قازىرگىنىڭ قىز-كەلىنشەكتەرى «نە مانساپ، نە وتباسى» دەپ ەكىنىڭ بىرەۋىن تاڭداي الماي باس قاتىرىپ ءجۇر. كوپتەگەن بويجەتكەندەردىڭ «وتباسىن قۇرسام، ۇيدە وتىرىپ قالامىن» دەگەن قورقىنىشى باسىم. سوندىقتان ولار كۇيەۋگە شىعۋعا اسىقپايدى.

NUR.KZ پورتالىنا 18 جاسىندا تۇرمىس قۇرىپ، بۇگىندە كوپبالالى انا اتانعان، قىزمەتىندە تابىسقا جەتە بىلگەن تانىمال تەلەجۋرناليست سالتانات قاليەۆا ارنايى سۇحبات بەردى.

بەس بالانىڭ اناسى سالتانات حانىمنىڭ سىمباتىنىڭ سىرى نەدە؟

جاسى 40-تان اسسا دا، سىرت كەلبەتى مەن سىمباتى ساقتالعان سالتانات قاليەۆا مۇنىڭ سىرىن ىشكى جان دۇنيەسىنىڭ جاستىعىمەن جانە تۇقىمقۋالاۋشىلىقپەن بايلانىستىرادى.

«نەگىزى، سىمباتتى ساقتاۋ تۋرالى ەندى ويلانىپ ءجۇرمىن. 40-تان اسقان سوڭ عانا قارتايىپ بارا جاتقانىمدى سەزە باستادىم (كۇلەدى). ەڭ قىزىعى، ءبىزدىڭ وتباسىندا اعام دا، اپكەم دە ءوز جاسىنان الدەقايدا جاس كورىنەدى. بالكىم، قاننان بەرىلەتىن شىعار. وندا تۇرعان ەشقانداي قۇپيا جوق. كەرەمەت كۇتىنىپ ءجۇرمىن دەپ ايتا المايمىن. ەل قاتارلى تاڭەرتەڭ-كەشكە بەتىمدى جۋىپ، كرەم جاعامىن. دەنە سىمباتىنا كەلەر بولسام، ءتورت بالامدى ءوزىم بوساندىم. ءۇشىنشى قىزىمنان كەيىن مەنى «سەمىزسىڭ» دەپ ەفيرگە جىبەرمەي قويعان. جاڭالىقتاردى جانىمداي سۇيگەنىم سونشالىق از ۋاقىتتىڭ ىشىندە ارىقتاپ ەفيرگە قايتا ورالدىم. قوسقان ارتىق سالماقتان سپورتپەن شۇعىلدانۋ ارقىلى ارىلىپ ءجۇردىم. ال كەنجەمدى بوسانعان ۋاقىتتا تاعى دا ءبىراز سالماق قوسىپ الدىم. كەسار تىلىگى ادىسىمەن بوسانعان سوڭ بۇل جولى دارىگەرلەر دەنە شىنىقتىرۋعا رۇقسات بەرمەدى. ونىڭ ۇستىنە ۇيدە كۇندە ەت، باۋىرساق، قوناق دەگەن بار. سودان سوڭ، ءوز-ءوزىمدى قولعا الىپ، از كالوريالى ديەتاعا وتىرۋ ارقىلى 10 كەلىگە دەيىن سالماق تاستادىم. ادام الدىنا ماقسات قويسا، وعان دەگەن ىنتاسى بولسا، ءبارى دە مۇمكىن. جالپى، جاستىق سەزىم بويدا ەمەس، جۇرەكتە بولادى. مەنىڭ كەۋدەمدە ءالى سول ارمانشىل، قيالشىل كىشكەنتاي قىز وتىر. ول قىزدى مەن جاقسى كورەمىن جانە ونى ەشقاشان ساتىپ كەتپەيمىن. مۇمكىن بار قۇپيام وسىندا شىعار»، – دەيدى تەلەجۋرناليست.

