Kezinde el arasında Mäsimov ükimetiniñ qabiletsizdiginen göri onıñ, eks-perm'erdiñ etnikalıq tegi köp söz bolatın. «Prem'erlik taqta tek qazaq otıruı kerek» degen zañ bar sekildi talay jannıñ bwra tartıp, dastarhan basındağı äñgimeni ülken sayasat sahnasında aytqanın da közimiz kördi. 2012 jıldıñ kırküyeginde bwl qızmet Serik Ahmetovke bwyıra qaldı. Sol-aq eken, keşe ğana bağa jetpes lauazım sanalğan prem'erlikten män ketti. Eşkim elep-eskermeytin qarapayım qızmet sanatına qosılıp, Ahmetov atqaruşı biliktiñ basında bar ekendigin äredik körsetip qana jürdi. Amal ne, bwl prem'erimiz 2014 jılı temir tordıñ ar jağınan bir-aq şığıp, Kärim Mäsimov eski kreslosına qayta qonjidı. Sol-aq eken, bayağı äñgime tağı bastaldı.

Şının aytayıq, Mäsimov ükimeti köp qatelikter jiberdi. El ekonomikasın qayrañnan alıp şığa almadı. Reformaları sätsizdikterge wşıray berdi. Jer mäselesin tım kürdelendirip jiberdi. Wlttıq qordağı aqşa sarqılıp, sırtqı qarız kün sanap ösip jattı. Al, bizdiñ eks-prem'erimiz bolsa, halıqqa jağu üşin el aralap ketti. Öziniñ qızmetine jarnama jasamaq bolıp talay märte talpınıp körip edi, onısı qoğamnıñ äjuasına aynalıp şığa keletin boldı. Amalı tausılğan Mäsimov ministrlerdi qasına ertip alıp, köşege şığıp jügiretindi şığardı. «Quğan jetpeydi, bwyırğan ketpeydi» deydi qazaq. Ayaq astınan eki türli şwlıq kiip «quıp» jürgen eks-prem'erimiz Wlttıq qauipsizdik komitetiniñ törağası bolıp tağayındaldı da, Ükimet basına bwrıñğı-soñğı qızmetinde iskerligimen közge tüsken azamattar keldi.

WQK-niñ tizgini Mäsimovke bwyırdı delik. Al, eldiñ köz qwrtına aynalğan Ükimet «basılıq» mindet Baqıtjan Sağıntaevqa jüktelip, Jer komissiyasında eldiñ sözin söyley bilgen isker azamattıñ eki jağına Imanğali Tasmağanbetov pen Asqar Mırzahmetov sekildi auır salmaqtağı jaysañdar jayğastı.

Mine, tap osı kezde belgisiz bir küşter ruaralıq arazdıqtı tuğızatın äñgimelerdi «gulete» bastadı.

Bilikte «naymandardıñ» küşi älsirep ketti. «Kişi jüzge» tizgin berilmedi. «Arğındardıñ» mısın basıp jatır. «Dulattar küşeyip baradı», t.s.s.

Keşegi Ükimet basınıñ etnikalıq tegin qazbalaytındar, endi Ükimet tizginin wstağan azamattardıñ ruın tügendep älek.

Jalpı, bwl – arandatuşı küşterdiñ oylap tapqan aylası boluı mümkin.  Bwnıñ ar jağında ükimetke senimsizdik tuğızıp qana qoymay, jüzşildik pen jerşildiktiñ äñgimesin şığarıp, qazaqtı şırğalañğa salatın qulardıñ tülki bwlañı körinip twrğan siyaqtı.

Qazaqtıñ «bir jeñnen qol, bir jağadan bas» şığaruına qarsı toptar tağı da iske kiriskenge wqsaydı. Onı äleumettik jelidegi keybir tüsiniksiz jandardıñ söz ıñğayı men sayttardağı pikirlerden-aq köruge boladı.

Tasada otırıp tas atu bastaldı.

Abay bolayıqşı. “Biz – bir qazaqtıñ balasımız”…

Şäriphan Qaysar

Abai.kz