الماتىدا قالاسىنداعى «الماتى ارەنا» سپورت سارايىندا قانات يسلام مەن پاتريك اللوتەيدىڭ اراسىندا بولعان بوكس سايىسىندا قانات يسلام جەڭىسكە جەتتى، – دەپ حابارلايدى اباي-اقپارات.
الماتىداعى بوكس كەشى قازاقتاردىڭ جەڭىسىمەن اياقتالدى. قانات يسلام قارسىلاسىمەن 12 راۋند، ياعني 36 مينۋت شايقاسىپ، ايقىن باسىمدىقپەن پاتريك اللوتەيدى تىزە بۇكتىردى.
العاشقى راۋندتا قوس بوكسشى ءبىرىن-ءبىرى زەرتتەپ، وسال تۇستارىن باعامداپ كورگەنمەن، كەزدەسۋدىڭ قالعان بولىگى جەرلەسىمىزدىڭ باسىمدىلىعىمەن ءوتتى. ءبىرىنشى نومىرمەن جۇدىرىقتاسقان بوكسشىمىز اللوتەيدى بۇرىشتان-بۇرىشقا تىقسىرىپ، ءسات سايىن ءوز شابۋىلى مەن جويقىن سوققىلارىن ۇدەتە تۇسكەن. ايتكەنمەن گانالىق ءباھادۇر كەزدەسۋدىڭ سوڭىنا دەيىن شىداس بەرىپ، لايىقتى قارسىلىق تانىتا الدى.
وسىلايشا، “قازاق” بۇگىنگى جەڭىسىنىڭ ارقاسىندا WBA Fedelatin جانە WBO Intercontinental التىن بەلبەۋىن يەلەنىپ وتىر.
حالىققا ريزاشىلىعىن بىلدىرگەن قانات يسلام “قارا بالا مولودەتس” دەپ قارسىلاسىنا دا العىسىن ايتتى.
وڭتۇستىك استانامىزدا وتكەن حالىقارالىق بوكس كەشىندە رينگكە شىققان بارلىق جەرلەستەرىمىز جەڭىسكە جەتىپ، الاش بالاسىنىڭ رۋحىن ءبىر كوتەرىپ تاستادى. العاشقى بولىپ رينگكە شىققان قازاقستاندىق جۇمان جۇمابەكوۆ قارسىلاسى بەلارۋس بوكسشىسى ۆلاديمير يۆانوۆتى العاشقى راۋندتا-اق نوكاۋتقا جىبەردى
63 كەلى سالماق دارەجەسىندە ونەر كورسەتكەن بوكسشىمىز قارسىلاسىن بىردەن قىسپاققا الىپ، جۇدىرىق استىنا الدى. ءبىرىنشى راۋندتىڭ 23-ءىنشى سەكۋندىندا جۇمان جۇمابەكوۆ ۆلاديمير يۆانوۆتى نوكاۋتقا جىبەرىپ، جەكپە-جەك توقتاتىلدى. بوكسشىلار بارلىعى 4 راۋن وتكىزۋى ءتيىس بولاتىن.
رينگكە ەكىنشى بولىپ قازاقستاندىق ايدار شارىباەۆ پەن يسپانيالىق حۋان اكۋرو شىقتى.
60 كەلى سالماق دارەجەسىندە قولعاپ تۇيىستىرگەن ايدار شارىباەۆ جەڭىلىپ جاتىپ، جەكپە-جەك سوڭىنا قاراي ەسەسىن قايتارىپ، جەڭىسكە جەتتى.
ال، رينگكە ءۇشىنشى بولىپ شىققان قازاقستاندىق ءالي احمەتوۆ ازەربايجاندىق بوكسشى ءالي ماممەدوۆتى ءبىرىنشى راۋندا نوكاۋتپەن جەڭدى. 78 كەلى سالماق دارەجەسىندە قولعاپ تۇيىستىرگەن بوكسشىلار 6 راۋند وتكىزۋى ءتيىس بولاتىن. الايدا، جەكپە-جەك نەبارى 1 مينۋت 44 سەكۋندقا جالعاستى.
ال، رينگكە ءتورتىنشى بولىپ، شىققان 99 كەلىدەگى وتانداسىمىز رۋسلان مىرساتاەۆ گانالىق نۋحۋ ءازۋميدى 44 سەكۋندتىڭ ىشىندە سۇلاتىپ تۇسىرسە، سايىستاعى التىنشى قازاق جانقوش تۇراروۆ گانالىق بوكسشى يسااك اريەنى 10 راۋندتىق كەزدەسۋدىڭ 4 راۋندىندا تىزە بۇكتىردى.
ال، كاسىپقوي بوكستا العاشقى قادامىن جاساعان جانىبەك ءالىمحانۇلى نۋنەستى العاشقى راۋندا تىزە بۇكتىردى.
جانىبەكتىڭ سوققىلارىنان ەكى رەت تىزەرلەپ وتىرعان نۋنەس ءۇشىنشى جويقىن سوققىدان تۇرا المادى. 1 راۋندتىڭ 2 مينۋتىندا وتانداسىمىز امەريكالىقتى جەڭدى.
P/S
پىكىر قالدىرۋ