اسەر ەتە المايمىز. بىراق تيششەنكو تازا جەڭدى» دەدى.

#LEVIT

فينال شەشىمى شىققاننان كەيىن Twitter الەۋمەتتىك جەلىسىندە بوكس ساراپشىلارى مەن جانكۇيەرلەر لەۆيتتىڭ جەڭىسكە جەتكەنىن، تورەشىلەردىڭ شەشىمىنە نارازىلىعىن ءبىلدىرىپ جاتتى. ءسويتىپ قازاقستاندىق بوكسشىنى قولداۋ ءۇشىن #Levit حەشتەگى اشىلدى.

بوكس پروموۋتەرى لۋ ديبەللا Twitter پاراقشاسىندا “مەنىڭ ويىمشا، AIBA – مافيا. بۇل – تاريح ءۇشىن دە، وليمپيادا ۇشىندە ماسقارا” دەپ جازدى.

بوكس ساراپشىسى دەن رافاەل “ريو ويىندارىنداعى بۇعان دەيىنگى كەزدەسۋلەردە تورەشىلەر جاقسى جۇمىس ىستەپ ەدى. بىراق بۇگىنگى (تيششەنكو-لەۆيت ماتچى) تورەشىلەردىڭ جۇمىسى جامان، وتە جامان” دەگەن پىكىر ءبىلدىردى.

كاسىپقوي بوكسشى سەرحيو راميرەستىڭ پىكىرىنشە، “بۇل جەكپە-جەكتە قازاقستان بوكسشىسى جەڭىسكە جەتكەن”. ال رايان چيك ەسىمدى جانكۇيەر “لەۆيتتى تازا جىعىپ بەردى. لەۆيت 30:27 ەسەبىمەن جەڭدى دەپ ويلاعام. ەكىنشى راۋند تەڭ بولعان شىعار، بىراق ءبىرىنشى جانە ءۇشىنشى راۋندتا ول تازا جەڭدى. ادىلەتسىز تورەلىك” دەپ جازعان.

​

ەلدەگى ساراپشىلار

Statsport.kz سايتىنىڭ رەداكتورى، سپورت ءجۋرناليسى ەسەي جەڭىسۇلى «لەۆيت جەڭىلگەن جوق، ونىڭ كۇمىسىن التىننان جوعارى باعالاۋىمىز كەرەك» دەيدى.

سپورت كوممەنتاتورى ەسەي جەڭىسۇلى. سۋرەت جەكە مۇراعاتتان الىندى.

- لەۆيت بويى ۇزىن تيششەنكونىڭ ارتىلىپ الىپ، كۇشىن جوعالتۋىنا مۇلدە مۇمكىندىك بەرمەدى. الىستان سوققىلار جاسادى. بۇل تيششەنكو ءۇشىن كۇتپەگەن جاعداي بولدى، ول مۇلدە داعدارىپ قالدى. لەۆيتتىڭ باسىمدىعى كۇمان تۋدىرمادى. 3-راۋندتا جەكپە-جەكتى ايالداتىپ، تيششەنكو جاراقاتىن وتىرىك تاڭباعاندا، نوكداۋنعا ءتۇسۋى مۇمكىن ەدى. سودان كەيىن دە لەۆيت ءبىر مينۋت توپەلەدى. تيششەنكو قولىن كوتەرە المادى. بوكس ادىلەتسىز سپورتقا اينالدى. امال جوق، كوندىگەمىز، – دەيدى جۋرناليست.

ەسەي جەڭىسۇلىنىڭ ويىنشا، «ءبىز ەندى لەۆيتتىڭ كۇمىسىن التىننان جوعارى دەپ باعالاۋىمىز كەرەك».

- 91 كيلوگرامدا قازاقستاننىڭ بىردە-ءبىر بوكسشىسى وليمپيادالارعا – اتلانتا، افينا، سيدنەي، لوندون، پەكين ويىندارىنا قاتىسپادى. ءبىرىنشى رەت قاتىستىق جانە كۇمىس الدىق. ونى التىننان جوعارى دەپ باعالايمىن، – دەيدى سپورت ءتىلشىسى.

سپورت ءجۋرناليسى قۇرالبەك ورداباەۆ. الماتى، 10 ءساۋىر 2013 جىل.

ال بەلگىلى ارداگەر سپورتشى قۇرالبەك ورداباەۆتىڭ پىكىرىنشە، رەسەي بوكسشىسىنا جەڭىستى «تورەشى الىپ بەردى» دەۋ دۇرىس ەمەس.

- بىزدەگى ءبىر جامان نارسە – ۇتىلىپ قالسا تورەشى كىنالى. ءبىر ادام شەشپەيدى، بەس كىسى وتىرىپ رەسەي بوكسشىسىنا بەردى. ەندى جۋرناليستەر تورەشى بەردى دەيدى، ول دۇرىس ەمەس، بەس تورەشى شەشىمىمەن ۇتىلدى ما، وندا ۇتىلدى. ەندى كەلەسى جارىستارعا دۇرىس دايىندالۋ كەرەك. تورەشىلەر شەشىمىنە توقتالۋىمىز كەرەك، – دەيدى.

ال AIBA (حالىقارالىق بوكس قاۋىمداستىعى) پرەزيدەنتى چينگ-كۋو ۆۋ «تورەشىلەر جۇمىسىن تۇرلىشە باعالاۋعا بولادى، بىراق ولار شەشىمدەرىن شىعاردى، ول شەشىمدى قۇرمەتتەۋ كەرەك» دەگەن.

ريو وليمپياداسىندا ءالى قازاقستاندىق ءۇش بوكسشى جۇلدەگە تالاسادى. 69 كيلوگرامم سالماق دارەجەسىندە دانيار ەلەۋسىنوۆ فينالعا شىقتى. ونىڭ قارسىلاسى – وزبەكستاندىق شاحرام گياسوۆ. ال ادىلبەك نيازىمبەتوۆ (81 كگ) – جارتىلاي فينالدا، يۆان دىچكو (+91 كگ) شيرەك فينالدا بوكستاسادى.

ۆاسيلي لەۆيتتىڭ – كۇمىس، الەكساندر زايچيكوۆتىڭ (اۋىر اتلەت) قولا مەدالىمەن تامىزدىڭ 16-سى كۇنگى ەسەپتە قازاقستان 15-ورىندا تۇر. قازىر قازاقستان قورجىنىندا 10 مەدال بار. ونىڭ ەكەۋى – التىن، ۇشەۋى – كۇمىس، بەسەۋى – قولا جۇلدە.

“ازاتتىق” راديوسى