Almatı oblısınıñ Qarasay audandıq sotında bügin Jañatwrmıs auıldıq mektebiniñ mwğalimi Ayman Sağidullaevanıñ «öz tärtibin zañsız talqığa saldı» dep mektep direktorı Bekjan Nüsipbekovanıñ üstinen bergen şağımı boyınşa ötip jatqan sotta şeşim şıqtı.

Azattıq tilşisiniñ habarlauınşa, sud'ya Aygül Jañbırbaeva Sağidullaevanıñ şağımın qanağattandırıp, mektep direktorınıñ mwğalimge pedagogikalıq ädep saqtamadı” dep bergen eskertuiniñ küşi joyılsın degen şeşim şığardı. Sud'ya şeşimdi qısqaşa ğana oqıdı.

Sot şeşimi şıqqan soñ Azattıq tilşisi direktor Nüsipbekovanıñ şeşimge qatıstı pikirin bilmek bolğan. Biraq Nüsipbekova şeşimdi “Talqılauğa jatpaydı” dep qısqa qayırdı.

Ayman Sağidullaeva sot şeşimine riza ekenin bildirdi.

Almatı oblısı Qarasay audanı Jañatwrmıs auılı mektebinde qazaq tili päninen sabaq beretin mwğalim Ayman Sağidullaeva 2015 jılı mektep wstazdarına tikeley mindetterinen basqa da artıq jwmıstar jükteletini jöninde mäsele köterip tanılğan edi. Onıñ äleumettik jelidegi jazbaları men BAQ-tağı maqalalarınan keyin äleumettik jeli qoldanuşıları sol twstağı bilim jäne ğılım ministri Aslan Särinjipovti mwğalimanı qudalaudı toqtatuğa ıqpal etuge şaqırıp, aşıq hat jazıp, qol jinağan.

Ayman Sağidullaeva biıl mamırdıñ 19-ında mektep direktorı Bekjan Nüsipbekovanıñ özine «ädep saqtamağanı üşin» bergen eskertuimen kelispey, sotqa şağımdanğan. Eskertu «2016 jılı mamırdıñ 19-ı küni mektep ayasında Rayımbek okruginiñ aqsaqaldar keñesi müşeleriniñ kezekten tıs kezdesui barısında pedagogikalıq ädep qağidaların saqtamağanı üşin» berilgen. Sağidullaeva sottan ol eskertudi zañsız dep tanudı swraydı.

Azat Europa / Azattıq radiosı