Qazirginiñ qız-kelinşekteri «ne mansap, ne otbası» dep ekiniñ bireuin tañday almay bas qatırıp jür. Köptegen boyjetkenderdiñ «otbasın qwrsam, üyde otırıp qalamın» degen qorqınışı basım. Sondıqtan olar küyeuge şığuğa asıqpaydı.

NUR.KZ portalına 18 jasında twrmıs qwrıp, büginde köpbalalı ana atanğan, qızmetinde tabısqa jete bilgen tanımal telejurnalist Saltanat Qalieva arnayı swhbat berdi.

Bes balanıñ anası Saltanat hanımnıñ sımbatınıñ sırı nede?

Jası 40-tan assa da, sırt kelbeti men sımbatı saqtalğan Saltanat Qalieva mwnıñ sırın işki jan düniesiniñ jastığımen jäne twqımqualauşılıqpen baylanıstıradı.

«Negizi, sımbattı saqtau turalı endi oylanıp jürmin. 40-tan asqan soñ ğana qartayıp bara jatqanımdı seze bastadım (küledi). Eñ qızığı, bizdiñ otbasında ağam da, äpkem de öz jasınan äldeqayda jas körinedi. Bälkim, qannan beriletin şığar. Onda twrğan eşqanday qwpiya joq. Keremet kütinip jürmin dep ayta almaymın. El qatarlı tañerteñ-keşke betimdi juıp, krem jağamın. Dene sımbatına keler bolsam, tört balamdı özim bosandım. Üşinşi qızımnan keyin meni «semizsiñ» dep efirge jibermey qoyğan. Jañalıqtardı janımday süygenim sonşalıq az uaqıttıñ işinde arıqtap efirge qayta oraldım. Qosqan artıq salmaqtan sportpen şwğıldanu arqılı arılıp jürdim. Al kenjemdi bosanğan uaqıtta tağı da biraz salmaq qosıp aldım. Kesar tiligi ädisimen bosanğan soñ bwl jolı därigerler dene şınıqtıruğa rwqsat bermedi. Onıñ üstine üyde künde et, bauırsaq, qonaq degen bar. Sodan soñ, öz-özimdi qolğa alıp, az kaloriyalı dietağa otıru arqılı 10 kelige deyin salmaq tastadım. Adam aldına maqsat qoysa, oğan degen ıntası bolsa, bäri de mümkin. Jalpı, jastıq sezim boyda emes, jürekte boladı. Meniñ keudemde äli sol armanşıl, qiyalşıl kişkentay qız otır. Ol qızdı men jaqsı köremin jäne onı eşqaşan satıp ketpeymin. Mümkin bar qwpiyam osında şığar», – deydi telejurnalist.

Ene mektebi

Saltanat Qalieva jan jarı Bağdat Qojahmetovpen otasqanına biıl 23 jıl tolıptı. Jaqında olar twñğış qızdarı Aydananı wzatqan bolatın. Qazaqı dästürge say twñğıştarın ata-apasınıñ qızı dep ataydı eken. Ata enesimen tört jıl bir şañıraq astında twrğan Saltanat hanım ene mektebinen qalay ötkenin bayandap berdi.

«Ata enemmen tört jıl birge twrdıq. Qız kezimde üydiñ jwmısınan göri qar kürep, ot jaqqandı, dalanıñ jwmıstarın jaqsı köretin edim. Twrmısqa şığıp, enemnen köp närse üyrendim. Ol kisi mağan tamaqtıñ tür-türin pisirudi üyretti. Osı 23 jılda bir dauıs kötergenin estimeppin. Enemdi ülgi twtamın. Men üşin anam ekeui qatar twr», – deydi Saltanat Qalieva.

Jas otbasığa ata-ananıñ aralaspağanı dwrıs

Jastay twrmıs qwrğan Saltanat hanım «Jas otbasınıñ ayaqtan twrıp ketui nege baylanıstı?» degen saualğa jauap izdep kördi.

