الماتى وبلىسىنىڭ قاسكەلەڭ اۋداندىق سوتىندا بۇگىن كوكسۋ اۋدانىنىڭ تۇرعىندارى، مال ساتۋمەن اينالىسقان اعايىندى كىسىلەردىڭ ولىمىنە قاتىستى سوت ۇكىمى شىقتى. اعايىندى ءۇش ەر ادام – جارقىنبەك دولدانۇلى، مۇقيات زارلىقانۇلى مەن قادىلبەك ءالىمحان وسى كۇزدە جوعالىپ، كەيىن ءولى كۇيىندە تابىلعان.

بۇل ءىس بويىنشا سوتقا تارتىلعان تالعات سۇلەيمەنوۆكە ءومىر بويىنا باس بوستاندىعىنان ايىرۋ جازاسى كەسىلدى. ايىپتى مۇرات وڭالباەۆ 25 جىلعا سوتتالدى. ول ەكەۋىنە “پايداكۇنەمدىك پيعىلمەن الدىن الا ءسوز بايلاسۋ ارقىلى كىسى ءولتىردى، قاراقشىلىق جاسادى، بوتەننىڭ كولىگىن زاڭسىز يەلەنىپ الدى، بوتەننىڭ مۇلكىن قاساقانا ورتەپ جىبەردى” دەگەن ايىپتار تاعىلعان. ۇكىم بويىنشا سۇلەيمەنوۆ جازاسىن ەرەكشە رەجيمدەگى كولونيادا، وڭالباەۆ قاتاڭ رەجيمدەگى كولونيادا وتەمەك.

سوت سونىمەن قاتار سوتتالۋشىلاردىڭ ارقايسىسىنان جابىرلەنۋشى تاراپتارعا 10 ميلليون تەڭگەدەن وندىرتۋگە ۇكىم ەتتى. جابىرلەنۋشىلەر اۋەلدە سوتتالۋشىلاردىڭ ارقايسىسىنان 50 ميلليون تەڭگە ءوندىرىپ بەرۋ تۋرالى تالاپ ەتكەن.

ال قىلمىس تۋرالى حابارلامادى دەپ ايىپتالعان باقىت بايقاسىموۆ ءتورت جىلعا سوتتالدى.

كوكسۋ اۋدانىنىڭ تۇرعىندارى، جەتى جىل بۇرىن قىتايدان قازاقستانعا كوشىپ كەلگەن ورالمان ءۇش ازامات – جارقىنبەك دولدانۇلى، مۇقيات زارلىحانۇلى جانە قادىلبەك ءالىمحان 18 قىركۇيەكتە الماتى وبلىسىنىڭ ۇزىناعاش اۋىلىنداعى بازارعا مال ساتۋعا كەلگەن سوڭ جوعالىپ، بىرنەشە كۇننەن سوڭ سۇيەكتەرى تابىلعان.

اعايىندى كىسىلەردىڭ ءولىمى قوعامدا رەزونانس تۋدىرىپ، قىركۇيەكتە ونداعان ادام پوليتسيا عيماراتىنا كىسى ولىمىنە كىنالىلەردى تابۋدى تالاپ ەتىپ جينالدى. كەيىن پوليتسيا ەكى كۇدىكتىنىڭ ۇستالعانىن حابارلادى. قازاقستان پرەمەر-ءمينيسترى باقىتجان ساعىنتاەۆ 27 قىركۇيەكتە ىشكى ىستەر ءمينيسترى قالمۇحانبەت قاسىموۆقا ءۇش كىسىنىڭ ءولىمىن تەرگەۋ بارىسىن باقىلاۋعا الۋدى تاپسىرعان.