چەرنوگوريا – قازاقستان 5:0.
kerey.kz
فوتو: footballfox.net www.24.kz
ۇلتتىق قۇرامامىز كەزىندە “ۋەمبليدە” انگليادان 1:5 بولىپ جەڭىلگەندە بۇدان جاقسىراق ويناعان. فۋتبول فەدەراتسياسى ەشكىم تانىمايتىن ورتاقول شەتەلدىك باپكەرلەر مەن ەشكىم ەشتەڭە كۇتپەيتىن وتاندىق باپكەرلەردى تاعايىنداعان سايىن الدىمىزعا قايتا-قايتا جىلىتپا تاماق سالعان تاباق تارتىلعانداي بولىپ كورىنەدى. الگى تاماق جىلىتقان سايىن اشىپ، بۇزىلىپ بارادى. تاباق تارتۋشىلار ءار جولى بەتىنە ۋكروپ سەۋىپ قويادى، كوز الداپ. بۇگىنگى ويىن باياعىدا سىرت الاڭدا ءواا مەن سيريادان ويسىراي جەڭىلىپ جۇرەتىن ازياداعى زاماندى ەلەستەتتى. جوق جەردەن سارى قاعاز الىپ، ءوز قاقپاڭا قاۋىپتى ايىپ دوبىن بەلگىلەتۋ مەن پاستى تۇراقتى تۇردە ءدال بەرمەۋ بويىنشا “شەبەرلىك كۋرسى” رەتىندە كورسەتۋگە بولاتىن ماتچ. مىنا قۇراممەن بىرگە جاساقتالعان باسقا باتىس ەۋروپا كوماندالارىنداعى قۇرامدار ەكىنشى، ءتىپتى ءۇشىنشى مارتە جاڭارىپ، جاسارىپ جاتىر. ال قازاقستان قۇراماسى ءۇشىن جەتىسكەن رەزەرۆتىڭ دە جوق ەكەنى بىلىنەدى. ءدال وسى دەڭگەيدە تۇرىپ تاكتيكا مەن ستراتەگيانى تالقىلاپ، تالداۋدىڭ ءوزى كۇلكىلى. قاراپايىم تەحنيكا، فيزيكا مەن ديستسيپلينا ماسەلەلەرىن اۋەلى شەشىپ الۋ كەرەك سياقتى. ول ءۇشىن ونسىز دا يتباي-شورتباي جەپ جاتقان قارجىنى الدىڭعى قاتارلى باتىس مامانىنا جۇمساپ، ءادىل سەلەكتسيا مەن الەم دەڭگەيىندەگى ديستسيپلينا ءھام دەنە دايىندىعى ستاندارتتارىن ەنگىزسە ءجون بولار ەدى. ءدال قازىر لۋي ۆان گالدىڭ قولى بوس:) ايتپەسە فۋتبول الاڭىنداعى پوست-سوۆەتتىك مەنتاليتەتتى تالقانداپ جىبەرەتىن، كەرەك كەزىندە سول مەنتاليتەتكە سايكەس قاتتى-قاتتى دا سويلەي الاتىن ءسوزى ءوتىمدى، بەتى قاتتى يتاليالىق بىرنەشە باپكەر جانە بوسادى دەگەندەي;) قاسىنا قازاقستاندىق بىرنەشە ترەنەردى كومەكشى ەتىپ، ءدارىس العىزسا، قۇبا-قۇپ بولار ەدى. ەگەر ونداي كادرلىك وزگەرىس بولماسا، ىشكى پرەمەر ليگا مەن ءبىرىنشى ليگانىڭ ساپاسى كۇشەيمەسە، جەتەكشى كلۋبتاردا جەرگىلىكتى فۋتبولشىلاردىڭ ۇلەس سانىن كوبەيتۋ ساياساتى قولعا الىنباسا، كەزىندەگى مەكتەپ دەڭگەيىندەگى “بىلعارى دوپ” تۋرنيرىنەن باستاپ، رشۆسم رەزەرۆىنە دەيىنگى ارالىق قايتا جاندانباسا، ەشتەڭە وزگەرمەيدى. ءوستىپ تاباقتاعى اشىعان جىلىتپا تاماققا قاراپ تىجىرانامىز دا وتىرامىز، جارتى ميلليون حالقى بار ەلدەردەن 0:5 بولىپ جەڭىلىپ.
پىكىر قالدىرۋ