الماتى وبلىسىنىڭ قاراساي اۋداندىق سوتىندا بۇگىن جاڭاتۇرمىس اۋىلدىق مەكتەبىنىڭ مۇعالىمى ايمان ساعيدۋللاەۆانىڭ «ءوز ءتارتىبىن زاڭسىز تالقىعا سالدى» دەپ مەكتەپ ديرەكتورى بەكجان نۇسىپبەكوۆانىڭ ۇستىنەن بەرگەن شاعىمى بويىنشا ءوتىپ جاتقان سوتتا شەشىم شىقتى.

ازاتتىق ءتىلشىسىنىڭ حابارلاۋىنشا، سۋديا ايگۇل جاڭبىرباەۆا ساعيدۋللاەۆانىڭ شاعىمىن قاناعاتتاندىرىپ، مەكتەپ ديرەكتورىنىڭ مۇعالىمگە پەداگوگيكالىق ادەپ ساقتامادى” دەپ بەرگەن ەسكەرتۋىنىڭ كۇشى جويىلسىن دەگەن شەشىم شىعاردى. سۋديا شەشىمدى قىسقاشا عانا وقىدى.

سوت شەشىمى شىققان سوڭ ازاتتىق ءتىلشىسى ديرەكتور نۇسىپبەكوۆانىڭ شەشىمگە قاتىستى پىكىرىن بىلمەك بولعان. بىراق نۇسىپبەكوۆا شەشىمدى “تالقىلاۋعا جاتپايدى” دەپ قىسقا قايىردى.

ايمان ساعيدۋللاەۆا سوت شەشىمىنە ريزا ەكەنىن ءبىلدىردى.

الماتى وبلىسى قاراساي اۋدانى جاڭاتۇرمىس اۋىلى مەكتەبىندە قازاق ءتىلى پانىنەن ساباق بەرەتىن مۇعالىم ايمان ساعيدۋللاەۆا 2015 جىلى مەكتەپ ۇستازدارىنا تىكەلەي مىندەتتەرىنەن باسقا دا ارتىق جۇمىستار جۇكتەلەتىنى جونىندە ماسەلە كوتەرىپ تانىلعان ەدى. ونىڭ الەۋمەتتىك جەلىدەگى جازبالارى مەن باق-تاعى ماقالالارىنان كەيىن الەۋمەتتىك جەلى قولدانۋشىلارى سول تۇستاعى ءبىلىم جانە عىلىم ءمينيسترى اسلان ءسارىنجىپوۆتى مۇعاليمانى قۋدالاۋدى توقتاتۋعا ىقپال ەتۋگە شاقىرىپ، اشىق حات جازىپ، قول جيناعان.

ايمان ساعيدۋللاەۆا بيىل مامىردىڭ 19-ىندا مەكتەپ ديرەكتورى بەكجان نۇسىپبەكوۆانىڭ وزىنە «ادەپ ساقتاماعانى ءۇشىن» بەرگەن ەسكەرتۋىمەن كەلىسپەي، سوتقا شاعىمدانعان. ەسكەرتۋ «2016 جىلى مامىردىڭ 19-ى كۇنى مەكتەپ اياسىندا رايىمبەك وكرۋگىنىڭ اقساقالدار كەڭەسى مۇشەلەرىنىڭ كەزەكتەن تىس كەزدەسۋى بارىسىندا پەداگوگيكالىق ادەپ قاعيدالارىن ساقتاماعانى ءۇشىن» بەرىلگەن. ساعيدۋللاەۆا سوتتان ول ەسكەرتۋدى زاڭسىز دەپ تانۋدى سۇرايدى.

ازات ەۋروپا / ازاتتىق راديوسى