«Meniñşe, otbası bolıp qalıptasuı üşin ata-analar mülde kirispeui kerek. Ekeui ne körse de özderi şeşsin. Özderi kömek swrasa, qol wşın sozsın. Kelip aqıl swrap jatsa, aqıl-keñesin aytsın. Osınıñ özi jetkilikti. Eger kömekteskiñ kelse, kedergi jasama deydi emes pe?!

Ekinşiden, otbasınıñ baqıtı eki jastıñ özderine tikeley baylanıstı. Köp jağdayda tabıstı er adamnıñ artında äyeldiñ eñbegi jatır. Biraq äyel qanşa jerden barlıq qiınşılıqtarğa tözip jüre berse, al joldası özgermese, onıñ bäri beker. Tayaqtıñ eki wşı bolatını siyaqtı şañıraqtıñ şayqalmauına äyel de, erkek te jauaptı.

Bağdat ekeumiz eki sömkeni arqalap, Almatığa arman quıp keldik.Biraz jıl päter jaldap twrdıq. Barlıq qiınşılıqtardı birge kördik. Astanada eki qızımızben kişkentay jataqhanada da twrdıq. Qazir qwdayğa şükir, balalarımızdı ayaqtandırdıq. Men armanşılmınmın dep ayttım ğoy joğarıda, tübinde osınday deñgeyge jetetinimizge sendim», – deydi telejürgizuşi.

Saltanat Qalieva wl-qızdarın tärbieleudegi özindik ädisterimen bölisti

«Qızdarımdı qatal wstaymın. Är sağat sayın mağan qay jerde, ne istep jürgenderi turalı esep berip otıradı. Qız balanı qadağalamasa bolmaydı. Qabağımnan qorqadı. Biraq, öse kele qızdarım menimen sırlas bolıp ketti. Özderin qwrbımday köremin. Olardıñ dostarın, aralasatın ortasın jaqsı tanimın», – deydi köpbalalı ana.

Saltanat hanımnıñ aytuınşa, er balanıñ tärbiesi mülde özgeşe. «Wldarğa auır söz ayta almaysıñ. Olar bireudiñ bolaşaq qamqorşısı, bir janwyanıñ otağası. Sondıqtan kişkentayınan biz, analar solay tärbieleuimiz kerek. Men olardı bolaşaq jarlarına dayındap jatırmın. Keyin kelinderim osı wldarım üşin jılamasa eken deymin», – dep jeke oyımen bölisti jurnalist.

Saltanat hanım qazaq qız-kelinşekterine arnap anabol.kz saytın aşqan bolatın. «Kenjemdi bosanıp, dekrettik demalısta bes jıl otırdım. Osı balamdı erkeletip, beske kelgenşe jwmısqa şıqpaymın dep öz-özime ant bergenmin. Sol antımdı orındap, üyde bala tärbiesimen aynalıstım. Bes jılda Instagram paraqşama tek tamaq äzirleu, üy şaruası, bala tärbiesi turalı jazbalar salatınmın. Bwrınnan oylap jürgen ideyama bir oqırmanımnıñ «osı paraqşada köp swraqtarğa jauap berip ülgermeytiñizdi bayqadıq. Nege sayt aşıp bermeske?! degen oyı türtki boldı», – deydi Saltanat Qalieva.

Saltanat Qalievanı qazirgi qoğamdağı şekten şığuşılıq alañdatadı

Saltanat Qalievanı qazirgi qoğamdağı şekten şığuşılıq alañdatadı. «Ärkim oyına ne kelse, sonı isteytin boldı, tipti, aytuğa auız barmaytın, jiirkenişti jayttar köbeyip baradı.Toqaldar taqırıbın da aynalıp öte almaymız. Jasaramız dep pışaqqa tüsip, beti qisayğan birinşi äyelderiniñ probleması öz aldına. Adamdar bwzıldı ma, zaman bwzıldı ma?! Meniñşe, bügingi qoğam qwldırap bara jatır. Tek bir Allağa sıyınu ğana qaldı», – deydi jurnalist.

Saltanat Qalieva eşkimge aqıl aytpaytının alğa tartadı. «Öytkeni aqıl aytu – ülken jauapkerşilik», – deydi ol.

Derekköz: Nur.kz