ماشانىڭ اناسى قاتتى ناۋقاستانىپ، جۇمىسقا جاراماي قالعان. ۇيدەگى تۇرمىس اۋىرتپالىعى ەندى ونىڭ دا يىعىنا ءتۇسىپتى.

“وتباسىمىزداعى قيندىقتار مەن اۋىرعاننان كەيىن باستالدى. ماعان ول كەزدە “قۋىق بەزىنىڭ باستاپقى كەزەڭدەگى راگى” دەگەن دياگنوز قويىلعان بولاتىن. ءبىز تۇراتىن اۋىلدىق جەردە ۋرولوگ-مامان جوق، ءتىپتى اۋداندا دا مامان تاپشى. سالدارىنان جاتا بەرىپ، جۇرە المايتىن دارەجەگە جەتتىم. قينالعانىمدى كورگەن قىزىم ۆوزنەسەنسكي شىركەۋىنە بارىپتى. وندا ول قايىرىمدى جانمەن كەزدەسىپ، الگى كىسى ماعان الماتىداعى ۋرولوگيا ينستيتۋتىنا بارىپ قارالۋىما كومەكتەستى. تەكسەرىستەن كەيىن مەندە راك اۋرۋىنىڭ جوق ەكەنى انىقتالدى. ارينە، قۋانىشتى حابار بولسا دا مەنىڭ دەنساۋلىعىم جۇمىس ىستەۋگە جارامايتىن. وسىنىڭ ءبارىن كورىپ-بىلگەن قىزىم بار اۋىرتپالىقتى ءوز موينىنا الدى، ول سىنىپتاستارىنا قازاق ءتىلىن ۇيرەتىپ، قازىر اقشا تاۋىپ ءجۇر”، – دەيدى تاتيانا ديدياەۆا.

ناۋقاس ايەلدىڭ ايتۋىنشا، ماريا وتە دارىندى جانە العىر قىز. ول مەكتەپتەگى تاپسىرمالارى لەزدە ورىنداپ تاستايدى. اسىرەسە، گۋمانيتارلى باعىتتاعى پاندەردى جاقسى وقيتىن ەكەن. ماشانىڭ IQ دەڭگەيى 180-ءدى قۇرايدى، بۇل 18-دەن اسقان ەرەسەك ادامداردىڭ ماكسيمالدى كورسەتكىشى.

“قىزىم ءاردايىم جاڭا دۇنيەلەردى وقىپ-زەرتتەپ جۇرەدى، بەلگىلى ءبىر مەجەگە جەتىپ توقتاپ قالعان ەمەس. ول قازىردەن باستاپ ءوزىنىڭ بولاشاعىن جوسپارلاپ قويعان. ارمانى شەت مەملەكەتتەردە بولىپ قايتۋ. سول ءۇشىن شەتەل تىلدەرىن ۇيرەنىپ ءجۇر. ال، باستى ارمانى – بالالار نەيروحيرۋرگى بولۋ”، – دەيدى دارىندى قىزدىڭ اناسى.

sn.kz