ەنە مەكتەبى

سالتانات قاليەۆا جان جارى باعدات قوجاحمەتوۆپەن وتاسقانىنا بيىل 23 جىل تولىپتى. جاقىندا ولار تۇڭعىش قىزدارى ايدانانى ۇزاتقان بولاتىن. قازاقى داستۇرگە ساي تۇڭعىشتارىن اتا-اپاسىنىڭ قىزى دەپ اتايدى ەكەن. اتا ەنەسىمەن ءتورت جىل ءبىر شاڭىراق استىندا تۇرعان سالتانات حانىم ەنە مەكتەبىنەن قالاي وتكەنىن بايانداپ بەردى.

«اتا ەنەممەن ءتورت جىل بىرگە تۇردىق. قىز كەزىمدە ءۇيدىڭ جۇمىسىنان گورى قار كۇرەپ، وت جاققاندى، دالانىڭ جۇمىستارىن جاقسى كورەتىن ەدىم. تۇرمىسقا شىعىپ، ەنەمنەن كوپ نارسە ۇيرەندىم. ول كىسى ماعان تاماقتىڭ ءتۇر-ءتۇرىن ءپىسىرۋدى ۇيرەتتى. وسى 23 جىلدا ءبىر داۋىس كوتەرگەنىن ەستىمەپپىن. ەنەمدى ۇلگى تۇتامىن. مەن ءۇشىن انام ەكەۋى قاتار تۇر»، – دەيدى سالتانات قاليەۆا.

جاس وتباسىعا اتا-انانىڭ ارالاسپاعانى دۇرىس

جاستاي تۇرمىس قۇرعان سالتانات حانىم «جاس وتباسىنىڭ اياقتان تۇرىپ كەتۋى نەگە بايلانىستى؟» دەگەن ساۋالعا جاۋاپ ىزدەپ كوردى.

«مەنىڭشە، وتباسى بولىپ قالىپتاسۋى ءۇشىن اتا-انالار مۇلدە كىرىسپەۋى كەرەك. ەكەۋى نە كورسە دە وزدەرى شەشسىن. وزدەرى كومەك سۇراسا، قول ۇشىن سوزسىن. كەلىپ اقىل سۇراپ جاتسا، اقىل-كەڭەسىن ايتسىن. وسىنىڭ ءوزى جەتكىلىكتى. ەگەر كومەكتەسكىڭ كەلسە، كەدەرگى جاساما دەيدى ەمەس پە؟!

ەكىنشىدەن، وتباسىنىڭ باقىتى ەكى جاستىڭ وزدەرىنە تىكەلەي بايلانىستى. كوپ جاعدايدا تابىستى ەر ادامنىڭ ارتىندا ايەلدىڭ ەڭبەگى جاتىر. بىراق ايەل قانشا جەردەن بارلىق قيىنشىلىقتارعا ءتوزىپ جۇرە بەرسە، ال جولداسى وزگەرمەسە، ونىڭ ءبارى بەكەر. تاياقتىڭ ەكى ۇشى بولاتىنى سياقتى شاڭىراقتىڭ شايقالماۋىنا ايەل دە، ەركەك تە جاۋاپتى.

باعدات ەكەۋمىز ەكى سومكەنى ارقالاپ، الماتىعا ارمان قۋىپ كەلدىك.ءبىراز جىل پاتەر جالداپ تۇردىق. بارلىق قيىنشىلىقتاردى بىرگە كوردىك. استانادا ەكى قىزىمىزبەن كىشكەنتاي جاتاقحانادا دا تۇردىق. قازىر قۇدايعا شۇكىر، بالالارىمىزدى اياقتاندىردىق. مەن ارمانشىلمىنمىن دەپ ايتتىم عوي جوعارىدا، تۇبىندە وسىنداي دەڭگەيگە جەتەتىنىمىزگە سەندىم»، – دەيدى تەلەجۇرگىزۋشى.

