Levit ringte öte belsendi boldı. Üş raund boyı şabuıldap, qarsılasına biraz soqqı darıttı. Al reseylik boksşı kezdesu boyı qorğana jürip, qarsılasu taktikasın özgertpedi. Üşinşi raundta Levitten auır soqqı alğan Tişenkonıñ qabağı jarılıp, däriger kömegine jügindi.

Vasiliy Levit pen Evgeniy Tişenko kezdesuiniñ bir säti.

Üş raundtıñ qorıtındısı boyınşa Irlandiya, Kolumbiya jäne Aljirden kelgen töreşiler jeñisti Tişenkoğa berdi. Boks ötip jatqan Riosentro keşenine jinalğan barlıq janküyerler töreşilerdiñ şeşimine narazı bolıp, wzaq uaqıt guildep, al referi Reseylik boksşınıñ qolın kötergen sätte bükil zaldağı körermen «Qazaqstan» dep ayğaylap twrıp aldı. Vasiliy Levittiñ özi tañdanısın jasıra almay, basın şayqadı.

Marapattau räsiminde de Vasiliy Levit twğırğa köterilgen sätte janküyerler oğan wzaq qol soğıp, qoşemet körsetti. Boksşınıñ özi twğırda köz jasın sürtip twrdı. Al reseylik Tişenko altın alğanda zaldağı körermenderdiñ barlığı derlik qarsı ekenin bildirip jattı. Biraq Levittiñ özi qolın köterip, olardan tınıştıq saqtaudı swradı.

QAZAQSTAN MEN RESEYLİK TARAPTIÑ PİKİRİ

Finaldıq kezdesuden keyin sportşılar jurnalisterge swhbat beretin mikst-zonada Resey men Qazaqstan jurnalisteri biraz sözge kelip, egesip te qaldı. Qazaqstan tilşileri finaldıñ ädil bolmağanına narazılıq bildirse, Resey jurnalisteri «Tişenko sauattı qorğana jürip, soqqını az jasasa da däl tigizgenin» aytıp jattı. Al Qazaqstan qwramasınıñ bas bapkeri Mırzağali Aytjanov «sözim joq» dep qısqa qayırdı.

Finaldan keyin Qazaqstan qwramasınıñ bas bapkeri Mırzağali Aytjanov Vasiliy Levittiñ qolın köterip twr. Rio-de-Janeyro, 15 tamız 2016 jıl.

Vasiliy Levit medalin alğan soñ «Jeñdim dep oyladım. Biraq jan-jaqta otırğan töreşiler basqa jekpe-jekti körgen siyaqtı. Bastısı jattıqtıruşılar qoyğan barlıq taktikanı orındadım. Olimpiadağa kelgen barlıq sportşı çempion boluğa keledi. Biraq bwl jolı bir satı tömen twramın» dedi.

Al Resey boksşısı Tişenko «Kezdesudiñ qorıtındısı turalı aytu qiın. Eger men ädiletsiz türde jeñiske jetsem, qarsılasımnan keşirim swraymın. Men jeñiske jettim be, älde wtıldım ba – tolıq tüsinbedim. Sekundanttarım da bilmegen bolar. Kezdesudiñ nätijesin kütip twrdım. Jeñis mağan berilgenine öte quanıştımın» dep jauap berdi.

Marapattau kezinde Resey boksşısı Evgeniy Tişenko Qazaqstan boksşısı Vasiliy Levittiñ qolın alıp twr. Rio-de-Janeyro, 15 tamız 2016 jıl.

Resey boks qwramasınıñ bapkeri Aleksandr Lebzyak «Tişenko eki raundta jeñiske jetti. Alğaşqı eki raundta Levitke bapkerleri jeñilip jatırsıñ dep eskertse kerek. Ol üşinşi raundta köp soqqı jasay bastadı. Töreşilerge biz äser ete almaymız. Biraq Tişenko taza jeñdi» dedi.

#LEVIT

Final şeşimi şıqqannan keyin Twitter äleumettik jelisinde boks sarapşıları men janküyerler Levittiñ jeñiske jetkenin, töreşilerdiñ şeşimine narazılığın bildirip jattı. Söytip qazaqstandıq boksşını qoldau üşin #Levit heştegi aşıldı.

