Almatı oblısınıñ Qaskeleñ audandıq sotında bügin Köksu audanınıñ twrğındarı, mal satumen aynalısqan ağayındı kisilerdiñ ölimine qatıstı sot ükimi şıqtı. Ağayındı üş er adam – Jarqınbek Doldanwlı, Mwqiyat Zarlıqanwlı men Qadılbek Älimhan osı küzde joğalıp, keyin öli küyinde tabılğan.

Bwl is boyınşa sotqa tartılğan Talğat Süleymenovke ömir boyına bas bostandığınan ayıru jazası kesildi. Ayıptı Mwrat Oñalbaev 25 jılğa sottaldı. Ol ekeuine “paydakünemdik piğılmen aldın ala söz baylasu arqılı kisi öltirdi, qaraqşılıq jasadı, bötenniñ köligin zañsız ielenip aldı, bötenniñ mülkin qasaqana örtep jiberdi” degen ayıptar tağılğan. Ükim boyınşa Süleymenov jazasın erekşe rejimdegi koloniyada, Oñalbaev qatañ rejimdegi koloniyada ötemek.

Sot sonımen qatar sottaluşılardıñ ärqaysısınan jäbirlenuşi taraptarğa 10 million teñgeden öndirtuge ükim etti. Jäbirlenuşiler äuelde sottaluşılardıñ ärqaysısınan 50 million teñge öndirip beru turalı talap etken.

Al qılmıs turalı habarlamadı dep ayıptalğan Baqıt Bayqasımov tört jılğa sottaldı.

Köksu audanınıñ twrğındarı, jeti jıl bwrın Qıtaydan Qazaqstanğa köşip kelgen oralman üş azamat – Jarqınbek Doldanwlı, Mwqiyat Zarlıhanwlı jäne Qadılbek Älimhan 18 qırküyekte Almatı oblısınıñ Wzınağaş auılındağı bazarğa mal satuğa kelgen soñ joğalıp, birneşe künnen soñ süyekteri tabılğan.

Ağayındı kisilerdiñ ölimi qoğamda rezonans tudırıp, qırküyekte ondağan adam policiya ğimaratına kisi ölimine kinälilerdi tabudı talap etip jinaldı. Keyin policiya eki küdiktiniñ wstalğanın habarladı. Qazaqstan prem'er-ministri Baqıtjan Sağıntaev 27 qırküyekte işki ister ministri Qalmwhanbet Qasımovqa üş kisiniñ ölimin tergeu barısın baqılauğa aludı tapsırğan.