سالتانات قاليەۆا ۇل-قىزدارىن تاربيەلەۋدەگى وزىندىك ادىستەرىمەن ءبولىستى

«قىزدارىمدى قاتال ۇستايمىن. ءار ساعات سايىن ماعان قاي جەردە، نە ىستەپ جۇرگەندەرى تۋرالى ەسەپ بەرىپ وتىرادى. قىز بالانى قاداعالاماسا بولمايدى. قاباعىمنان قورقادى. بىراق، وسە كەلە قىزدارىم مەنىمەن سىرلاس بولىپ كەتتى. وزدەرىن قۇربىمداي كورەمىن. ولاردىڭ دوستارىن، ارالاساتىن ورتاسىن جاقسى تانيمىن»، – دەيدى كوپبالالى انا.

سالتانات حانىمنىڭ ايتۋىنشا، ەر بالانىڭ تاربيەسى مۇلدە وزگەشە. «ۇلدارعا اۋىر ءسوز ايتا المايسىڭ. ولار بىرەۋدىڭ بولاشاق قامقورشىسى، ءبىر جانۇيانىڭ وتاعاسى. سوندىقتان كىشكەنتايىنان ءبىز، انالار سولاي تاربيەلەۋىمىز كەرەك. مەن ولاردى بولاشاق جارلارىنا دايىنداپ جاتىرمىن. كەيىن كەلىندەرىم وسى ۇلدارىم ءۇشىن جىلاماسا ەكەن دەيمىن»، – دەپ جەكە ويىمەن ءبولىستى جۋرناليست.

سالتانات حانىم قازاق قىز-كەلىنشەكتەرىنە ارناپ anabol.kz سايتىن اشقان بولاتىن. «كەنجەمدى بوسانىپ، دەكرەتتىك دەمالىستا بەس جىل وتىردىم. وسى بالامدى ەركەلەتىپ، بەسكە كەلگەنشە جۇمىسقا شىقپايمىن دەپ ءوز-وزىمە انت بەرگەنمىن. سول انتىمدى ورىنداپ، ۇيدە بالا تاربيەسىمەن اينالىستىم. بەس جىلدا Instagram پاراقشاما تەك تاماق ازىرلەۋ، ءۇي شارۋاسى، بالا تاربيەسى تۋرالى جازبالار سالاتىنمىن. بۇرىننان ويلاپ جۇرگەن يدەياما ءبىر وقىرمانىمنىڭ «وسى پاراقشادا كوپ سۇراقتارعا جاۋاپ بەرىپ ۇلگەرمەيتىڭىزدى بايقادىق. نەگە سايت اشىپ بەرمەسكە؟! دەگەن ويى تۇرتكى بولدى»، – دەيدى سالتانات قاليەۆا.

سالتانات قاليەۆانى قازىرگى قوعامداعى شەكتەن شىعۋشىلىق الاڭداتادى

سالتانات قاليەۆانى قازىرگى قوعامداعى شەكتەن شىعۋشىلىق الاڭداتادى. «اركىم ويىنا نە كەلسە، سونى ىستەيتىن بولدى، ءتىپتى، ايتۋعا اۋىز بارمايتىن، جيىركەنىشتى جايتتار كوبەيىپ بارادى.توقالدار تاقىرىبىن دا اينالىپ وتە المايمىز. جاسارامىز دەپ پىشاققا ءتۇسىپ، بەتى قيسايعان ءبىرىنشى ايەلدەرىنىڭ پروبلەماسى ءوز الدىنا. ادامدار بۇزىلدى ما، زامان بۇزىلدى ما؟! مەنىڭشە، بۇگىنگى قوعام قۇلدىراپ بارا جاتىر. تەك ءبىر اللاعا سىيىنۋ عانا قالدى»، – دەيدى جۋرناليست.

سالتانات قاليەۆا ەشكىمگە اقىل ايتپايتىنىن العا تارتادى. «ويتكەنى اقىل ايتۋ – ۇلكەن جاۋاپكەرشىلىك»، – دەيدى ول.

دەرەككوز: Nur.kz