كەزىندە ەل اراسىندا ءماسىموۆ ۇكىمەتىنىڭ قابىلەتسىزدىگىنەن گورى ونىڭ، ەكس-پەرمەردىڭ ەتنيكالىق تەگى كوپ ءسوز بولاتىن. «پرەمەرلىك تاقتا تەك قازاق وتىرۋى كەرەك» دەگەن زاڭ بار سەكىلدى تالاي جاننىڭ بۇرا تارتىپ، داستارحان باسىنداعى اڭگىمەنى ۇلكەن ساياسات ساحناسىندا ايتقانىن دا كوزىمىز كوردى. 2012 جىلدىڭ كىركۇيەگىندە بۇل قىزمەت سەرىك احمەتوۆكە بۇيىرا قالدى. سول-اق ەكەن، كەشە عانا باعا جەتپەس لاۋازىم سانالعان پرەمەرلىكتەن ءمان كەتتى. ەشكىم ەلەپ-ەسكەرمەيتىن قاراپايىم قىزمەت ساناتىنا قوسىلىپ، احمەتوۆ اتقارۋشى بيلىكتىڭ باسىندا بار ەكەندىگىن ارەدىك كورسەتىپ قانا ءجۇردى. امال نە، بۇل پرەمەرىمىز 2014 جىلى تەمىر توردىڭ ار جاعىنان ءبىر-اق شىعىپ، كارىم ءماسىموۆ ەسكى كرەسلوسىنا قايتا قونجيدى. سول-اق ەكەن، باياعى اڭگىمە تاعى باستالدى.
شىنىن ايتايىق، ءماسىموۆ ۇكىمەتى كوپ قاتەلىكتەر جىبەردى. ەل ەكونوميكاسىن قايراڭنان الىپ شىعا المادى. رەفورمالارى ساتسىزدىكتەرگە ۇشىراي بەردى. جەر ماسەلەسىن تىم كۇردەلەندىرىپ جىبەردى. ۇلتتىق قورداعى اقشا سارقىلىپ، سىرتقى قارىز كۇن ساناپ ءوسىپ جاتتى. ال، ءبىزدىڭ ەكس-پرەمەرىمىز بولسا، حالىققا جاعۋ ءۇشىن ەل ارالاپ كەتتى. ءوزىنىڭ قىزمەتىنە جارناما جاساماق بولىپ تالاي مارتە تالپىنىپ كورىپ ەدى، ونىسى قوعامنىڭ ءاجۋاسىنا اينالىپ شىعا كەلەتىن بولدى. امالى تاۋسىلعان ءماسىموۆ مينيسترلەردى قاسىنا ەرتىپ الىپ، كوشەگە شىعىپ جۇگىرەتىندى شىعاردى. «قۋعان جەتپەيدى، بۇيىرعان كەتپەيدى» دەيدى قازاق. اياق استىنان ەكى ءتۇرلى شۇلىق كيىپ «قۋىپ» جۇرگەن ەكس-پرەمەرىمىز ۇلتتىق قاۋىپسىزدىك كوميتەتىنىڭ توراعاسى بولىپ تاعايىندالدى دا، ۇكىمەت باسىنا بۇرىڭعى-سوڭعى قىزمەتىندە ىسكەرلىگىمەن كوزگە تۇسكەن ازاماتتار كەلدى.
ۇقك-ءنىڭ تىزگىنى ماسىموۆكە بۇيىردى دەلىك. ال، ەلدىڭ كوز قۇرتىنا اينالعان ۇكىمەت «باسىلىق» مىندەت باقىتجان ساعىنتاەۆقا جۇكتەلىپ، جەر كوميسسياسىندا ەلدىڭ ءسوزىن سويلەي بىلگەن ىسكەر ازاماتتىڭ ەكى جاعىنا يمانعالي تاسماعانبەتوۆ پەن اسقار مىرزاحمەتوۆ سەكىلدى اۋىر سالماقتاعى جايساڭدار جايعاستى.
مىنە، تاپ وسى كەزدە بەلگىسىز ءبىر كۇشتەر رۋارالىق ارازدىقتى تۋعىزاتىن اڭگىمەلەردى «گۋلەتە» باستادى.
بيلىكتە «نايمانداردىڭ» كۇشى السىرەپ كەتتى. «كىشى جۇزگە» تىزگىن بەرىلمەدى. «ارعىنداردىڭ» مىسىن باسىپ جاتىر. «دۋلاتتار كۇشەيىپ بارادى»، ت.س.س.
كەشەگى ۇكىمەت باسىنىڭ ەتنيكالىق تەگىن قازبالايتىندار، ەندى ۇكىمەت تىزگىنىن ۇستاعان ازاماتتاردىڭ رۋىن تۇگەندەپ الەك.
جالپى، بۇل – ارانداتۋشى كۇشتەردىڭ ويلاپ تاپقان ايلاسى بولۋى مۇمكىن. بۇنىڭ ار جاعىندا ۇكىمەتكە سەنىمسىزدىك تۋعىزىپ قانا قويماي، جۇزشىلدىك پەن جەرشىلدىكتىڭ اڭگىمەسىن شىعارىپ، قازاقتى شىرعالاڭعا سالاتىن قۋلاردىڭ تۇلكى بۇلاڭى كورىنىپ تۇرعان سياقتى.
قازاقتىڭ «ءبىر جەڭنەن قول، ءبىر جاعادان باس» شىعارۋىنا قارسى توپتار تاعى دا ىسكە كىرىسكەنگە ۇقسايدى. ونى الەۋمەتتىك جەلىدەگى كەيبىر تۇسىنىكسىز جانداردىڭ ءسوز ىڭعايى مەن سايتتارداعى پىكىرلەردەن-اق كورۋگە بولادى.
تاسادا وتىرىپ تاس اتۋ باستالدى.
اباي بولايىقشى. ء“بىز – ءبىر قازاقتىڭ بالاسىمىز”…
ءشارىپحان قايسار
Abai.kz
پىكىر قالدىرۋ