ەرتەڭ، ياعني 7 قىركۇيەكتە ساع 15.00-دە استاناداعى قر ۇلتتىق اكادەميالىق كىتاپحاناسىندا قازاقستان رەسپۋبليكاسىنىڭ ەڭبەك سىڭىرگەن عىلىم قايراتكەرى، حالىقارالىق جوعارى مەكتەپتەر عىلىم اكادەمياسىنىڭ قۇرمەتتى اكادەميگى، قازاقستان جازۋشىلار وداعىنىڭ ساكەن سەيفۋللين اتىنداعى سىيلىعىنىڭ لاۋرەاتى، «پاراسات» وردەنىنىڭ يەگەرى، فيلولوگيا عىلىمدارىنىڭ دوكتورى، پروفەسسور تۇرسىنبەك كاكىشەۆتىڭ جەكە كىتاپحاناسى «عالىم» زالى اشىلادى. زالدىڭ اشىلۋى اياسىندا «ماعجان-ساكەن»كىتابىنىڭ تۇساۋى كەسىلەدى.

ءىس-شاراعا قر مادەنيەت جانە سپورت ءمينيسترى ارىستانبەك مۇحامەديۇلى, قر پارلامەنتى سەناتى مەن ءماجىلىسىنىڭ دەپۋتاتتارى، ەلىمىزدىڭ زيالى قاۋىم وكىلدەرى قاتىسادى دەپ جوسپارلانىپ وتىر.

2015 جىلى ومىردەن وتكەن عالىمنىڭ جەكە كىتاپحاناسىندا گۋمانيتارلىق عىلىمدار بويىنشا بەس مىڭعا جۋىق كىتاپ، سونداي-اق بەلگىلى جازۋشىلار ساكەن سەيفۋللين، ءسابيت مۇقانوۆتاردىڭ ءومىرى مەن قىزمەتىنە قاتىستى قۇندى مۇراعاتتىق قۇجاتتار بار. عالىمنىڭ قولجازبالارى، مۇراعاتتىق قۇجاتتارى مەن باسقا دا ماتەريالدارىنان قۇرالعان 83 پاپكا قۇجات كىتاپحاناعا سىيعا بەرىلمەك.

عالىم ادەبي سىن مەن قازاق ادەبيەتى تاريحىنداعى وزەكتى ماسەلەلەردى زەرتتەۋگە زور ۇلەس قوستى. «قازاق ادەبيەتىنىڭ تاريحى» كوپتومدىعىن قۇراستىرۋعا دا اتسالىستى. «ونەگەلى ادامدار ءومىرى» سەرياسى بويىنشا جارىق كورگەن «ساكەن سەيفۋللين» كىتابىنىڭ اۆتورى.

تۇرسىنبەك كاكىشەۆتىڭ جەكە كىتاپحاناسىن عالىمنىڭ جۇبايى، فيلولوگيا عىلىمدارىنىڭ دوكتورى، پروفەسسور كۇلاش سادىققىزى احمەت قر ۇلتتىق اكادەميالىق كىتاپحاناسىنىڭ قورىنا تارتۋ ەتتى.

كاكىشەۆ كىتاپحاناسىن وتە ۇلكەن ءارى قورى باي جەكە كىتاپحانالاردىڭ ءبىرى دەپ اتاۋعا بولادى. كىتاپحانادان يەسىنىڭ ءوزىنىڭ ءىرى تۇلعا ەكەندىگى – ونىڭ ەنتسيكلوپەديزمى، كەڭ وي-ءورىسى، ىنتا-جىگەرى، تەرەڭ بىلىمدىلىگى كورىنەدى. سىيعا تارتىلعان تۋىندىلار قاتارىندا اراب تىلىندەگى سيرەك باسىلىمدار جانە لاتىن الىپبيىندەگى قازاق بالالار ادەبيەتى، كوركەم ادەبيەتتەر، ادەبيەتتانۋ، تاريح، ارحيتەكتۋرا، ونەر، ەنتسيكلوپەديالار توپتامالارى، انىقتامالىقتار، وتاندىق جۋرنالدار، انتيكالىق اۆتورلاردىڭ كىتاپتارى دا كوپتەپ تابىلادى، سونداي-اق قىرعىز، قىتاي جانە تۇرىك تىلدەرىندەگى تۋىندىلار دا كەزدەسەدى.

تۇرسىنبەك كاكىشەۆتىڭ كىتاپحاناسى جاڭا «عالىم» زالىندا ورنالاسقان. جاڭا زال اقپاراتتىق، مادەني جانە ءبىلىم بەرۋ مىندەتتەرىن اتقارادى. نەگىزگى مىندەتى: پايدالانۋشىلارعا، سول قاتاردا زەرتتەۋشىلەرگە، ماگيسترانتتارعا، عالىمدارعا اقپاراتتىق-بيبليوگرافيالىق قىزمەت كورسەتۋ، مادەني-كوپشىلىك ءىس-شارالار وتكىزۋ.

عالىم تۇرسىنبەك كاكىشەۆتىڭ جەكە كىتاپحاناسىنىڭ تابىستالۋى – قر ۇلتتىق اكادەميالىق كىتاپحاناسىنىڭ قولدانىستاعى ءداستۇرىنىڭ جالعاسى، كىتاپحانا قورىن بايىتا تۇسۋدەگى ماڭىزدى قادام. ەسكەرەتىن جايت، 2015 جىلى قر ۇلتتىق اكادەميالىق كىتاپحاناسىندا «مىرزاتاي جولداسبەكوۆتىڭ مەموريالدى كىتاپ توپتاماسى» زالى اشىلعان بولاتىن، اتالعان زالدا اكادەميك م. جولداسبەكوۆتىڭ جەكە كىتاپحاناسى ورنالاسقان. 2016 جىلى قر مەملەكەتتىك سىيلىعىنىڭ لاۋرەاتى، جازۋشى اكىم تارازي كىتاپ توپتامالارىن كىتاپحاناعا سىيعا بەرگەن-ءدى، سونداي-اق قر مەملەكەتتىك سىيلىعىنىڭ لاۋرەاتى، ايگىلى جازۋشى دۇكەنباي دوسجاننىڭ كىتاپ توپتامالارىن كىتاپحاناعا جازۋشىنىڭ جۇبايى ساۋلە دوسجانوۆا تارتۋ ەتكەن ەدى.

adebiportal.kz