Boks promouteri Lu Dibella Twitter paraqşasında “Meniñ oyımşa, AIBA – mafiya. Bwl – tarih üşin de, Olimpiada üşinde masqara” dep jazdı.

Boks sarapşısı Den Rafael' “Rio oyındarındağı bwğan deyingi kezdesulerde töreşiler jaqsı jwmıs istep edi. Biraq bügingi (Tişenko-Levit matçı) töreşilerdiñ jwmısı jaman, öte jaman” degen pikir bildirdi.

Käsipqoy boksşı Serhio Ramirestiñ pikirinşe, “Bwl jekpe-jekte Qazaqstan boksşısı jeñiske jetken”. Al Rayan Çik esimdi janküyer “Levitti taza jığıp berdi. Levit 30:27 esebimen jeñdi dep oylağam. Ekinşi raund teñ bolğan şığar, biraq birinşi jäne üşinşi raundta ol taza jeñdi. Ädiletsiz törelik” dep jazğan.

​

ELDEGİ SARAPŞILAR

Statsport.kz saytınıñ redaktorı, sport jurnalisi Esey Jeñiswlı «Levit jeñilgen joq, onıñ kümisin altınnan joğarı bağalauımız kerek» deydi.

Sport kommentatorı Esey Jeñiswlı. Suret jeke mwrağattan alındı.

- Levit boyı wzın Tişenkonıñ artılıp alıp, küşin joğaltuına mülde mümkindik bermedi. Alıstan soqqılar jasadı. Bwl Tişenko üşin kütpegen jağday boldı, ol mülde dağdarıp qaldı. Levittiñ basımdığı kümän tudırmadı. 3-raundta jekpe-jekti ayaldatıp, Tişenko jaraqatın ötirik tañbağanda, nokdaunğa tüsui mümkin edi. Sodan keyin de Levit bir minut töpeledi. Tişenko qolın kötere almadı. Boks ädiletsiz sportqa aynaldı. Amal joq, köndigemiz, – deydi jurnalist.

Esey Jeñiswlınıñ oyınşa, «Biz endi Levittiñ kümisin altınnan joğarı dep bağalauımız kerek».

- 91 kilogramda Qazaqstannıñ birde-bir boksşısı olimpiadalarğa – Atlanta, Afina, Sidney, London, Pekin oyındarına qatıspadı. Birinşi ret qatıstıq jäne kümis aldıq. Onı altınnan joğarı dep bağalaymın, – deydi sport tilşisi.

Sport jurnalisi Qwralbek Ordabaev. Almatı, 10 säuir 2013 jıl.

Al belgili ardager sportşı Qwralbek Ordabaevtıñ pikirinşe, Resey boksşısına jeñisti «töreşi alıp berdi» deu dwrıs emes.

- Bizdegi bir jaman närse – wtılıp qalsa töreşi kinäli. Bir adam şeşpeydi, bes kisi otırıp Resey boksşısına berdi. Endi jurnalister töreşi berdi deydi, ol dwrıs emes, bes töreşi şeşimimen wtıldı ma, onda wtıldı. Endi kelesi jarıstarğa dwrıs dayındalu kerek. Töreşiler şeşimine toqtaluımız kerek, – deydi.

Al AIBA (Halıqaralıq boks qauımdastığı) prezidenti Çing-Kuo Vu «Töreşiler jwmısın türlişe bağalauğa boladı, biraq olar şeşimderin şığardı, ol şeşimdi qwrmetteu kerek» degen.

Rio olimpiadasında äli Qazaqstandıq üş boksşı jüldege talasadı. 69 kilogramm salmaq därejesinde Daniyar Eleusinov finalğa şıqtı. Onıñ qarsılası – özbekstandıq Şahram Giyasov. Al Ädilbek Niyazımbetov (81 kg) – jartılay finalda, Ivan Dıçko (+91 kg) şirek finalda bokstasadı.

Vasiliy Levittiñ – kümis, Aleksandr Zayçikovtiñ (auır atlet) qola medalimen tamızdıñ 16-sı küngi esepte Qazaqstan 15-orında twr. Qazir Qazaqstan qorjınında 10 medal' bar. Onıñ ekeui – altın, üşeui – kümis, beseui – qola jülde.

“Azattıq” radiosı