قازاققا تيىسكەن ادامنىڭ تۇسىنە قاسقىر كىرەدى
kerey.kz
ەسسە
ساقارادا ەركىن جورتقان كوك ءبورى بەتپاق دالامىزدى تاستاپ كەتتى.
سىندىق!
قازاقى ينتەلليگەنتسيا – ساعى سىنعان ينتەلليگەنتسيا.
جالتاق زيالى قاۋىم كىسى بەتىنە تۋرا قاراۋدى ۇيرەنە الماپتى.
ۇنسىزدىك تە – ايقىن پوزيتسيا.
دەپ جازدىق. كەزىندە، 1997-1998 جىلدارى.
قارا ورمان حالىق ءبارىن كورىپ وتىر، دەپ جالعاستىر-دىق ويىمىزدى. حالىققا ۇيدەگى ءسوزدىڭ كەرەگى شامالى. نە ايت، نە ۇندەمە! مىنبەگە شىقتىڭ با، تۋرالعانشا ايت، تۋرا ايتا المايسىن با، مىنبەگە شىقپا.
قاسيەتتىڭ قاسىرەت شەگىپ، تاۋقىمەت تارتقاندا عانا كەلەتىنىن مەڭزەدىك.
جالپى، بۇگىنگى زيالى قاۋىمدى حالىق اتىنان سويلەۋ حۇقىنان ايىرۋ قاجەت، زيالى قاۋىم – اكىم-قارانىڭ سۋىن تاسىپ، وتىنىن جارادى، دەپ تە قاتتى ايتتىق.
كۇل شىعارىپ، وت جاعادى، دەدىك.
بىراق، زيالى قاۋىم، جالپى، ومىردە كەزدەسە مە، جوق پا، ادام تۇسىنىگىندە بار ما، جوق پا، ويلانبادىق.
قازىر ينتەلليگەنتسيا دەگەن ءسوز كەشەگىدەن قالعان، كەڭەس وداعى يدەولوگياسىنان تۋعان ۇعىم-تۇسىنىك ءتارىزدى كورىنەدى.
ينتەللەكتۋالدار بار. قاسقىرداي جالعىز جورتقان ويشىلدار بار.
دەي تۇرعانمەن… قازاقتىڭ بويىنداعى قاسقىر ولگەن. رۋحىمىزدىڭ باستاۋىنداعى ءبورى وققا ۇشقان. كىمنىڭ قاسقىرى ءتىرى؟ بىزگە قاسقىر قاجەت. قايداسىڭ، قاسقىر بابالار؟ سەرىك اقسۇڭقارۇلى. ءامىرحان بالقىبەك، قايداسىڭ قاسقىر قۇداي بولعان كەز، دەر ەدى.
مۇمكىن، تۇرتە بەرسەك، تۇرتپەكتەسەك، حالىقتىڭ بويىنداعى قاسقىر قايتا تىرىلەتىن شىعار. قاسقىر تىرىلسە، ونىڭ نە ماحامبەت، نە سىزدىق تورە، نە ماعجان، نە سۇلتانماحمۇت، نە باۋىرجان، نە مۇقاعالي، نە جۇماتاي، نە قايرات بەينەسىندە كەلەتىنىن بىلەمىن. سول كەزدە قىر استىنان انا قاسقىردىڭ قاتتى ۇلىعان داۋىسى شىعادى.
دابىسى قىر دالانى دۇرلىكتىرەدى.
قىر استىنان قاسقىردى كۇتىڭدەر، جاس ۇرپاق، رۋحتىڭ بەلگىسى سول! كوكسەرەك قايتا اينالىپ سوعادى.. وزدەرىڭدى قايدام، مەن ايتەۋىر وسىعان قاتتى سەنەمىن. كوكسەرەك! كوكسەرەك!
پىكىر قالدىرۋ